పరిశ్రమకు పెద్దదిక్కుగా మారిన మెగాస్టార్

మెగాస్టార్ చిరంజీవి.. ఇప్పుడు సరికొత్త పాత్ర పోషిస్తున్నారు. సినీ పరిశ్రమలో కలుపుకుని ముందుకెళుతూ సినీ కార్మికుల సంక్షేమానికి పాటుపడుతూ అందరివాడయ్యారు. ఒకప్పుడు దాసరి నారాయణరావు పోషించిన పెద్దన్న పాత్రను ఇప్పుడు చిరు తన భుజానికెత్తుకున్నారు. దాసరి ఉన్నప్పుడు ఎవరికి ఏ కష్టం వచ్చినా వెంటనే ఆయన దగ్గరకి వెళ్లేవారు. ఆయన కూడా పెద్ద మనసుతో అందరినీ ఆదరించేవారు. కానీ ఆయన మరణం తర్వాత ఆ స్థానాన్ని ఎవరైనా భర్తీ చేయాల్సి ఉందని పులువురు భావించారు. అది కూడా చిరంజీవి అయితే బాగుంటుందని కొందరు అభిప్రాయపడ్డారు. అయితే, చిరంజీవి ఇందుకు సుముఖత చూపిస్తారా లేదా అని సందేహించారు. కానీ చిరు తనంతట తానుగా ముందుకొచ్చారు. సాయం కావాల్సినవారికి సాయం అందించడం ప్రారంభించారు.

అనంతరం మూవీ ఆర్టిస్ట్స్ అసోసియేషన్ లో ఉన్న లుకలుకలను సరిదిద్దడానికి పరిశ్రమకు చెందిన ఇతర ప్రముఖులతో కలిసి ప్రయత్నాలు చేశారు. అలాగే చిన్న సినిమాల ప్రమోషన్లకు సహకరించడం, వివిధ సినిమా ఫంక్షన్లకు పిలిస్తే కాదనకుండా వెళ్లడం ద్వారా అందరికీ చేరువయ్యారు. తాజాగా ట్విట్టర్ ద్వారా అభిమానులనూ అలరిస్తున్నారు.

ఇక కరోనా మహమ్మారిని ఎదుర్కోవడం కోసం చిరంజీవి కూడా నడుంబిగించారు. సినీ కార్మికుల సంక్షేమం కోసం కరోనా క్రైసిస్ కమిటీ (సీసీసీ) ఏర్పాటు చేయడమే కాకుండా దానికి రూ.కోటి విరాళం ఇచ్చారు. అలాగే కరోనా సాంగ్ రూపొందించి, అందులో హీరోలు కనిపించాలన్న ఆలోచన కూడా చిరుదేనని చెబుతున్నారు. సంగీత దర్శకుడు కోటి స్వరపరచిన ఆ గీతంలో చిరంజీవితోపాటు నాగార్జున, వరుణ్ తేజ్, సాయిధరమ్ తేజ్ కనిపించి సందడి చేశారు.

అంతేకాకుండా సినీ పరిశ్రమలో ప్రస్తుతం షూటింగులు లేకపోవడంతో తల్లడిల్లుతున్న కార్మికులకు ఏం చేయాలో ఎప్పటికప్పుడు ఇతర పెద్దలతో చర్చించి ఆ మేరకు ముందుకెళ్తున్నారు. మొత్తానికి పరిశ్రమలో దాసరి నారాయణరావు లేని లోటును చిరంజీవి తీరుస్తున్నారు. ఈ విషయంలో ఆయన ఎలాంటి భేషజాలకు పోకుండా అందరినీ కలుపుకుని వెళ్తుండటపై సర్వత్రా ప్రశంసలు వెల్లువెత్తుతున్నాయి.

వివాద రహితుడు, మృదు స్వభావి అయిన చిరంజీవి ఈ కొత్త బాధ్యతలను సమర్థంగా నిర్వర్తిస్తూ.. పరిశ్రమ సంక్షేమానికి పాటుపడుతుండటం నిజంగా అభినందనీయం. హ్యాట్సాఫ్ మెగాస్టార్..!