Rangamarthanda: ‘జగమంత కుటుంబం నాది.. ఏకాకి జీవితం నాది..’ అంటాడో సినీ కవి.! ఆ పాట ‘చక్రం’ సినిమాలోనిది.! కృష్ణవంశీ దర్శకత్వంలో ప్రభాస్ హీరోగా నటించిన ఆ సినిమాలోని ‘జగమంత కుటుంబం నాది..’ పాట అప్పట్లో ఓ సంచలనం.
ఆ పాట ప్రస్తావన ఇప్పుడెందుకు.? అంటే, కృష్ణవంశీ గురించే బహుశా సిరివెన్నెల సీతారామ శాస్త్రి ఆ పాట రాశారేమో.! తన కోసం ‘గురూజీ’ రాసిన ఆ పాటని ఓ సినిమా కోసం కృష్ణవంశీ వాడేశారేమో.!
ఔను, కృష్ణవంశీకి చాలామంది అభిమానులున్నారు. జగమంత అభిమానమది.! ఆయన దర్శకత్వ ప్రతిభకు అభిమానులు వాళ్ళంతా. కృష్ణవంశీ సినిమాలు కొన్ని ఫెయిల్ అయి వుండొచ్చుగాక. కానీ, ‘క్రియేటివ్ డైరెక్టర్’ కృష్ణవంశీ అన్న గుర్తింపు ఆయన్నుంచి ఎప్పుడూ దూరం కాలేదు. కృష్ణవంశీ అంటే ఇదీ.. అని ఆయన దర్శకత్వంలో వచ్చిన కొన్ని సినిమాల్లోని సీన్స్ చూసినప్పుడు అర్థమవుతుంటుంది. భావోద్వేగాలు ఆయన సినిమాల్లో చాలాబాగా పండుతాయ్.!
చాలాకాలం తర్వాత కృష్ణవంశీ నుంచి ఓ సినిమా వస్తోంది. అదే ‘రంగమార్తాండ’. మరాఠీ సినిమా ‘నట సమ్రాట్’కి ఇది తెలుగు రీమేక్.! అక్కడ నానా పటేకర్ పోషించిన పాత్రని తెలుగులో ప్రకాష్ రాజ్ పోషించారు. కాదు కాదు, జీవించేశారు. నానా పటేకర్ లాంటి నటుడు చేసేశాక, ఆ పాత్ర ఇంకెవరైనా చేస్తే.? ప్చ్.. కష్టమే అనుకుంటాం. కానీ, ‘జాతీయ ఉత్తమ నటుడు’ పురస్కారాన్ని గతంలోనే అందుకున్న ప్రకాష్ రాజ్, తన అనుభవాన్నంతా ఈ సినిమా కోసం రంగరించేశారు.
ఇక, ఈ సినిమాలో సర్ప్రైజింగ్ ఎలిమెంట్ అంటే, అది ముమ్మాటికీ బ్రహ్మానందం అనే చెప్పాలి. బ్రహ్మానందం అనగానే కామెడీ గుర్తుకొస్తుంది. కానీ, ఇకపై బ్రహ్మానందం గురించి దర్శకులు ఆలోచించే విధానం కూడా మారుతుంది. బలమైన పాత్రలకి అంతకన్నా బలమైన నటనా ప్రతిభతో ప్రాణ ప్రతిష్ట చేయగలరు బ్రహ్మానందం. కొన్ని సన్నివేశాల్లో ప్రకాష్ రాజ్ని బ్రహ్మానందం తన నటనా ప్రతిభతో డామినేట్ చేశారనడం అతిశయోక్తి కాదేమో. రమ్యకృష్ణ కావొచ్చు, అనసూయ కావొచ్చు.. ఇంకో పాత్ర కావొచ్చు.. ఆయా పాత్రల్లో ఆయా నటీనటులు కాదు, ఆయా పాత్రల స్వభావమే కనిపిస్తుంది. శివాత్మిక రాజశేఖర్, రాహుల్ సిప్లిగంజ్ పాత్రలు సైతం ఆకట్టుకుంటాయి. ఆయా పాత్రల్లో నటీనటులంతా చక్కగా, అందంగా ఒదిగిపోయారు.
నటీనటుల నుంచి ఉత్తమ ప్రతిభను రాబట్టుకోవడంలో కృష్ణవంశీ తర్వాతే ఎవరైనా. అందుకే, కృష్ణవంశీ దర్శకత్వంలో నటిస్తే, నటన పరంగా రాటుదేలినట్లేనని చాలామంది భావిస్తారు. ఆ విషయం ఈ సినిమాతో ఇంకోసారి ప్రూవ్ అయ్యిందంతే. నిజానికి, ‘రంగమార్తాండ’ లాంటి సినిమా తీయాలంటే ఎన్ని గట్స్ కావాలి.?
ఔను కదా.? నిజమే కదా.! కమర్షియల్ పుంతలు తొక్కుతున్న తెలుగు సినిమాని కృష్ణవంశీ కాస్సేపు తనవైపుకు బలంగా తిప్పేసుకున్నాడనిపిస్తుంది. నాటక రంగం ప్రధానంగా సినిమా సాగుతుందేమో అనుకుంటారంతా. కానీ, ఇది జీవితం. మన నిజ జీవితంలోని పాత్రలే చాలావరకు కనిపిస్తాయ్.. ప్రధాన పాత్రధారులు తెరపై కనిపిస్తోంటే. మన ఇంట్లోని సంఘటనల్నే మనం అనుభూతి చెందుతుంటాం.
