ఢిల్లీలో కేసీఆర్.. ష్ గప్ చుప్!

తెలంగాణ సీఎం కేసీఆర్ ఎప్పుడు హస్తిన వెళ్లినా.. పెద్ద అజెండాయే ఉంటుంది. వీలును బట్టి కేంద్ర ప్రభుత్వ పెద్దలను కలిసి రాష్ట్ర సమస్యలపై వినతిపత్రాలు ఇచ్చి వస్తుంటారు. అలాగే మీడియాతో కూడా మాట్లాడి, వివరాలన్నీ చెబుతారు. కానీ ఈసారి మాత్రం ఆయన పర్యటన అంతా గప్ చుప్ గా సాగిపోయింది. ఓ వివాహ రిసెప్షన్ కు హాజరు కావడం కోసం ఢిల్లీ వెళ్లిన ఆయన.. ఆ ఒక్క కార్యక్రమం మాత్రమే చూసుకుని తిరిగి వచ్చేయడం విశేషం. వాస్తవానికి వీలుంటే ప్రధాని మోదీతోపాటు పలువురు కేంద్ర మంత్రులను కేసీఆర్ కలిసే అవకాశం ఉందని ప్రచారం జరిగింది.

కానీ కేసీఆర్ ఏ ఒక్కరినీ కలవలేదు.. అసలు ఎవరినీ కలిసే ప్రయత్నం కూడా చేయలేదు. సోమవారం రాత్రి హస్తిన వెళ్లిన ఆయన.. మంగళవారం ఉదయం నుంచి సాయంత్రం వరకు బయటకు రాలేదు. సాయంత్రం రిసెప్షన్ కు వెళ్లి వధూవరులను ఆశీర్వదించి, వెంటనే హైదరాబాద్ కు తిరుగు ప్రయాణమయ్యారు. పైగా 24 గంటలపాటు ఢిల్లీలో ఉన్నా.. ఒక్క నిమిషం కూడా మీడియాతో మాట్లాడలేదు. విమానాశ్రయంలో జాతీయ మీడియా ప్రతినిధులు పలు ప్రశ్నలు సంధించినా.. కేసీఆర్ స్పందించలేదు.

ముఖ్యంగా దేశవ్యాప్తంగా దిశ అత్యాచారం, హత్య ఘటన తీవ్ర కలకలం సృష్టిస్తున్న నేపథ్యంలో ఈ అంశంపైనే మీడియా ప్రతినిధులు గుచ్చి గుచ్చి ప్రశ్నలు అడిగారు. దిశ ఘటనపై దేశం మొత్తం ఆందోళనలు సాగుతున్నా.. కనీసం బాధితురాలి కుటుంబ సభ్యులను పలకరించకపోవడంపై ప్రశ్నల వర్షం కురిపించారు. బాధితురాలి కుటుంబ పరామర్శ కంటే వివాహ వేడుకే మీకు ముఖ్యమా అని అడిగినా.. కేసీఆర్ మౌనమే తన సమాధానంగా ఏమీ మాట్లాడకుండా కారెక్కి వెళ్లిపోయారు. దిశ ఘటన జరిగిన తర్వాత దేశం మొత్తం కదలినా.. కేసీఆర్ మాత్రం స్పందించలేదు.

బాధితురాలి ఇంటికి వెళ్లడం అటుంచితే, అసలు ఘటనపై ఒక్క మాట కూడా మాట్లాడలేదు. దీనిపై తీవ్రంగా విమర్శలు వెల్లువెత్తడంతో ఆదివారం ఆర్టీసీ కార్మికులతో జరిగిన సమావేశంలో దిశ ఘటనపై మాట్లాడారు. నిందితులపై కఠిన చర్యలు తీసుకోవాల్సిన అవసరం ఉందని అభిప్రాయపడ్డారు. అంతకుమించి ఒక్క ముక్క కూడా కేసీఆర్ నోటి నుంచి రాలేదు. పైగా హోంమంత్రి మహమూద్ అలీ చేసిన వ్యాఖ్యలు మరింత దుమారం రేపాయి. ఇక ఈ ఘటన జరిగిన తర్వాత అధికార పార్టీ నుంచి నామమాత్ర స్పందన మాత్రమే వ్యక్తమైంది. ఈ పరిస్థితుల్లో ఈ అంశంపై మాట్లాడకపోవమే మంచిదని కేసీఆర్ భావించినట్టు సమాచారం. అందుకే ఢిల్లీ పర్యటనలో ఎవరినీ కలవకుండానే తిరిగొచ్చేశారు.