‘పెయిడ్‌ రగడ: వైసీపీ ఎమ్మెల్యే రోజాకి ‘అమరావతి’ సెగ.!

అమరావతిలో ఆందోళనలు చేస్తున్నది రైతులు కాదనీ, పెయిడ్‌ ఆర్టిస్టులనీ గతంలో సినీ నటి, వైసీపీ ఎమ్మెల్యే రోజా చేసిన వ్యాఖ్యలు వివాదాస్పదమయిన విషయం విదితమే. ‘అమరావతి ఉద్యమంలో మహిళల్ని ముందు పెట్టి, ఆడింగుల్లా చోద్యం చూస్తున్నారు..’ అంటూ రోజా మరోసారి వివాదాస్పద వ్యాఖ్యలు చేశారు గతంలోనే.

ఈ వ్యవహారంపై రోజాకి, అమరావతిలోనే షాకిచ్చారు రాజధాని అమరావతి ప్రాంత రైతులు. ఓ అధికారిక కార్యక్రమంలో పాల్గొనేందుకు అమరావతి వచ్చిన రోజాకి, ‘సేవ్‌ అమరావతి’ నినాదాలతో ఝలక్‌ ఇచ్చారు మహిళలు. ‘పెయిడ్‌ ఆర్టిస్టులని మమ్మల్ని విమర్శించిన రోజా క్షమాపణ చెప్పాల్సిందే..’ అంటూ మహిళలు నినదించేసరికి, పోలీసులు ఒకింత ఆందోళన చెందారు. ఎమ్మెల్యే రోజాని, వెనుక గేటు గుండా మరో వాహనంలో పంపించేయాల్సి వచ్చింది. దాంతో, పోలీసులు ఊపిరి పీల్చుకున్నారు.

మరోపక్క, ‘టీడీపీ గూండాలు నా మీద దాడికి యత్నించారు.. మహిళా ఎమ్మెల్యేనైనా నా మీద ఇంత దుర్మార్గంగా వ్యవహరిస్తారా.?’ అంటూ రోజా గుస్సా అయ్యారు. రోజా వ్యాఖ్యలపై అమరావతి రైతాంగం మరోమారు భగ్గుమంది. ‘మేం రైతులం.. మీలా మేం పెయిడ్‌ ఆర్టిస్టులం కాదు.. పూటకో పార్టీ మార్చే రాజకీయ నాయకులం కూడా కాదు.. పదవుల కోసం కక్కుర్తిపడేవాళ్ళం అసలే కాదు.. మీరు మీ ముఖ్యమంత్రికి భజన చేస్తారేమో పదవుల కోసం.. మేం, మా అమరావతి కోసం పోరాడుతున్నాం.. ప్రాణాల్ని సైతం లెక్కచేయం..’ అంటూ అమరావతి రైతులు, రోజాకి తమదైన స్టయిల్లో సమాధానమిస్తున్నారు.

ఇదిలా వుంటే, అమరావతి ప్రాంతంలో మరోమారు డ్రోన్లు కలకలం రేపుతున్నాయి. ఓ ఇంటిపైనా, బాత్రూవ్‌ు సమీపంలోకి డ్రోన్‌ రావడంతో ఉద్రిక్త పరిస్థితులు ఏర్పడ్డాయి. ఓ మహిళ స్నానం చేస్తుండగా, డ్రోన్‌లో చిత్రీకరించేందుకు ప్రయత్నిస్తున్నారంటూ పోలీసులతో వాగ్యుద్ధానికి దిగారు మహిళలు. ఈ క్రమంలో పోలీసులు, కొందరిపై లారీలు ఝులిపించారనీ, పలువురికి గాయాలయ్యాయనీ బాధితులు చెబుతున్నారు.