సినిమా రివ్యూ : బ్రోచేవారెవరురా

నటీనటులు : శ్రీవిష్ణు, సత్యాదేవి,ప్రియదర్శి, రాహుల్ రామకృష్ణ, నివేద థామస్, నివేద పేతురేజ్, శివాజీ రాజా, ఝాన్సీ , బిత్తిరి సత్తి, తదితరులు ..
రేటింగ్ : 3 / 5
సమర్పణ : సురేష్ ప్రొడక్షన్స్
సంగీతం : వివేక్ సాగర్
కెమెరా : సాయి శ్రీరామ్
ఎడిటింగ్ : రవితేజ గిరజాల
నిర్మాత : విజయ్ కుమార్ మన్యం
దర్శకత్వం : వివేక్ ఆత్రేయ

ప్రస్తుతం ప్రేక్షకుల అభిరుచికి తగ్గట్టుగా మేకర్స్ కూడా కొత్త తరహా కథలను ఎంచుకుంటూ సరికొత్త ప్రయోగాలు చేస్తున్నారు. ముఖ్యంగా కొత్త దర్శకులు సరికొత్త కథలకు ప్రాధాన్యత ఇస్తూ యూత్ ని టార్గెట్ చేస్తూ సక్సెస్ అందుకుంటున్నారు. ఇప్పటికే తెలుగులో అలాంటి చిత్రాల పరంపర మొదలైంది. రెగ్యులర్ కమర్షియల్ ఫార్ములాకు బిన్నంగా .. వినోదమే ప్రధానంగా సినిమాలను తెరకెక్కిస్తున్నారు. ఈ మద్యే మెంటల్ మదిలో సినిమాతో దర్శకుడిగా పరిచయం అయిన వివేక్ ఆత్రేయ రెండో ప్రయత్నంగా చేసిన చిత్రమే బ్రోచేవారెవరురా. టీజర్ నుండి అందరిలో ఆసక్తి రేపిన ఈ సినిమా ఎలా ఉందొ తెలుసుకోవాలంటే కథలోకి వెళ్లాల్సిందే ..

కథ :

విశాల్ ( సత్యదేవ్ ) దర్శకుడు కావాలన్న కోరికతో సినిమా రంగంలో ప్రయత్నాలు చేస్తూ ఉంటాడు. ఈ సందర్బంగా ఓ నిర్మాతను ఒప్పించినా, అయన ఓ స్టార్ హీరోయిన్ తో ఈ సినిమా చేద్దాం ఆమెను ఒప్పించు అని నిర్మాత చెప్పడంతో విశాల్ స్టార్ హీరోయిన్ అయిన షాలిని ( నివేద పేతురేజ్ ) కు కథ చెప్పే ఛాన్స్ దొరుకుతుంది. ఆ కథను చెప్పే క్రమంలో మరో కథ ఓపెన్ అవుతుంది. ఒక ఊరిలో కాలేజీ ప్రిన్సిపాల్ కూతురు మిత్ర ( నివేద థామస్ ) నాట్యకళాకారిని. అయితే ఆమె నాట్యం చేయడం ఇష్టం లేని ఆమె తండ్రి తాను పనిచేస్తున్న కాలేజ్ లోనే ఆమెను చేర్పిస్తాడు. చదువంటే అస్సలు ఇష్టం లేని నివేద ఆ కాలేజీ లో చేరుతుంది. అదే కాలేజీలో చదివే ముగ్గురు మిత్రులు .. రాహుల్ ( శ్రీ విష్ణు ), రాఖీ ( ప్రియదర్శి ), రాంబో ( రాహుల్ రామకృష్ణ ) మంచి స్నేహితులు. చదువు తప్ప అన్ని పనులు చేస్తుంటారు. ఆ తరువాత మిత్రతో రాహుల్ పరిచయం పెంచుకుంటాడు. తనకు డాన్స్ అంటే ఇష్టమని చదువు అస్సలు ఇష్టం లేదని మిత్ర ద్వారా తెలుసుకున్న రాహుల్ ఎలాగైనా మిత్రను మంచి డాన్సర్ చేయాలనీ ప్లాన్ చేస్తారు. ఈ క్రమంలో ఓ కిడ్నాప్ లో ఇరుక్కుంటారు. ఆ తరువాత జరిగిన కొన్ని నాటకీయ పరిణామాల మధ్య మిత్ర కిడ్నాప్ కు గురవుతుంది. ఆ కిడ్నాప్ చేసింది ఎవరు ? అసలు ఈ ముగ్గురికి దర్శకుడు అవ్వాలనుకున్న విశాల్ కు మధ్య సంబంధం ఏమిటి ? ఆ కిడ్నాప్ నుండి వీరు ఎలా బయటపడ్డారు అన్నది మిగతా కథ.