ప్రకాష్ రాజ్, బ్రహ్మానందం.. ఈ ఇద్దర్నీ తెరపై చూస్తున్నప్పుడు, ‘మనకీ అలాంటి స్నేహితుడుంటే..’ అనిపించకమానదు. తెలుగు భాషకు జరుగుతున్న అన్యాయం దగ్గర్నుంచి, పలు కీలక అంశాలపై సినిమాలో చర్చకు పెట్టారు దర్శకుడు కృష్ణవంశీ. ‘నిగ్గదీసి అడుగు.. అగ్గితోటి కడుగు..’ అన్నట్లుగానే వుంటుంది ‘రంగమార్తాండ’ సినిమా.
సినిమా విడుదల తేదీపై ఇంకా అధికారిక సమాచారం లేదు. కానీ, సినిమాని కొంతమంది సినీ పాత్రికేయులకు, అత్యంత సన్నిహితులకు ప్రత్యేకంగా చూపించారు కృష్ణవంశీ. కాదు కాదు, ఓ గొప్ప అనుభూతిని అందించారాయన. అదే భావన, సినిమా చూసిన ప్రతి ఒక్కరిలోనూ కనిపించింది. సినిమా చూస్తున్నంతసేపూ, చూసినవాళ్ళ కళ్ళల్లో నీళ్ళు తిరిగాయి. మనసుల్లోని ఆలోచనలు ఎక్కడెక్కడో తిరిగాయి. ‘ఇది కదా సినిమా అంటే..’ అనుకున్నారు సినిమా చూసినవాళ్ళంతా.
ప్రదర్శన పూర్తయ్యాక.. ఎవరిదారిన వాళ్ళు వెళ్ళిపోకుండా, సినిమాని ఇంత అద్భుతంగా తీర్చిదిద్దిన, ఆయా పాత్రల జీవితాల్ని వెండితెరపై అత్యద్భుతంగా ఆవిష్కరించిన, జీవిత సత్యాల్ని నేర్పించిన కృష్ణవంశీకి కృతజ్ఞతలు చెప్పకుండా వుండలేకపోయారంటే ‘రంగమార్తాండ’ సినిమాని చూసినవారెంతటి భావోద్వేగానికి లోనయ్యారో అర్థం చేసుకోవచ్చు.
ఆసుపత్రి సన్నివేశంలో బ్రహ్మానందం ప్రదర్శించిన నటన ఈ సినిమా మొత్తానికి హైలైట్గా చెప్పుకోవచ్చు.! వాట్ నాట్.. ఇలాంటివి చాలానే వున్నాయ్. కృష్ణవంశీ టేకింగ్, పాత్రల్లోని భావోద్వేగాల్ని ఆయన ఆవిష్కరించిన తీరు, ఇళయరాజా సంగీతం.. అందునా నేపథ్య సంగీతం.. వీటికి తోడు, మెగాస్టార్ చిరంజీవి షాయరీ.. ‘రంగమార్తాండ’ సినిమాని వేరే లెవల్కి తీసుకెళ్ళాయని నిస్సందేహంగా చెప్పొచ్చు.
సిరివెన్నెల సాహిత్యం, ఆకెళ్ళ శ్రీనివాస్ మాటలు.. సినిమా చూశాక కూడా మనల్ని వెంటాడతాయి. తల్లిదండ్రుల వెతల్ని, పిల్లల బాధ్యతారాహిత్యాన్ని దర్శకుడు కృష్ణవంశీ ప్రశ్నించిన తీరు, సమాజానికి ఓ భావోద్వేగపూరిత హెచ్చరిక.
ఇదీ సినిమా అంటే.! ఇలాంటి సినిమాల్ని ప్రేక్షకులు ఆదరించాలి. అలా ఆదరించాలంటే, సినిమా కూడా బలంగా జనాల్లోకి వెళ్ళాలి. విలవల వలువలూడ్చేసిన ప్రస్తుత మోడ్రన్ ట్రెండ్లో.. ఈ తరహా సినిమాల్ని జనం ఎంతవరకు ‘ఓన్’ చేసుకుంటారు.? అన్నది ముందు ముందు తేలుతుంది.
సినిమాపై ఎంత నమ్మకం వుండి వుంటే, కృష్ణవంశీ సినిమా రిలీజ్ డేట్ ఖరారు కాకపోయినా, సినిమాని ముందే ప్రత్యేక ప్రదర్శన చేయించగలుగుతారు.! చూసిన ఆ వందా నూట యాభై మంది నుంచే కృష్ణవంశీ తాను కోరుకున్న గౌరవాన్ని పొందారు. ఇక, లక్షలాది.. కోట్లాదిమంది సినీ అభిమానుల ముందుకు ఈ సినిమా వస్తే.!
Sir namaste thank you for your review ,but small name correction is to be made Iam dialogue writer of the movie my name is Akella sivaprasad not Akella srinivas as mentioned in the review please make correction thank you
796949 847306Great post, I conceive site owners ought to larn a whole lot from this site its extremely user friendly . 716069