నెల్లూరు పెద్దా‘రెడ్ల’ ముందస్తు రాజకీయం.?

అదేంటో, అధికార పార్టీకి సొంత సామాజిక వర్గంగా చెప్పబడే ‘రెడ్డి’ సామాజిక వర్గం నుంచే ప్రకంపనలు మొదలయ్యాయ్.! నెల్లూరు జిల్లాకి చెందిన ఇద్దరు ‘రెడ్లు’ పార్టీ వీడనున్నారు. మరో ‘రెడ్డి’గారూ అసంతృప్తితో వున్నారు. ఇంతకీ, నెల్లూరు ‘రెడ్డి’ రాజకీయం ఏ మలుపులు తిరగనుంది.?

ఫోన్ ట్యాపింగ్ ఆరోపణల్ని ఇప్పటికే అందులోని ఓ ‘రెడ్డి’గారు చేశారు. ఉత్త ఆరోపణలు కాదు, ఆధారాలతో సహా, కేంద్రానికి ఫిర్యాదు చేస్తానంటున్నారు. సదరు రెడ్డిగారికి ఆల్రెడీ కేంద్ర హోంమంత్రి అమిత్ షా అపాయింట్మెంట్ కూడా ఖరారయ్యిందట.

ఆంధ్రప్రదేశ్‌లో అనూహ్యంగా రాజకీయ వాతావరణం వేడెక్కింది. వైసీపీ ఎమ్మెల్యే కోటంరెడ్డి శ్రీధర్ రెడ్డి వ్యవహారంపై అధినాయకత్వం గుస్సా అవుతోంది. కానీ, ఏమీ చేయలేని.. చేవలేని దుస్థితి అధినాయకత్వానిది. రఘురామకృష్ణరాజుని పార్టీ నుంచి బయటకు పంపలేకపోయారు.. అలంటిది, కోటంరెడ్డి శ్రీధర్ రెడ్డిని అయినా, ఆనం రామనారాయణరెడ్డిని అయినా ఎలా పంపుతారు.?

తిడితే తిట్టించుకోవాల్సిందే.. కుదిరితే ఎదురుదాడి చేయాల్సిందే. వయా బీజేపీ.. టీడీపీలోకి వెళ్ళాలన్నది ఆ నెల్లూరు పెద్దారెడ్ల ఆలోచనలా కనిపిస్తోంది. ‘ఆయన నాకు అత్యంత సన్నిహితుడు.. బీజేపీలోకి వస్తానంటే ఆహ్వానిస్తా..’ అంటూ ఓ బీజేపీ నేత, కోటంరెడ్డి శ్రీధర్ రెడ్డి గురించి ఆసక్తికరమైన వ్యాఖ్యలు చేశారు ఓ న్యూస్ ఛానల్ చర్చా కార్యక్రమంలో.

ఇదిలా వుంటే, ఇప్పుడు బాలినేని శ్రీనివాస్ రెడ్డి నీతి సూత్రాలు చెబుతున్నారుగానీ.. మంత్రి పదవి పోయాక, ఆయనా పార్టీకి ఎదురుతిరిగినంత పనిచేసిన సంగతి తెలిసిందే. ఏ క్షణాన అయినా, బాలినేని కూడా వైఎస్ జగన్ మోహన్ రెడ్డికి హ్యాండిచ్చే అవకాశాల్లేకపోలేదట.

ఇదెక్కడి పంచాయితీ.? ఏకంగా 60కి పైగా ఎమ్మెల్యేలు వైసీపీని వీడతారంటూ నెల్లూరు పెద్దారెడ్లు చేస్తున్న ఆరోపణలు.. ఉత్త ఆరోపణలేనా.? ఏమోగానీ, రాజీనామా చేసి.. ప్రజా క్షేత్రంలో తేల్చుకోవాలని సదరు ముగ్గురు నెల్లూరు పెద్దారెడ్లూ ఓ నిర్ణయానికి వచ్చారట.! ఇది బీజేపీ వ్యూహమా.? ఒకవేళ రాజీనామాలు ఆమోదం పొందితే.? ఛాన్సే లేదు.! ఎందుకంటే, స్పీకర్ వున్నది వైసీపీ చేతిలో కదా.?

నెల్లూరు పెద్దారెడ్ల ముందస్తు వ్యూహం ఫలిస్తే మాత్రం.. అధికార పార్టీకి చుక్కలు కనిపిస్తాయ్.!