నటీనటుల ప్రతిభ :

ఈ సినిమాలో నటన పరంగా అందరు బాగా చేసి ఆకట్టుకున్నారు. ఈ సినిమాలో హీరో శ్రీవిష్ణు అయినప్పటికీ అతనితో సమానంగా ప్రియదర్శి, రాహుల్ రామకృష్ణ ల పాత్రలు ఉండడం నిజంగా గొప్ప విషయం. శ్రీ విష్ణు ఎప్పటిలాగే తన టైమింగ్ తో ఆకట్టుకునే ప్రయత్నం చేసాడు. రాహుల్ రామకృష్ణ, ప్రియదర్శి ల కామెడీ బాగుంది. కామెడీ కోసం ప్రత్యేకంగా ట్రాక్ లా కాకుండా కథ నేరేషన్ లోనే కామెడీ పండించే ప్రయత్నం చేసారు. ఇక మరో హీరో సత్యదేవ్ దర్శకుడు అవ్వాలన్న లక్ష్యంతో ఉన్న కుర్రాడిగా చక్కగా నటించాడు. స్టార్ హీరోయిన్ షాలిని పాత్రలో నివేద పేతురేజ్ చక్కగా చేసింది. ఇక కథకు కీ రోల్ అయిన మిత్ర పాత్రలో నివేద థామస్ నటన బాగుంది. ఇప్పటికే నటిగా మంచి పేరు తెచ్చుకున్న నివేద థామస్ మరోసారి చక్కని పాత్రతో మెప్పించింది. మిగతా పాత్రల్లో ఝాన్సీ, శివాజీ రాజా, అజయ్ ఘోష్ లు ఉన్నంతలో బాగా చేసారు. అయితే బిత్తిరి సత్తి పాత్రను మాత్రం సరిగ్గా ఉపయోగించుకోలేదు.

టెక్నీకల్ హైలెట్స్ ;

మెంటల్ మదిలో సినిమాతో సున్నితమైన ప్రేమ కథను చెప్పి మెప్పించిన దర్శకుడు వివేక్ ఆత్రేయ ఈ సారి మరో భిన్నమైన కథను ఎంచుకున్నాడు. క్రైమ్ కామెడీ థ్రిల్లర్ గా సాగిన ఈ సినిమా ఆద్యంతం కామెడీగా సాగుతూ ఆకట్టుకుంది. వివేక్ సాగర్ అందించిన మ్యూజిక్ సినిమాకు హైలెట్. లైట్ మ్యూజిక్ తో కథను నడిపించాడు. అలాగే పాటలకు స్కోప్ లేకపోవడంతో ఆర్ ఆర్ పైనే గట్టిగ ఫోకస్ పెట్టి మెప్పించే ప్రయత్నం చేసాడు. సాయి శ్రీరామ్ ఫోటోగ్రఫి బాగుంది. సరికొత్తగా ఫోటోగ్రఫి ఉండేలా ప్లాన్ చేసాడు. ఇక ఎడిటింగ్ కూడా బాగుంది. ఫైనల్ గా దర్శకుడు వివేక్ ఆత్రేయ ఎంచుకున్న కథ .. కథనం ఆసక్తిగా సాగింది. పెద్దగా హంగామా లేని కథను .. దానికి తగ్గట్టుగా స్క్రీన్ ప్లే తో ప్రజెంట్ చేసాడు దర్శకుడు. ఇలాంటి కథల్లో ఆసక్తి కలిగించే అంశం ఏది తక్కువైనా ఫలితం మరోలా ఉంటుంది . ఆ విషయంలో దర్శకుడు చాలా కేర్ తీసుకున్నాడు. ప్రేక్షకుడి మెదడుకు పదును పెడుతూ .. ఒక్కో సస్పెన్స్ ని ఆవిష్కరిస్తూ కథను నడిపించాడు. ట్విస్టులన్నీ ఆసక్తికరంగా సాగడం విశేషం. ఇక కథనం విషయంలో కూడా ఏమాత్రం కన్ఫ్యూజ్ అయినా మొదటికే మోసం వస్తుంది, కాబట్టి ఆ విషయంలో జాగ్రత్త పడ్డాడు దర్శకుడు. నిర్మాణ విలువలు బాగున్నాయి.

విశ్లేషణ :

ఇలాంటి కథలను రెండు గంటలపాటు ప్రేక్షకులను ఎంగేజ్ చేయడం నిజంగా కత్తిమీద సాము లాంటిదే. క్రైం థ్రిల్లర్ కు కామెడీ జోడిస్తూ .. ఎక్కడా సీరియస్ నెస్ కలగకుండా కథ ఆహ్లాదంగా సాగిపోయేలా కేర్ తీసుకున్నాడు దర్శకుడు. నిజానికి ఇలాంటి కథలతో చాలా సినిమాలే వచ్చాయి. అయితే కథలో కొత్తదనం, దాన్నీ అదే ఇంటెన్స్ తో నడపడం ఇక్కడ వర్కవుట్ అయ్యింది. రెండు కథలను మిక్స్ చేస్తూ .. ఆ రెండింటికి సరైన లింక్ పెట్టి సక్సెస్ అయ్యాడు దర్శకుడు. కథ విషయంలో ముందు ముందు ఏమి జరుగుతుందో ఊహించడం కొంచెం కష్టమే. దర్శకుడి ఇంటిలిజెన్స్, కథ .. నటీనటుల పెర్ఫార్మెన్స్ లాంటి అంశాలు హైలెట్ గా సాగిన బ్రోచేవారెవరురా .. ప్రేక్షకులకు కొత్త ఫీలింగ్ కలిగిస్తుంది. కథ ఫస్ట్ హాఫ్ లో చాలా ఫన్ తో సాగుతుంది .. సెకండ్ హాఫ్ తో అసలు కథ మొదలై ప్రేక్షకులకు కట్టి పడేస్తుంది. మొత్తానికి కిడ్నాప్ డ్రామాగా లైట్ కామెడీ కోటింగ్ తో వచ్చిన బ్రోచేవారెవరురా ఓ మంచి ప్రయత్నం అని చెప్పాలి.

ట్యాగ్ లైన్ : .. బ్రోచేవారు .. అందరూ !!