వైసీపీలో ఆ చిడతల మొక్క ఎవరబ్బా.?

సోషల్ మీడియా వేదికగా టీడీపీ వర్సెస్ వైసీపీ.. ట్వీట్ల యుద్ధం జరుగుతోంది. వైసీపీ ఎంపీ (రాజ్యసభ) విజయసాయిరెడ్డి, మాజీ మంత్రి నారా లోకేష్‌ని ఉద్దేశించి ‘బోకేష్..’ అని సంబోదిస్తోంటే, ముఖ్యమంత్రి వైఎస్ జగన్ మోహన్ రెడ్డిని ఉద్దేశించి నారా లోకేష్ ఏకంగా ‘బెయిల్ రెడ్డి’ అంటున్నారు. ‘జగ్గడు’ అంటూ ఎద్దేవా చేస్తున్నారు.

ఈ సందడి ఇలా సాగుతోంటే, ఇంకోపక్క టీడీపీ సీనియర్ నేత, మాజీ మంత్రి చింతకాయల అయ్యన్న పాత్రుడు అలాగే వైసీపీ నేత, మంత్రి అంబటి రాంబాబు మధ్య కూడా ట్వీట్ల యుద్ధం కొనసాగుతోంది. ‘తొడకొట్టే వాణులకు తప్ప దివ్యవాణులకు తావు లేదక్కడ..’ అంటూ అంబటి రాంబాబు ట్వీటేశారు.

‘మహిళలకు సంబంధించిన మేటర్ అయితే, ఎగేసుకుంటూ వచ్చేస్తావ్..’ అంటూ అంబటి రాంబాబుపై టీడీపీ సోషల్ మీడియా విభాగం కౌంటర్ ఎటాక్‌కి దిగింది. అదే సమయంలో, ‘చిడతల మొక్కకి తప్ప పాదయాత్ర చేసిన షర్మిలకి చోటు లేదక్కడ.!’ అంటూ అయ్యన పాత్రుడు, అంబటి రాంబాబుపై చేసిన కౌంటర్ ఎటాక్ ట్వీట్ వైరల్ అవుతోంది.

ఇంతకీ, చిడతల మొక్క ఎవరిక్కడ.? ఈ అంశంపై సోషల్ మీడియాలో నడుస్తున్న యాగీ అంతా ఇంతా కాధు. ఆ చిడతల మొక్క ఎవరు.? అన్న విషయాన్ని పక్కన పెడితే, వైఎస్ జగన్ మోహన్ రెడ్డి రాజకీయ భవిష్యత్తు కోసం వైఎస్ షర్మిల పడ్డ కష్టం అందరికీ తెలిసిందే. ఆమెను పార్టీ నుంచి బయటకు పంపేయడం, తల్లిని సైత వైఎస్ జగన్ దూరం చేసుకున్నారన్న విమర్శలు రావడం.. ఈ అంశాలన్నీ అధికార పార్టీకి తలనొప్పిగా మారాయ్.

‘వైఎస్ వివేకానందరెడ్డి కుమార్తె సునీత సంగతేంటి.? ఎన్నికలకు ముందు బాబాయ్ హత్య కేసుని వాడుకున్నావ్.. బాబాయ్ కుమార్తె సునీతా రెడ్డిని ఢిల్లీదాకా తిప్పావ్.. సొంత చెల్లెల్ని ఎన్నికల్లో తిప్పావ్.. తల్లినీ తిప్పావ్.. వాళ్ళంతా ఇప్పుడు ఎక్కడ.?’ అని టీడీపీ శ్రేణులు వైసీపీ అధినేత వైఎస్ జగన్ మోహన్ రెడ్డిని ప్రశ్నిస్తున్నాయి.

మరోపక్క, చింతకాయల అయ్యన్నపాత్రుడు.. ముఖ్యమంత్రి వైఎస్ జగన్ మోహన్ రెడ్డిని తిట్టిన తిట్ల వ్యవహారాన్ని వీడియో రూపంలో సోషల్ మీడియాలో విజయసాయిరెడ్డి పోస్ట్ చేశారు. అదంతా అయ్యన్న మీద కోపం ప్రదర్శిస్తున్నట్టు లేదు, వైఎస్ జగన్ మోహన్ రెడ్డిని విజయసాయిరెడ్డి ర్యాగింగ్ చేస్తున్నట్టుంది.

ఇంతకీ, వైసీపీలో చిడతల మొక్క ఎవరబ్బా.? సమాధానం అందరికీ తెలిసిందే.!