ఏపీ సీఎం వైఎస్ జగన్ ఢిల్లీకి వెళ్ళి ఏం సాధించినట్టు.?

ముఖ్యమంత్రి వైఎస్ జగన్ మోహన్ రెడ్డి ఢిల్లీకి వెళ్ళి వచ్చారు. తప్పేముంది.. రాష్ట్ర ముఖ్యమంత్రి హోదాలో దేశ రాజధాని ఢిల్లీకి వెళ్ళి ప్రధానమంత్రి నరేంద్ర మోడీ, ఆర్థిక మంత్రి నిర్మలా సీతారామన్ సహా మరికొందరు కేంద్ర మంత్రుల్ని కలిసి, రాష్ట్ర సమస్యలపై వైఎస్ జగన్ మోహన్ రెడ్డి చర్చిస్తే, తప్పు పట్టడానికేమీ లేదు.

కానీ, ముఖ్యమంత్రి వైఎస్ జగన్.. రాష్ట్ర సమస్యల పరిష్కారం కోసం పలుమార్లు ఢిల్లీకి వెళ్ళి ఉత్త చేతులతో తిరిగొచ్చారు. ఇప్పుడూ అదే జరిగిందా.? అన్నదే అసలు ప్రశ్న. ప్రత్యేక హోదాతో మొదలు పెడితే, పాత వ్యవహారాలే పదుల సంఖ్యలో వుంటాయి. వేటికీ ఇంతవరకు పరిష్కారం దొరకలేదు, సమీప భవిష్యత్తులో దొరికే అవకాశమూ లేదు.

చంద్రబాబు ముఖ్యమంత్రిగా వున్నప్పుడూ ఇదే సమస్య. చిన్న తేడా ఏంటంటే, చంద్రబాబుతోపాటు పలువురు కేంద్ర మంత్రులు అప్పట్లో మీడియా ముందుకొచ్చి, నాలుగు మాటలు మాట్లాడేవారు.. చేతల్లో కేంద్రం నుంచి రాష్ట్రానికి సాయం ఏమీ లేకపోయినా.

ఇక, అప్పట్లో.. అంటే, వెంకయ్యనాయుడు కేంద్ర మంత్రిగా వున్న సమయంలో రాష్ట్రానికి ఎప్పుడూ ఏదో ఒక ప్రాజెక్టు వస్తూ వుండేది. అది టీడీపీ ఘనత కింద వెయ్యాలా.? బీజేపీ ఖాతాలో వెయ్యాలా.? అన్నది వేరే చర్చ.

గడచిన రెండున్నరేళ్ళలో అయితే, రాష్ట్రం తరఫున కేంద్రానికి వినతులు వెళుతున్నాయి తప్ప, అట్నుంచి సానుకూలమైన కబురు రావడంలేదు ఏ విషయంలోనూ. ఢిల్లీకి వైఎస్ జగన్ వెళితే చాలు, వైసీపీ మద్దతుదారులు సోషల్ మీడియాలో బీభత్సమైన ఎలివేషన్లు ఇచ్చేస్తున్నారు.. టీడీపీ మద్దతుదారులు నానా రకాల సెటైర్లూ వేస్తున్నారు.

వైఎస్ జగన్ ఢిల్లీకి వెళ్ళడమంటే చంద్రబాబు వెన్నులో వణుకు పుట్టడమే.. అంటారు వైసీపీ మద్దతుదారులు. వైఎస్ జగన్ మోహన్ రెడ్డికి వెన్నులో వణుకు పుట్టిన ప్రతిసారీ ఢిల్లీకి వెళుతుంటారన్నది టీడీపీ మద్దతుదారుల వాదన. అంతే తప్ప, రాష్ట్రం కోసం రాష్ట్ర ముఖ్యమంత్రి ఢిల్లీకి వెళుతున్నారన్న చర్చే జరగదు.

‘ఢిల్లీకి వచ్చిన విషయమిది.. అక్కడ పరిష్కారమైన సమస్య ఇదీ..’ అని ముఖ్యమంత్రి చెప్పుకోలేని పరిస్థితి రావడాన్ని ఏమనుకోవాలి.?