‘హ్యాపీ బర్త్ డే’లో పాత్రలన్నీ హీరోలే.. సర్రియల్ కామెడీ సినిమా: లావణ్య త్రిపాఠి

హీరోయిన్ లావణ్య త్రిపాఠి ప్రధాన పాత్రలో ‘మత్తువదలరా’ ఫేమ్ రితేష్ రానా దర్శకత్వంలో తెరకెక్కిన చిత్రం “హ్యాపీ బర్త్ డే”. రవిశంకర్ యలమంచిలి సమర్పణలో క్లాప్ ఎంటర్టైన్మెంట్, మైత్రీ మూవీ మేకర్స్ బ్యానర్స్ పై నవీన్ యెర్నేని, రవిశంకర్ చిరంజీవి (చెర్రీ), హేమలత పెదమల్లు నిర్మాణంలో సర్రియల్ యాక్షన్ కామెడీ ఎంటర్టైనర్ సినిమా తెరకెక్కింది. సినిమా జూలై 8న ప్రపంచవ్యాప్తంగా విడుదలవుతున్న సందర్భంగా లావణ్య త్రిపాఠి మీడియాతో “హ్యాపీ బర్త్ డే” చిత్ర విశేషాలను పంచుకున్నారు.

మొదటి సారి గన్ పట్టుకున్నా..

సినిమాలో మొదటి సారి గన్ పట్టుకున్నాను. 9 కేజీల బరవున్న గన్స్ క్యారీ చేయడం కష్టం అనిపించింది. మేకప్ కూడా. చాలా కొత్తగా అనిపించింది. కథ, కథనం అన్నీ కొత్తగా వుంటాయి. సహజంగానే జిమ్, బాక్సింగ్ చేయడంతో మొదటిసారి స్క్రీన్ పై యాక్షన్ చూపించే అవకాశం ‘హ్యాపీ బర్త్ డే’తో దక్కింది. సినిమా అద్భుతంగా వచ్చింది. ఖచ్చితంగా బ్లాక్ బస్టర్ అవుతుంది. హ్యాపీ అనే పాత్ర చేశాను. కథలో కీలకంగా వుంటుంది. ‘హ్యాపీ’ పాత్రలో పాత్రలో చాలా ఫన్ వుంది. ఫోర్స్ కామెడీ వుండదు. చాలా ఈజీగా చేశాను.

లీడ్ రోల్ నాదే..

దర్శకుడు రితేష్ రానా కథ చెప్పినపుడు చాలా నచ్చింది. కొత్త జోనర్. సర్రియల్ వరల్డ్ థాట్ ఎక్సయిట్ చేసింది. ఫీమేల్ ఓరియెంటెడ్ అంటే సీరియస్ గా వుండే పాత్రలే వస్తుంటాయి. కానీ ఇలాంటి లీడ్ రోల్ రావడం ఆనందంగా ఉంది. నన్ను దృష్టిలో పెట్టకునే హ్యాపీ పాత్రని రాశారు. ఈ విషయంలో లక్కీగా ఫీలౌతున్నా. మొదటి సినిమా అందాల రాక్షసిలో ది బెస్ట్ ఇవ్వడానికి ప్రయత్నించాను. తర్వాత చేసిన పాత్రలన్నీ కేక్ వాక్ లానే చేశాను. చాన్నాళ్ల తర్వాత ‘హ్యాపీ’ పాత్ర కొత్తగా అనిపించింది.

నెంబర్ వన్ అందరికీ సాధ్యం కాదు..

పదేళ్ళుగా ఇండస్ట్రీలో ఉండటం గొప్ప ఆనందం. నెంబర్ వన్ అందరికీ సాధ్యం కాదు. నా వర్క్ ని ఎంజాయ్ చేస్తున్నాను. మనసుకు నచ్చిన పాత్రలు చేస్తున్నాను. నా ప్రయాణం సంతృప్తికరంగా వుంది. కథల ఎంపికలో కొంచెం పర్టిక్యులర్ గా వుంటాను. నటిగా బలమైన పాత్రలు చేయాలని సెలక్టివ్ గా వెళ్లడంతో సినిమాలు తగ్గించినట్లు అనిపించవచ్చు. భవిష్యత్తులో ఇలాంటి పాత్రలే చేయాలని అలోచించను. కానీ.. నాకు యాక్షన్ సినిమాలు చేయడం ఇష్టం. ప్రస్తుతం తమిళ్ లో అథర్వ తో ఓ సినిమా చేస్తున్నా. దాదాపు పూర్తయింది.

యూనిక్ కథ..

హ్యాపీ బర్త్ డే సర్రియల్ ప్రపంచంలో జరుగుతుంది. ఎలాంటి హద్దులు వుండవు. ఇది ఎలా సాధ్యం అనే ప్రశ్న వుండదు. అది ఊహజనితం. సినిమాలో ఇది యునిక్ గా వుంటుంది. క్లాప్ ఎంటర్టైన్మెంట్, మైత్రీ మూవీ మేకర్స్ బ్యానర్స్ తో కలసి పనిచేయడం ఆనందంగా వుంది. చెర్రీ గారు అద్భుతమైన నిర్మాత. సినిమా నిర్మాణంలో ఎక్కడా రాజీపడలేదు. హ్యాపీ బర్త్ డేని భారీ నిర్మాణ విలువలతో తెరకెక్కించారు. హ్యాపీ బర్త్ డేలో పాత్రలన్నీ హీరోలే. క్యారెక్టర్ బేస్డ్ కథ ఇది.