ఇన్‌సైడ్‌ స్టోరీ: ట్రంప్‌ నుంచి ఇంతకన్నా ఏం ఆశించగలం.?

‘ఇండియా – అమెరికా మధ్య సన్నిహిత సంబంధాలు కొనసాగుతాయి.. నరేంద్ర మోడీ నాకు అత్యంత ఆప్త మిత్రుడు.. తీవ్రవాదాన్ని అరికట్టడంలో అమెరికా ఎప్పుడూ వెనుకడుగు వేయదు…’ ఇలా చాలా విషయాలు అమెరికా అధ్యక్షుడు డోనాల్డ్‌ ట్రంప్‌ నోటి వెంట బయటకొచ్చాయి.

ట్రంప్‌ ఎంతటి మాటకారి.. అనేది అందరికీ తెలిసిన విషయమే. ఇండియాకి వస్తూ హిందీలో ట్వీటేసినా.. 100 మాట్లాడే భాషల గురించీ.. డజనుకు పైగా రాష్ట్రాల గురించీ.. దేశంలోని పలు మతాల గురించీ డోనాల్డ్‌ ట్రంప్‌ ప్రస్తావించడాన్ని ప్రత్యేకంగా చూడాల్సిన పనిలేదు. ట్రంప్‌ భారతదేశానికి వచ్చే ముందు పలు సందర్భాల్లో చేసిన వ్యాఖ్యల్ని చూస్తే.. ఆయన అహ్మదాబాద్‌లోని మోతెరా స్టేడియంలో చేసిన ప్రసంగంలో డొల్లతనం ఏమిటన్నది బయటపడుతుంది.

‘అమెరికా ఫస్ట్‌’ అనే విధానానికి కట్టుబడి వుండే వ్యక్తి డోనాల్డ్‌ ట్రంప్‌. ‘నాటీ బాయ్‌’ అని కాదు, ‘మొండివాడు.. మూర్ఖుడు’ అని కూడా ట్రంప్‌ గురించి రాజకీయ విశ్లేషకుల్లో అభిప్రాయాలున్నాయి. భారత్‌ – అమెరికా మధ్య ‘వాణిజ్యం’ అనేది అమెరికాకి అవసరం. అమెరికా నుంచి రక్షణ ఉత్పత్తులు భారత్‌కి అవసరమా.? లేదా.? అన్నది వేరే చర్చ. కానీ, ‘మా వద్ద ఆయుధాలు కొంటేనే, మీతో సత్సంబంధాలు..’ అని చెబుతుంటారాయన. ప్రపంచంలోనే సైనిక పాఠవం పరంగా అమెరికాకి తిరుగులేదని.. భారత గడ్డ మీద సగర్వంగా చెప్పడమంటే.. అది ‘ట్రెంపరి’తనానికి పరాకాష్ట.!

నిజానికి, భారతదేశం ఆయుధ పాఠవం పరంగా, ఒకప్పుడు రష్యా మీద అమితంగా ఆధారపడేది. భారత వైమానిక దళంలో అత్యంత కీలకమైన యుద్ధ విమానాల్లో చాలావరకు రష్యా నుంచి దిగుమతి చేసుకున్నవో.. రష్యాతో ఒప్పందాలు కుదుర్చుకుని ఇండియాలో తయారు చేసుకుంటున్నవో మాత్రమే వున్నాయి. మరోపక్క, విమాన వాహక నౌక.. అణు జలాంతర్గామి.. ఇవన్నీ రష్యా నుంచి తెచ్చుకున్నవే. ఆ రష్యాతో భారత్‌ బంధాన్ని తెగతెంపులు చేసుకోవాలన్నది అమెరికా ఆశ. ఈ క్రమంలో భారత్‌ని ట్రంప్‌ ‘కెలుకుతున్నాడు’ అన్నది నిర్వివాదాంశం.

మోడీ, ట్రంప్‌తో స్నేహాన్ని గొప్పగా చెప్పుకుంటున్నారు సరే.. త్వరలో జరిగే అమెరికా అధ్యక్ష ఎన్నికల్లో పరిస్థితులు తారుమారైతేనో.! ఇక్కడ మోడీ – ట్రంప్‌ స్నేహం కాదు కావాల్సింది భారతదేశానికి.. భారత్‌ – అమెరికా మధ్య స్నేహం. అమెరికాతో స్నేహం కారణంగా, పాతమిత్రుడు రష్యా.. భారతదేశానికి దూరం కాకూడదు.