వైఎస్ షర్మిల తెలంగాణం.! ‘జగనన్న’ ఆనాడే చెప్పినాడూ.!

యువజన శ్రామిక రైతు కాంగ్రెస్ పార్టీ తెలంగాణ నుంచి అంతర్ధానమైపోయింది.! కానీ, ఆ పార్టీకి చెందిన నాయకులంతా ఇప్పుడు వైఎస్సార్ తెలంగాణ పార్టీలో వున్నారు. వైఎస్ షర్మిల స్థాపించిన పార్టీ ఇది.!

రాజన్న రాజ్యమంటే, రాష్ట్రానికి రాజధాని లేకుండా చేయడమట.! సోషల్ మీడియాలో అలా సెటైర్లు పేలుతున్నాయ్. తెలంగాణలోనూ రాజన్న రాజ్యం తీసుకొస్తానని వైఎస్ షర్మిల చెబుతోంటే, హైద్రాబాద్ భవిష్యత్తు ఏమైపోతుందోనన్న ఆందోళన తెలంగాణ సమాజంలో వ్యక్తమవుతోంది.. అది వేరే వ్యవహారం.

‘వైఎస్ జగన్ ఎంత చెప్పినా షర్మిల వినలేదు. తెలంగాణలో ఆమె రాజకీయ పార్టీ పెట్టడం మాకు ఇష్టం లేదు. కానీ, అది ఆమె నిర్ణయం. ఆమెతో మా పార్టీకి సంబంధం లేదు. రాజశేఖర్ రెడ్డి కుమార్తెగా, వైఎస్ జగన్ చెల్లెలిగా మాత్రం ఆమె పట్ల మాకు గౌరవం వుంటుంది..’ అని కొన్నాళ్ళ క్రితం.. అంటే, వైఎస్ షర్మిల తెలంగాణలో పార్టీ పెడుతున్న సందర్భంలో వైసీపీ ముఖ్య నేత సజ్జల రామకృష్ణారెడ్డి సెలవిచ్చారు.

‘సజ్జల అలా అనడం నాకు బాధ కలిగించింది..’ అంటూ షర్మిల కూడా వాపోయారు.! ఎంత నాటకం.? తెలంగాణను ఇప్పటికి వదిలి పెట్టాల్సి వస్తున్నప్పటికీ, ముందు ముందు షర్మిల తెలంగాణలో ప్రతి గడపకీ వెళతారనీ, తెలంగాణ బాధ్యతలు షర్మిలకు అప్పగిస్తున్నాననీ గతంలోనే వైఎస్ జగన్ ఓ బహిరంగ సభలో చెప్పారు.

ఆ వ్యాఖ్యలు ఇప్పుడు వైరల్ అవుతున్నాయి. అదే పాత రాజకీయం.! అస్సలేమీ మారలేదు. అప్పుడు జగన్ కోసం విజయమ్మ, షర్మిల.. ఇప్పుడు షర్మిల కోసం ప్రస్తుతానికి వైఎస్ విజయమ్మ.. ముందు ముందు వైఎస్ జగన్ కూడా.!

వైఎస్సార్ కాంగ్రెస్ పార్టీ, వైఎస్సార్ తెలంగాణ పార్టీ. పేర్లు మాత్రమే తేడా. రెండు పార్టీలకీ సోషల్ మీడియా విభాగం దాదాపు ఒకటే. పైకి, ‘షర్మిలతో మాకు రాజకీయంగా సంబంధం లేదు’ అని వైసీపీ నేతలు చెబుతున్నా, తెరవెనుకాల ఆమెకు సంపూర్ణ సహాయ సహకారాలు అందిస్తున్నారు. అంతెందుకు, హైద్రాబాద్‌కి వచ్చి షర్మిల ఆశీస్సులు పొందుతున్నారు పలువురు వైసీపీ నేతలు.. అదీ తరచుగా.!

అయిపాయె.. తెలంగాణ ఖేల్ ఖతం అవబోతోంది.. అంటూ షర్మిల నిన్న హైద్రాబాద్‌లో నడిపిన హైడ్రామా అనంతరం సర్వత్రా చర్చ జరుగుతోంది.