ఆశ్చర్యపర్చుతున్న తెలుగు ‘మాస్టర్‌’ లెక్కలు

తమిళంలో విజయ్‌ సూపర్‌ స్టార్‌ అనడంలో ఏమాత్రం సందేహం లేదు. ప్రస్తుతం ఆయన సూపర్‌ స్టార్‌ రజినీకాంత్‌తో పాటు ఇతర తమిళ స్టార్‌ హీరోలకు అందనంత ఎత్తులో ఉన్నాడు. ఆయన ఏ సినిమా చేసినా అది హిట్‌ అయినా కాకున్నా కూడా ఈజీగా వంద కోట్లను అయితే రాబడుతుంది. అలాంటి సినిమాలు చేస్తున్న విజయ్‌ తెలుగులో మాత్రం పెద్దగా మార్కెట్‌ను క్రియేట్‌ చేసుకోవడంలో సఫలం కాలేదు. అందుకే ఆయన నటించిన సినిమాలు తెలుగు రాష్ట్రాల్లో మోతాదుగానే వసూళ్లు రాబడుతున్నాయి.

విజయ్‌ గత చిత్రం బిగిల్‌ తెలుగులో విజిల్‌గా విడుదల అయ్యింది. తెలుగులో విజిల్‌ను 10 కోట్లకు కొనుగోలు చేస్తే అది కాస్త ఏడు కోట్ల షేర్‌కే పరిమితం అయ్యింది. ఇక ఇప్పుడు మాస్టర్‌ చిత్రాన్ని విజయ్‌ చేస్తున్నాడు. దీనికి లోకేష్‌ కనగరాజ్‌ దర్శకత్వం వహిస్తున్నాడు. ఈ సినిమా తమిళనాడులో యమ క్రేజ్‌ను కలిగి ఉంది. తమిళనాడు థియేట్రికల్‌ రైట్స్‌.. ఓవర్సీస్‌ రైట్స్‌.. మలయాళ థియేట్రికల్‌ రైట్స్‌.. శాటిలైట్‌ రైట్స్‌ మొత్తం కలిపి రెండు వందల కోట్ల వరకు బిజినెస్‌ చేస్తుంది.

తమిళంలో అంత బిజినెస్‌ చేసినా తెలుగులో మాత్రం అయిదు ఆరు కోట్ల వరకే బిజినెస్‌ చేస్తుందని అంతా అనుకున్నారు. కాని అనూహ్యంగా తెలుగులో ఈ సినిమా ఏకంగా 12.5 కోట్ల బిజినెస్‌ చేసిందట. గత చిత్రం తీవ్రంగా నిరాశ పర్చినా కూడా ప్రముఖ నిర్మాత మహేష్‌ కోనేరు ఈ సినిమాను ఇంత భారీ మొత్తానికి కొనుగోలు చేసినట్లుగా సమాచారం అందుతోంది. విజిల్‌ చిత్రంతో ఆయన నష్టాల పాలయ్యాడు. అయినా కూడా ఈసినిమాను నమ్ముతున్నాడు. ఇంత భారీ మొత్తంను తెలుగు డబ్బింగ్‌ రైట్స్‌కు పెట్టడంతో వారు కూడా అవాక్కవుతున్నారట.