కరోనా నియంత్రణకు లోకేశ్ చిట్కా

ప్రపంచం మొత్తాన్ని నిలువెల్లా వణికిస్తూ.. లక్షలాది మంది ప్రజల్ని భయకంపితులను చేస్తున్న కరోనా వైరస్ ను ఎదుర్కోవడానికి అందరూ విశ్వప్రయత్నాలు చేస్తున్నారు. ఈ వైరస్ కు మందు లేకపోవడంతో వ్యక్తిగత పరిశుభ్రత, స్వీయ నిర్బంధం ఒక్కటే మేలని ముక్తకంఠంతో చెబుతున్నారు. దీనికి ఎదుర్కోవడానికి ఇదిగో మందు అంటూ సోషల్ మీడియాలో సైతం పలు పోస్టులు చక్కర్లు కొడుతున్నాయి. అయితే, వీటిలో ఏది నిజం, ఏది అబద్ధమో తెలియక పలువురు అయోమయానికి గురవుతున్నారు.

ఈ నేపథ్యంలో తెలుగుదేశం పార్టీ జాతీయ ప్రధాన కార్యదర్శి నారా లోకేశ్.. కరోనాను ఎదుర్కోవడానికి ఇదిగో ఓ చిట్కా అంటూ ట్విట్టర్ లో పోస్టు చేశారు. అలవాటైన చేతిని ఎక్కువగా వాడకపోవడం వల్ల ఈ మహమ్మారికి చెక్ పెట్టొచ్చని సూచించారు. ‘‘కరోని మహమ్మారిని ఎదుర్కోవడానికి కొన్ని దేశాలు తల పట్టుకుంటుంటే, కొరియా లాంటి దేశాల్లో చిన్న చిట్కాలతో కరోనాకి చెక్ పెట్టారు. అందులో ప్రధానమైనది.. అలవాటైన చేతిని ఎక్కువగా వాడకపోవడం. మీది కుడిచేతి వాటం అయితే ఎడమచేతితో, ఎడమచేతి వాటం అయితే కుడిచేతితో తలుపులు తీయడంవంటి పనులు చెయ్యండి. తద్వారా ఆ చేతితో మొహాన్ని తాకడం తగ్గుతుంది. ఈ చిన్న జాగ్రత్త కొంతవరకు కరోనా బారిన పడకుండా ఆపుతుంది. ఇది కేవలం ఒక చిట్కా మాత్రమే. రెండు చేతులను శుభ్రంగా కడుక్కోవడం తప్పనిసరి’’ అని ట్వీట్ చేశారు.

ఒకరకంగా చూస్తే ఇది మంచి ఐడియానే. కుడిచేతివాటం ఉన్న వ్యక్తులు దాదాపు అన్ని పనులకూ కుడిచేతినే ఉపయోగిస్తారు. ఈ నేపథ్యంలో తలుపులు తీయడం.. లిప్ట్ లో బటన్లు ప్రెస్ చేయడం వంటి పనులకు ఎడమచేతిని వినియోగించడం ద్వారా కొంతవరకు కరోనాను నియంత్రించే అవకాశం కలుగుతుందని అంటున్నారు. అయితే, ఇలాంటివి ఎన్ని చేసినప్పటికీ, స్వీయ నిర్బంధం, వ్యక్తిగత పరిశుభ్రత, ఎప్పటికప్పుడు చేతులు కడుక్కోవడం మరచిపోకూడదని పలువురు సూచిస్తున్నారు.

కరోనా మహమ్మారిని ఎదుర్కోవడానికి కొన్ని దేశాలు తలపట్టుకుంటుంటే కొరియాలాంటి దేశాల్లో చిన్న చిట్కాలతో కరోనాకి చెక్ పెట్టారు. అందులో ప్రధానమైనది… అలవాటైన చేతిని ఎక్కువగా వాడకపోవడం.(1/2) pic.twitter.com/w6Qc6xDkbP

— Lokesh Nara (@naralokesh) March 28, 2020