వైసీపీ నేతల్లో ఫ్రస్ట్రేషన్‌.. కంట్రోల్‌ చేయలేకపోతున్న జగన్‌

అధినేత మెప్పు కోసం చట్ట సభల సాక్షిగా తమ స్థాయిని మర్చిపోతున్నారు వైఎస్సార్‌ కాంగ్రెస్‌ పార్టీ శాసనసభ్యులు. ప్రతిపక్ష నేత చంద్రబాబుని వైసీపీ శాసనసభ్యులు తిడుతోంటే, వినడానికి చాలా ‘సొంపు’గా అన్పించవచ్చుగాక వైఎస్‌ జగన్‌ మోహన్‌రెడ్డికి. మొదట్లో జగన్‌ కూడా అలాంటి వ్యవహారాలు చూసి పండగ చేసుకున్నారు కూడా. రాను రాను జగన్‌, తమ సభ్యుల తీరుతో కొంత ఆందోళనకు గురవ్వాల్సిన పరిస్థితి వస్తోంది.

నలభయ్యేళ్ళ రాజకీయ అనుభవం వున్న చంద్రబాబుని తిట్టే క్రమంలో వైసీపీ శాసనసభ్యులు సంయమనం కోల్పోతే, అది వైఎస్సార్సీపీకే ప్రమాదకరం. ప్రజల్లో ఆల్రెడీ వైసీపీ పలచనైపోయింది. చెయ్యాల్సిన పరిపాలన చెయ్యడం చేతకాదుగానీ, చంద్రబాబుని విమర్శించడంలో మాత్రం ఓవరాక్షన్‌ చేస్తున్నారనే అభిప్రాయం జనంలో క్రమంగా బలపడుతోంది. ఇంటెలిజెన్స్‌ రిపోర్ట్స్‌ కూడా అలాగే వస్తున్నాయట వైఎస్‌ జగన్‌ మోహన్‌రెడ్డికి.

ఎప్పటికప్పుడు అందుకుంటున్న ఇంటెలిజెన్స్‌ రిపోర్ట్స్‌లో తమ పాలన పట్ల వ్యతిరేకత పెరుగుతున్నట్లు తేలడంతో జగన్‌ సందిగ్ధంలో పడిపోయారని సమాచారం. ముఖ్యంగా, చట్ట సభల వేదికగా పార్టీ సభ్యులు చూపుతున్న అత్యుత్సాహం, ప్రజల్లో పార్టీ ఇమేజ్‌ని దారుణంగా డ్యామేజ్‌ చేసిందని ఇంటెలిజెన్స్‌ రిపోర్ట్స్‌తో తేటతెల్లమయ్యిందట. ఇదే విషయం బీజేపీ నేతల మాటల్లోనూ కన్పిస్తోంది.

రెండు నెలలు తిరగకుండానే వైఎస్‌ జగన్‌ ప్రభుత్వం తీవ్ర వ్యతిరేకతను ఎదుర్కొంటోందంటూ బీజేపీ నేతలు చేసిన విమర్శల్ని అధికార పార్టీ సీరియస్‌గా తీసుకోవాల్సిన అవసరం వుంది. కానీ, దాదాపు పదేళ్ళపాటు జగన్‌ మీద చంద్రబాబు అండ్‌ టీమ్‌ చేసిన విమర్శల్ని భరించి వున్న కొందరు వైసీపీ నేతలు, ఆ ఫ్రస్ట్రేషన్‌ని తీర్చుకునే అవకాశం వచ్చింది కాబట్టి.. దాన్ని ఆపడం జగన్‌కీ సాధ్యం కావడంలేదని ఆఫ్‌ ది రికార్డ్‌గా కొందరు వైసీపీ నేతలే తమ సన్నిహితుల వద్ద వాపోతున్నారట.

కంట్రోల్‌ చేయగలిగితేనే నాయకుడు.. అంతే తప్ప, అధినేత మెప్పు కోసం అడ్డగోలుగా వ్యవహరించే నాయకుల్ని అలాగే వదిలేస్తే.. కొంప (అధికారం) మునిగిపోయే ప్రమాదముంది జగన్‌ సారూ!