వీడిన మిస్టరీ..! సుబ్రహ్మణ్యం హత్య కేసులో ఎమ్మెల్సీ పాత్ర ఇదే: కాకినాడ ఎస్పీ

రాష్ట్రంలో సంచలనం రేపిన డ్రైవర్ సుబ్రహ్మణ్యం హత్య మిస్టరీ వీడింది. కేసు వివరాలను కాకినాడ ఎస్పీ రవీంద్రనాధ్ మీడియాకు వివరించారు. ‘సుబ్రహ్మణ్యం మృతిపై అతని తల్లి ఫిర్యాదు మేరకు మొదట అనుమానాస్పద కేసు నమోదు చేశాం. అనంతరం బంధువుల వాంగ్మూలం మేరకు హత్య కేసుగా నమోదు చేశాం. దర్యాప్తులో లభించిన ఆధారాలు, వాంగ్మూలాల ఆధారంగా ఎమ్మెల్సీ అనంతబాబును అరెస్టు చేశాం. జీజీహెచ్ తీసుకెళ్లి వైద్య పరీక్షలు నిర్వహించాం. ఆరు బృందాలుగా గాలించి ఈరోజు అనంతబాబును కస్టడీలోకి తీసుకున్నాం’ అని తెలిపారు.

పోలీసులు తెలిపిన వివరాల ప్రకారం..

‘ఈనెల 19న సుబ్రహ్మణ్యం హత్యకు గురయ్యాడు. ఆరోజు రాత్రి 8గంటల సమయంలో ఇంటి నుంచి బయటకు వెళ్లి స్నేహితులతో కలిసి మద్యం సేవించారు. 10గంటల సమయంలో రోడ్డుపైకి వస్తున్న సమయంలో అనంతబాబు అక్కడికి వచ్చి సుబ్రహ్మణ్యంను కారులో తీసుకెళ్లాడు. ఇద్దరూ కలిసి టిఫిన్ తీసుకుని అనంతబాబు ఇంటి సమీపంలోకి వెళ్లారు. సుబ్రహ్మణ్యం పెళ్లికి అనంతబాబు చేసిన ఆర్ధికసాయం విషయంలో ఇద్దరి మధ్యా చర్చ జరిగింది. అప్పటికే సుబ్రహ్మణ్యం కొంత చెల్లించి ఉన్నాడు. నువ్వింకా తాగుతూనే ఉన్నావ్. నిన్ను పనిలోకి తీసుకోవాలని మీ అమ్మ అడుగుతోంది. నీలో ఎలాంటి మార్పూ రాలేదు. ఇద్దరి మధ్య వాగ్వాదం జరగడం.. సుబ్రహ్మణ్యంను అనంతబాబు కొట్టడం జరిగింది’.

‘ఎదురు ప్రశ్నించిన సుబ్రహ్మణ్యంను కోపంతో అనంతబాబు మెడపట్టి పక్కకు తోశాడు. దీంతో పక్కనే డ్రైనేజీ గట్టుపై పడ్డ సుబ్రహ్మణ్యం తలకు గట్టి దెబ్బ తగిలింది. మరోసారి సుబ్రహ్మణ్యం ఎదురు తిరగడంతో మళ్లీ తోయడంతో సుబ్రహ్మణ్యం తలకు మరోసారి గట్టి దెబ్బ తగిలింది. దీంతో ఆసుపత్రికి తీసుకెళ్లాలని భావించినా అప్పటికే సుబ్రహ్మణ్యంకు వెక్కిళ్లు రావడంతో తాగేందుకు నీరు ఇచ్చాడు. అయితే.. కొద్దిసేపటికే సుబ్రహ్మణ్యం మృతి చెందాడు. గతంలో అనంతబాబు వద్ద పని చేసేటప్పుడు సుబ్రహ్మణ్యం అనేకసార్లు యాక్సిడెంట్ చేసిన ఘటనలు ఉన్నాయి. దీని ఆధారంగా హత్యను యాక్సిడెంట్ గా చిత్రీకరించాలని భావించాడు. రోడ్డు మీద కుదరకపోవడంతో సమీపంలోని డంపింగ్ యార్డుకు తీసుకెళ్లి అందుబాటులో ఉన్న తాళ్లు, కర్రలతో సుబ్రహ్మణ్యం ఒంటిపై బలమైన గాయాలయ్యేలా చేశారు’.

‘అర్ధరాత్రి 12.30 సమయంలో సుబ్రహ్మణ్యం తల్లికి ఫోన్ చేసి “సుబ్బుకు యాక్సిడెంట్ అయినట్టు నాకు ఫోన్ వచ్చింది. ఆసుపత్రికి తీసుకెళ్తున్నాను. అక్కడికి రండి” అని అనంతబాబు చెప్పారు. అప్పటికే వైద్యులు మృతి చెందినట్టు ధ్రువీకరించడంతో కారులోనే మృతదేహాన్ని తీసుకెళ్లి వారి ఇంటి వద్ద వదిలేశారు. అయితే.. గాయాలు యాక్సిడెంట్ లా లేవని కుటుంబసభ్యులు అనుమానం వ్యక్తం చేయడంతో సుమారు గంటకు పైగా వీరి మధ్య వాదనలు జరిగాయి. ఉదయం 4గంటలకు సుబ్రహ్మణ్యం తల్లిదండ్రులు పోలీసులకు ఫిర్యాదు చేశారు. ఇవన్నీ ప్రాధమిక దర్యాప్తు ద్వారా నిర్ధారణకు వచ్చిన వివరాలు’ అని ఎస్పీ తెలిపారు.

నిందితుడు అనంతబాబును భారీ బందోబస్తు మధ్య కాకినాడ ఏఆర్ కార్యాలయం నుంచి జీజీహెచ్ కు తరలించి వైద్య పరీక్షలు నిర్వహించారు. అనంతరం అనంతబాబును మేజిస్ట్రేట్ ముందు హాజరుపరిచారు.