అమరావతిపై సుప్రీం ఏం చెప్పింది.? వీళ్ళకి ఏం అర్థమయ్యింది.?

ఆంధ్రప్రదేశ్ రాజధాని అమరావతి విషయంలో వైసీపీ సర్కారుకి ఊరట.! కాదు కాదు, హైకోర్టుకే మొట్టికాయలు వేసిన సుప్రీంకోర్టు.! పచ్చ బ్యాచ్ అమరావతి నుంచి మూటాముళ్ళు సర్దుకోవాల్సిందే.! ఏపీకి మూడు రాజధానులు తథ్యం.! సుప్రీం తీర్పు వైసీపీకి అనుకూలం.. మూడు రాజధానులకు అనుకూలంగాను సుప్రీంకోర్టు తీర్పునిచ్చేసింది.!

ఇదీ.. ఇలా ప్రచారం చేసుకుంటోంది ఆంధ్రప్రదేశ్‌లోని అధికార వైసీపీ.! ఏపీ ప్రభుత్వ సలహాదారు, వైసీపీ ముఖ్య నేత సజ్జల రామకృష్ణారెడ్డి అయితే, ‘తొందరపడి ఓ కోయిల.. ముందే కూసింది..’ అన్నట్లుగా, సర్వోన్నత న్యాయస్థానం ఇచ్చిన తీర్పుని స్వాగతించేశారు.

విచారణ సందర్భంగా సుప్రీంకోర్టు పిటిషనర్లకు కొన్ని ప్రశ్నలు వేసింది. అటు ప్రభుత్వాన్నీ, ఇటు రైతుల్నీ, ఇంకోపక్క హైకోర్టునీ ఉద్దేశించి న్యాయస్థానం పలు వ్యాఖ్యలు చేసినట్లుగా ప్రచారం జరుగుతోంది. మీరే ప్రభుత్వమైతే, క్యాబినెట్ ఎందుకు.? అని సుప్రీంకోర్టు వ్యాఖ్యానించినట్లుగా ఓ వార్త ‘బ్రేకింగ్’ అయిపోయింది.

అసలు సర్వోన్నత న్యాయస్థానం ఏం చెప్పింది.? అన్నదానిపై ‘కోర్టు తీర్పు కాపీ’ బయటకు వచ్చేదాకా ఎవరూ ఆగలేదు. ఎవరికి తోచింది వాళ్ళు చెప్పేసుకున్నారు. నిజానికి, కొన్ని అంశాలపై సుప్రీంకోర్టు ఇచ్చిన స్టే కూడా తాత్కలికమే. జనవరి 31 వరకు మాత్రమే ఆ స్టే.

పైగా, ‘హైకోర్టులో ధిక్కరణకు సంబంధించిన వ్యవహారాలు నడుస్తున్నందున.. అమరావతిలో అభివృద్ధి కార్యకలాపాలు చేపట్టడంలో ఆలస్యమవుతోంది.. వాటిపై స్టే కావాలి..’ అని రాష్ట్ర ప్రభుత్వం కోరితే, వాటికి మాత్రమే సుప్రీంకోర్టు అనుకూలంగా నిర్ణయం తీసుకుంది.

అంతే తప్ప, మూడు రాజధానులకు అనుకూలంగా సుప్రీంకోర్టు ఎలాంటి వ్యాఖ్యలూ చేయలేదు. పైగా, ‘ఎ క్యాపిటల్’ అని కేంద్ర ప్రభుత్వం చేసిన చట్టంలో పేర్కొన్నప్పుడు, మూడు రాజధానుల ప్రస్తావనేంటి.? అన్న ప్రశ్న కూడా సర్వోన్నత న్యాయస్థానం రాష్ట్ర ప్రభుత్వానికి వేసిందట.

అంతేనా, అసలిప్పుడు మూడు రాజధానుల బిల్లు లేదనీ, దాన్ని ప్రభుత్వం వెనక్కి తీసుకుందనీ సుప్రీంకోర్టుకి ఏపీ సర్కారు స్పష్టంగా తెలియజేశాక, మూడు రాజధానుల గోలేంటి.? దేన్ని సజ్జలగానీ, మిగతా వైసీపీ నేతలుగానీ స్వాగతించినట్లు.?