39 మందిని పెళ్లి చేసుకున్న వ్యక్తి .. ఆయన గురించి ప్రతి ఒక్కరు తెలుసుకోవాల్సిందే..

ఒక్క భార్యను భరించడమే కష్టంరా బాబూ అని ఫీలయ్యే మగమహారాజులందరూ 66 ఏళ్ల జియోనా చానా అనే వ్యక్తిని చూస్తే ఏమనుకుంటారో? ఎందుకంటే ఆయన ఒక్కరిని కాదు.. ఏకంగా 39 మందిని పెళ్లి చేసుకుని ఎలాంటి చీకూ చింతా లేకుండా ఒకే ఇంట్లో ఉంటున్నాడు. అంతేకాదండోయ్.. అవకాశం ఉంటే మళ్లీ పెళ్లి చేసుకోవడానికి రెడీ అంట. ఇలా పెళ్లిళ్లు చేసుకోవడానికి ఎంతవరకూ అయినా వెళతానంటున్నాడు. మిజోరంలోని ఓ కుగ్రామానికి చెందిన జియోనా కుటుంబం ఓ చిన్న సైజంత అపార్ట్ మెంటంత ఉంటుంది.

39 మంది భార్యలు, 66 మంది పిల్లలు, 33 మంది మనవలతో కలిసి వంద గదులున్న మూడంతస్తుల భవనంలో నివసిస్తున్నాడు. కోడళ్లతో కలిసి ఆ కుటుంబంలో మొత్తం 181 మంది ఉన్నారు. జియోనా 17 ఏళ్ల వయసులో తన కంటే మూడేళ్ల చిన్నగా ఉన్న ఓ అమ్మాయిని మనువాడాడు. ఇక అప్పటి నుంచి ఎవరో ఒకరిని పెళ్లాడుతూ కుటుంబాన్ని భారీ నుంచి అతి భారీ స్థాయికి తీసుకెళ్లాడు. ఓ ఏడాది అయితే ఏకంగా 10 మందిని పెళ్లి చేసుకున్నానని గర్వంగా చెబుతాడు.

అన్నట్టు మనోడి చుట్టూ ఎప్పుడూ ఏడుగురు లేక ఎనిమిది మంది పెళ్లాలు ఉండాల్సిందేనంట. ఈయనకు ఓ ప్రైవేటు బెడ్ రూం ఉంటుంది. దాని సమీపంలోనే ఏర్పాటు చేసిన డార్మెటరీల్లో ఈయన భార్యలు ఉంటారు. మరి ఇంత పెద్ద కుటుంబం గడవాలంటే అందరూ పని చేయాల్సిందే. ఉదయం లేవగానే భార్యలు వంట మొదలుపెడతారు. కూతుళ్లు, కోడళ్లు ఇంటి పని చూస్తారు. మగాళ్లంతా బయటకెళ్లి పనులు చేసి డబ్బులు సంపాదించి తెస్తుంటారు.

మొత్తమ్మీద ఈ కుటుంబానికి రోజుకు దాదాపు 90 కిలోల బియ్యం, 60 కిలోల బంగాళాదుంపలు అవసరం. ఇంత పెద్ద కుటుంబాన్ని నెట్టుకొస్తున్న జియోనాకి అప్పుడప్పుడు కొంతమంది విరాళాలు ఇస్తుంటారు. ఇంతమంది భార్యలు, పిల్లలు, మనవలు కలిగి ఉన్న తాను చాలా అదృష్టవంతుడినని, తనను చూసుకోవడానికి ఇంత మంది ఉన్నారని జియోనా కాలరెగరేసి మరీ చెబుతాడు. అంతకాదు.. ఇప్పుడు కూడా ఎవరైనా పిల్లను ఇస్తానంటే పెళ్లి చేసుకోవడానికి రెడీగా ఉన్నానని చెబుతున్నాడు. ఇలాంటి జియోనా గురించి తెలుసుకున్నవారంతా.. ‘ఆడు మగాడ్రా బుజ్జే’ అనకుండా ఉండలేరు కదా?