మళ్ళీ పట్టాలెక్కనున్న త్రీ క్యాపిటల్స్.! నమ్మేదెవరు చెప్మా.?

మూడు రాజధానుల పేరుతో మళ్ళీ హైడ్రామా షురూ కాబోతోంది. వచ్చే వర్షాకాల అసెంబ్లీ సమావేశాల్లోనే మూడు రాజధానుల బిల్లుని వైసీపీ సర్కారు ప్రవేశ పెట్టబోతోందట. ఈసారి ఉభయ సభల్లోనూ తమకు ఎలాంటి ఇబ్బందీ వుండబోదని వైసీపీ భావించడంలో వింతేముంది.?

ప్రతిపక్షం తెలుగుదేశం పార్టీ ఇటు అసెంబ్లీలో పోరాడలేదు, అటు శాసన మండలిలోనూ ఆ పార్టీ పరిస్థితి అంతంతమాత్రమే. ఈ పరిస్థితుల్లో అధికార వైసీపీకి, మూడు రాజధానుల విషయమై ఎలాంటి నిర్ణయం తీసుకున్నా ఇబ్బందేమీ వుండకపోవచ్చు. వాస్తవానికి, గతంలోనూ చట్ట సభల్లో మూడు రాజధానుల బిల్లుని ఆమోదించేశాం.. అని ఘనంగానే చెప్పుకుంది వైసీపీ.

కానీ, ఏం జరిగింది.? న్యాయస్థానాల్లో మూడు రాజధానుల బిల్లుకి చుక్కెదురయ్యింది. తుది తీర్పు రాకుండానే, మూడు రాజధానుల బిల్లుని వెనక్కి తీసుకుంటున్నట్లు ప్రభుత్వం ప్రకటించాల్సి వచ్చింది.. హైకోర్టుకి ఈ మేరకు సమాచారమిచ్చి, అసెంబ్లీలో బిల్లుని వెనక్కి తీసేసుకున్నారు. అంతేనా, న్యాయస్థానాల పరిధి గురించి చట్ట సభల్లో చర్చ కూడా చేసింది వైసీపీ. దాని వల్ల కలిగిన ప్రయోజనమేంటి.? అంటే, అది మళ్ళీ వేరే చర్చ.

ఈసారి కూడా మూడు రాజధానుల బిల్లుని ప్రవేశ పెడితే పెట్టొచ్చు. లేకపోతే, ఇదంతా ఉత్త డ్రామాగా మిగిలిపోనూ వచ్చు.! సీపీఎస్ రద్దు చేశారా.? మద్యపాన నిషేధం అమలు చేస్తున్నారా.? ప్రత్యేక హోదా తెచ్చారా.? పోలవరం ప్రాజెక్టు పూర్తి చేశారా.? కడప స్టీలు ప్లాంటు, దుగరాజపట్నం పోర్టు ఏమయ్యాయ్.? ఇలాగే వుంటుంది మూడు రాజధానుల వ్యవహారం కూడా. ఇంతకు మించి ఏదో చిత్తశుద్ధి వైసీపీకి వుందనుకుంటే అంతకన్నా హాస్యాస్పదం ఇంకోటుండదు.

కాకపోతే, వచ్చే ఎన్నికల్లో ప్రజల్ని ప్రాంతాల వారీగా విడదీసి, రాజకీయ లబ్ది పొందేందుకు ఖచ్చితంగా వైసీపీ ప్రయత్నిస్తుంది. అందుకు మూడు రాజధానులే అసలు సిసలు అస్త్రం వైసీపీకి. ఒక్క రాజధానికే దిక్కు లేదు.. మూడు రాజధానులెలా కడతారు.? అన్న ఇంగితం ప్రజలకైతే వుంది. పాలకులకు వుండొద్దూ.? ప్రజలకు సైతం ఆ ఇంగితం లేదనే భావనలో అధికారపక్షం వుండడం వల్లనే ఇదంతా జరుగుతోంది.

వర్షాకాల సమావేశాల్లో బిల్లు పెట్టి, ఆమోదించేసి.. ఏడాది కాలంలోనే మూడు రాజధానులు పూర్తి చేసేసి (?!) ఎన్నికలకు వెళ్ళాలని వైసీపీ అనుకుంటోందట.. అలాగని బులుగు మీడియా డబ్బా కొడుతోంది. నవ్విపోదురుగాక వాళ్ళకేటి సిగ్గు.?