జస్ట్ ఆస్కింగ్: తెలుగు నాట ఆ ప్రాజెక్టులు ఎంత భద్రం.?

అన్నమయ్య ప్రాజెక్టు కొట్టుకుపోయింది.. తప్పు నీదంటే, నీదంటూ అధికార వైసీపీ, ప్రతిపక్షం తెలుగుదేశం పార్టీ ఒకరి మీద ఒకరు దుమ్మెత్తిపోసుకుంటోన్న విషయం విదితమే. ‘అప్పుడు మీరేం చేశారు.?’ అన్న ప్రశ్న అధికార వైసీపీ నుంచి తెరపైకొస్తోందంటే, మీరు నిర్లక్ష్యం చేశారు కాబట్టి.. అదే నిర్లక్ష్యాన్ని మేమూ కొనసాగిస్తున్నాం.. అన్నట్టుంది తప్ప, బాధ్యత కనిపించడంలేదు.

సరే, అన్నమయ్య ప్రాజెక్టు అనేది చాలా చిన్నది.. పోలవరం ప్రాజెక్టుతో పోల్చి చూసినప్పుడు. పోలవరం ప్రాజెక్టుకి ఆ మధ్య భారీ వరద వస్తే, డయాఫ్రమ్ వాల్ కొంత భాగం దెబ్బ తినేసిందని సాక్షాత్తూ జల వనరుల శాఖ మంత్రి అనిల్ కుమార్ యాదవ్ చెబుతున్న విషయం విదితమే.

ఇంతకీ, పోలవరం ప్రాజెక్టు ఎంత భద్రం.? పోలవరం ప్రాజెక్టుకి ప్రతి యేటా కనీ వినీ ఎరుగని స్థాయిలో వరద వచ్చి చేరుతుంటుంది. ఇది అందరికీ తెలిసిన విషయమే. ప్రస్తుతానికి పోలవరం ప్రాజెక్టు ఇంకా పూర్తి కాలేదు. ఆ ప్రాజెక్టుకి దిగువన కాటన్ బ్యారేజీ వుంది. దాంట్లో నీటి నిల్వ చాలా చాలా తక్కువ. వచ్చిన వరదని వచ్చినట్లుగా కిందికి వదిలేయడం తప్ప మరో మార్గం లేదు. రికార్డు స్థాయిలో వరద నీటిని కిందికి వదిలేసే అవకాశం కాటన్ బ్యారేజీకి వుంది.

పోలవరం ప్రాజెక్టుకి నిల్వ సామర్థ్యమెక్కువ. మరి, అంతలా నీటిని నిల్వ చేశాక.. రికార్డు స్థాయిలో వరద వస్తే పరిస్థితి ఏంటి.? ఇదే ఇప్పుడు అందరి మెదళ్ళనూ తొలుస్తోన్న ప్రశ్న. గోదావరి నదిపై పరిస్థితి ఇలా వుంటే, కృష్ణా నదిపై ప్రధాన ప్రాజెక్టులైన శ్రీశైలం, నాగార్జున సాగర్, పులిచింతల ప్రాజెక్టుల భద్రతపైనా అనుమానాలు వ్యక్తమవుతున్నాయి. ప్రకాశం బ్యారేజీ సంగతి సరే సరి.

మొన్నామధ్య పులివెందుల ప్రాజెక్టు గేటు కొట్టుకుపోయింది.. చాలా నీరు వృధాగా పోయింది. కొన్నాళ్ళ క్రితం ప్రకాశం బ్యారేజీలోని ఓ గేటుకి పడవ అడ్డుపడింది. గేటు మూసే పరిస్థతి లేకుండా పోయింది. ఇవన్నీ వైసీపీ హయాంలో జరిగిన ఘనకార్యాలే.

వందల వేల మంది కాదు, లక్షలాది మంది ప్రజల జీవితాలు ఆధారపడి వున్నాయి ఈ ప్రాజెక్టుల మీద. ఏ చిన్న తేడా వచ్చినా, ఆస్తి నష్టం సంగతి దేవుడెరుగు.. ప్రాణ నష్టం కనీ వినీ ఎరుగని స్థాయిలో వుంటుంది. తస్మాత్ జాగ్రత్త.!