ఫాఫం.. జనసేనపై తెలుగుదేశం పార్టీ వన్ సైడ్ లవ్ స్టోరీ.!

నవ్విపోదురుగాక మనకేటి.? అన్నట్టుంది ప్రతిపక్షం తెలుగుదేశం పార్టీ తీరు. తనంతట తానుగా ఎదగడం.. అనే రాజకీయ సూత్రాన్ని తెలుగుదేశం పార్టీ ఏనాడో మర్చిపోయింది. రాజకీయ ప్రత్యర్థుల్ని దెబ్బకొడితే సరిపోతుందన్న దిక్కుమాలిన సూత్రానికే పరిమితమైపోయి.. కాలగర్భంలో కలిసిపోయే దుస్థితిని స్వయానా కొనితెచ్చుకుంది.

పోనీ, ప్రధాన ప్రత్యర్థి వైఎస్సార్ కాంగ్రెస్ పార్టీని దెబ్బ తీయడానికి పదునైన రాజకీయ వ్యూహాలేమైనా టీడీపీ అధినేత చంద్రబాబు అమలు చేస్తున్నారా.? అంటే, అదీ లేదు. జనసేన పార్టీ మీద పడుతున్నారు చంద్రబాబు. ఈసారి ‘వన్ సైడ్ లవ్ స్టోరీ..’ అంటూ చెత్త పొలిటికల్ స్కెచ్ అమల్లో పెడుతున్నారు టీడీపీ అధినేత.

చంద్రబాబు తాజాగా చిత్తూరు జిల్లాలో సొంత నియోజకవర్గంలో పర్యటించారు. ఈ క్రమంలో ఓ కార్యకర్త, జనసేనతో పొత్తు పెట్టుకుందామంటూ చంద్రబాబుకి సూచించాడు. దానికి చంద్రబాబు ముసి ముసి నవ్వులు నవ్వుతూ, ‘వన్ సైడ్ లవ్ స్టోరీ..’ అంశాన్ని తెరపైకి తెచ్చారు. ‘ప్రేమ రెండు వైపుల నుంచీ వుంటేనే వర్కవుట్ అవుతుంది..’ అంటూ చిత్ర విచిత్రమైన రాజకీయ ప్రేమకథని వినిపించారు.

ఆంధ్రప్రదేశ్ ప్రజలు అమాయకులన్న భావనలో చంద్రబాబు వున్నారు. కానీ, ఆ జనమే.. ‘ఫాఫం చంద్రబాబు..’ అని జాలి పడుతున్నారు చంద్రబాబు చెత్త రాజకీయాలు చూసి. బోల్డంత రాజకీయ అనుభవం వున్న చంద్రబాబు ఇంతలా ఎలా దిగజారిపోయారన్నది వారి అంతరంగం.

జనసేన పార్టీని దెబ్బ కొడితే, రాష్ట్రంలో మూడో ప్రత్యామ్నాయం వుండదన్నది చంద్రబాబు అతి తెలివి. కానీ, చంద్రబాబుకి ఇక్కడ అర్థం కావాల్సింది ఇంకోటుంది. అదేంటంటే, టీడీపీనే మూడో స్థానానికి రాష్ట్ర ప్రజలు నెట్టేశారు. అది ఆలస్యంగా అర్థమవడం వల్లే చంద్రబాబు ముందుగా జనసేనను దెబ్బకొట్టడానికి వన్ సైడ్ లవ్ స్టోరీని తెరపైకి తెచ్చారా.?

నిస్సిగ్గుగా, వన్ సైడ్ లవ్ స్టోరీ.. అంటూ జనసేనపై ప్రేమ కురిపించేందుకు టీడీపీ చేస్తున్న ప్రయత్నాన్ని రాజకీయ వ్యభిచారం అనాలా.? ఇంకేమైనా అనాలా.?