చిరంజీవికి విశిష్ట పురస్కారం.! వాళ్ళెందుకు చచ్చుబడిపోయారు.?

మెగాస్టార్ చిరంజీవి అజాత శతృవు.! సినిమాల్లో అయినా, రాజకీయాల్లో అయినా ఆయనకు శృతృవులు లేరు. కానీ, అక్కసు చాలామందికి వుంది. ప్రత్యేకించి సినీ పరిశ్రమలో చిరంజీవి ఎదుగుదలని చూసి ఓర్వలేనోళ్ళు కొంతమంది వున్నారు. దేశంలోనే అత్యున్నత పౌర పురస్కారాల్లో ఒకటైన పద్మభూషణ్ పురస్కారం చిరంజీవికి ప్రకటితమైనప్పుడూ నిస్సిగ్గు రాజకీయాలు సినీ పరిశ్రమలో నడిచాయి.

తాజాగా, ఇండియన్ పిలిం పర్సనాలిటీ 2022 పురస్కారానికి మెగాస్టార్ చిరంజీవిని ఎంపిక చేశారు. 150కి పైగా సినిమాల్లో నటించి, దాదాపు నాలుగు దశాబ్దాలుగా నటుడిగా తెలుగు సినీ పరిశ్రమలో నెంబర్ వన్ హీరోగా తిరుగులేని స్టార్‌డమ్‌తో దూసుకుపోయిన చిరంజీవి ఈ పురస్కారానికి అన్ని విధాలా అర్హుడు.

గతంలో రజనీకాంత్ తదితర ప్రముఖులకు ఈ పురస్కారం లభించినప్పుడు తెలుగు మీడియా చేసిన హంగామా అంతా ఇంతా కాదు. మెయిన్ స్ట్రీమ్ మీడియా, సోషల్ మీడియా, వెబ్ మీడియా.. ఇలా ఓ రేంజ్‌లో రచ్చ చేయడం చూశాం. మరి, చిరంజీవి విషయం లో.. ఎందుకు ఆ స్థాయి హంగామా కనిపించడంలేదు.

చిరంజీవి మీడియాకి ఎప్పుడూ దూరంగా వుండరు. మీడియాతో అత్యంత సన్నిహితంగానే మెలుగుతుంటారు. మరి, ఆ మీడియా చిరంజీవిని ఈ విషయంలో ఎందుకు దూరం పెడుతున్నట్టు.? ఏ శక్తులు వీళ్ళని, చిరంజీవికి దూరంగా తీసుకెళ్ళుతున్నట్లు.? ఈ విషయమై సినీ, రాజకీయ వర్గాల్లో ఒకింత ఆసక్తికరమైన చర్చ జరుగుతోంది.

చిరంజీవికి ‘ఇండియన్ ఫిలిం పర్సనాలిటీ 2022’ పురస్కారం దక్కడాన్ని కొందరు జీర్ణించుకోలేకపోతున్నారు. వాళ్ళ ఎంగిలిమెతుకులకు కక్కుర్తిపడే మీడియా సంస్థలనండీ, ఇతరులనండీ.. చిరంజీవికి దక్కిన అరుదైన గౌరవం తాలూకు స్థాయిని తగ్గించేందుకు ప్రయత్నిస్తున్నారన్నది బహిరంగ రహస్యమిక్కడ.

ప్రధాన మంత్రి నరేంద్ర మోడీ, తెలుగు రాష్ట్రాల గవర్నర్లు, పలువురు కేంద్ర మంత్రులు సైతం చిరంజీవి ప్రతిభాపాటవాల్ని కొనియాడుతున్న వేళ, తెలుగు సినీ పరిశ్రమ నుంచి స్పందన కొరవడటం అందర్నీ విస్మయానికి గురిచేస్తోంది. కొందరు ప్రముఖులకు తోకల్లా మారిపోయిన పీఆర్వోలు, జర్నలిస్టులు, మీడియా సంస్థల కారణంగానే ఇదంతా జరుగుతోందా.? ఈ అంశంపై ఎలక్ట్రానిక్ మీడియాలో చర్చా కార్యక్రమాలు సైతం జరగకపోవడానికి కారణమేంటి.?

నిజానికి, సినీ పరిశ్రమ తరఫున వివిధ విభాగాలు ఈ పురస్కారం విషయంలో చిరంజీవిని ప్రత్యేకించి అభినందించాలి, సన్మానించాలి. ఎందుకంటే, గత కొంతకాలంగా సినీ పరిశ్రమకు ఏ కష్టం వచ్చినా, పెద్దన్నలా నిలబడి, ఆ సమస్యల పరిష్కారం కోసం కృషిచేస్తున్నారు చిరంజీవి. ‘స్థాయి’ విషయంలో తనకన్నా చాలా చిన్న వ్యక్తుల ముందు సైతం ‘చేతులు కట్టుకోవాల్సి వస్తే’ దానికీ చిరంజీవి వెనుకంజ వేయడంలేదు.. అంతిమంగా సినిమా పరిశ్రమకు మేలు జరగాలన్నదే చిరంజీవి ఆలోచన. అంతెందుకు, ‘పరిశ్రమ పెద్దన్న ఆయన కాదు..’ అని కొన్ని మూర్ఖపు నాలుకలు మాట్లాడుతోంటే, ‘ఔను, నాకు పరిశ్రమ పెద్దరికం వద్దు. పరిశ్రమ బిడ్డగా నేనెప్పుడూ పరిశ్రమ బాగు కోసం ప్రయత్నిస్తా..’ అని చెప్పిన గొప్ప వ్యక్తి చిరంజీవి.

ఒక్కమాటలో చెప్పాలంటే, పరిశ్రమలో చాలామందికి నోళ్ళు పడిపోయాయ్.. శరీరాలూ చచ్చుబడిపోయాయ్.! చిరంజీవికి దక్కిన అరుదైన గౌరవాన్ని జీర్ణించుకోలేకపోవడం వల్లనే వాళ్ళకి ఆ సమస్య వచ్చినట్టుంది. మీడియాకి కులజాడ్యం ఎక్కువైపోయింది. ఆ జాడ్యం, చిరంజీవి ఘనతను చాటి చెప్పాలంటే ఒప్పుకోదు మరి.! నవ్విపోదురుగాక వాళ్ళకేటి సిగ్గు.? ఇదా జర్నలిజం.? ఇదా మెగాస్టార్ చిరంజీవి అనే శిఖరానికి ఇచ్చే గౌరవం.

చిరంజీవి ఎప్పుడూ పొగడ్తల్ని ఆశించరు.. 150 సినిమాలు చేసిన చిరంజీవి, ఇన్నేళ్ళ కెరీర్‌లో ఎన్నో ఎత్తుపల్లాల్ని చూశారు. ఎన్ని ఎదురుదెబ్బలు తగిలినా, మొక్కవోని ధైర్యంతో శిఖరమంత ఎత్తుకు ఎదిగారు. అభిమానులు ఆ శిఖరానికి తగిన గౌరవం దక్కాలని ఆశించడంలో తప్పు లేదు కదా.? ఆ అభిమానులే– ఇప్పుడు సోకాల్డ్ సినీ వర్గాల్ని, జర్నలిస్టుల్నీ, మీడియా సంస్థల్నీ, పరిశ్రమలో కొన్ని మూర్ఖపు తలకాయల్నీ ఏకిపారేస్తున్నారు.