నరేంద్ర మోడీ, కేసీయార్, వైఎస్ జగన్.! ఎవరెలా.? ఎవరికేంటి.?

ప్రధాన మంత్రి నరేంద్ర మోడీ తెలుగు రాష్ట్రాలకు వచ్చి వెళ్ళారు. భారతీయ జనతా పార్టీ జాతీయ కార్యవర్గ సమావేశాల కోసం హైద్రాబాద్ వచ్చిన ప్రధాని నరేంద్ర మోడీ, మన్యం వీరుడు అల్లూరి సీతారామరాజు విగ్రహావిష్కరణ కోసం భీమవరం వచ్చిన సంగతి తెలిసిందే.

సహజంగానే ప్రధాన మంత్రి నరేంద్ర మోడీ తెలుగు రాష్ట్రాల్లో పర్యటించిన అంశంపై రాజకీయ వర్గాల్లో చర్చోపచర్చలు జరుగుతాయి. ప్రధాన మంత్రి వస్తున్నారంటే, ఆయా రాష్ట్రాలు కేంద్రం నుంచి ఎంతో కొంత ఆశించడం సహజమే. మరి, ప్రధాన మంత్రి ఏం చేశారు.!

ఊరక రారు మహానుభావులని పెద్దలు చెబుతుంటారు. కానీ, మహానుభావులు ఊరకనే వచ్చి వెళుతుంటారు. అదే ఇప్పుడున్న రాజకీయం. బీజేపీ జాతీయ కార్యవర్గ సమావేశాల కోసమే ప్రధాని నరేంద్ర మోడీ హైద్రాబాద్ వచ్చి వుండొచ్చు. కానీ, తెలంగాణ ప్రజలు, ప్రధాని నరేంద్ర మోడీ నుంచి ఎంతో కొంత ఆశించడంలో తప్పేముంది.?

వచ్చారు, నాలుగు మాటలు చెప్పి వెళ్ళారు. మాటలతో రాష్ట్రానికి ప్రయోజనం ఏముంటుంది.? డబుల్ ఇంజిన్ సర్కారు.. అన్నారు ప్రధాని నరేంద్ర మోడీ. అసలు డబుల్ ఇంజిన్ సర్కార్.. అన్న వాదనలోనే అర్థం లేదు. ఎందుకంటే, రాష్ట్రాలు, దేశం.. సమాఖ్య స్ఫూర్తితో నడవాలి. దానికి తూట్లు పొడిచేలా వుంది డబుల్ ఇంజిన్ సర్కార్.. అనే ఆలోచన.

‘మేం అధికారంలో వుంటేనే, రాష్ట్రానికి సహకరిస్తాం..’ అన్న సంకేతాల్ని పరోక్షంగా బీజేపీ ఇస్తోంది. ప్రధాని తీరు సైతం ఇలాగే వుంది. ఇది ఓ రకంగా బ్లాక్‌మెయిలింగ్ రాజకీయమన్నది రాజకీయ విశ్లేషకుల వాదన.

ఇక, ప్రధాని పర్యటనను కేసీయార్ పట్టించుకోలేదు.. అసలంటూ ప్రధానికి ముఖ్యమంత్రి ఘన స్వాగతం పలికిందే లేదు. పైగా, కొన్ని ప్రశ్నల్ని ప్రధాని ముందుంచారు తెలంగాణ ముఖ్యమంత్రి కేసీయార్. ఆంధ్రప్రదేశ్ ముఖ్యమంత్రి తీరు వేరు. ఘన స్వాగతం పలికారు.. ‘మన ప్రధాని..’ అన్నారు. తిరిగి వెళ్ళేటప్పుడు, ప్రధానికి వినతుల చిట్టా అందించారు.

కేసీయార్ గౌరవించలేదని నరేంద్ర మోడీ తెలంగాణకు ఏమీ ఇవ్వకుండా వెళ్ళారా.? వైఎస్ జగన్ అమితంగా గౌరవించేశారని ప్రధాని నరేంద్ర మోడీ ఏపీకి ఏమైనా అదనంగా ఇచ్చేస్తారా.?