ఏబీవీ కేసులో వైసీపీ ఏం సాధించింది.? ఖచ్చు దండగ వ్యవహారమే.!

‘ఔను, ఇది ముమ్మాటికీ ఖర్చు దండగ వ్యవహారమే.! లేని వివాదాన్ని వున్నట్టు చూపి, ప్రజా ధనాన్ని కోర్టు కేసుల పేరుతో దుర్వినియోగం చేశారు..’ అంటూ సీనియర్ ఐపీఎస్ అధికారి ఏబీ వెంకటేశ్వరరావు మొన్నామధ్య సుప్రీంకోర్టులో తనకు అనుకూలంగా తీర్పు వచ్చాక చేసిన వ్యాఖ్యల్ని ఎలా మర్చిపోగలం.?

తమ పార్టీ ప్రచారం కోసం, ప్రభుత్వ కార్యాలయాలకు వైసీపీ జెండా రంగులేయించిందది వైసీపీ సర్కారు. ఆ రంగుల్ని తొలగించడానికి మళ్ళీ అదనంగా ఖర్చు చేయాల్సి వచ్చింది. చేస్తున్న పనులన్నీ వంకర టింకర పనులే. మూడు రాజధానుల పేరుతో, అసలు రాజధానిని అయోమయంలోకి నెట్టేయడం ద్వారా వైసీపీ సర్కారు, రాష్ట్రానికి చేసిన నష్టం అంతా ఇంతా కాదు.

ఒకవేళ అమరావతి గత మూడేళ్ళలో ఓ చిన్న పట్టణంగా అయినా అభివృద్ధి చెంది వుంటే, తద్వారా రాష్ట్రానికి వచ్చే ఆదాయం వేల కోట్లలోనే వుండేది. చెప్పుకుంటూ పోతే, ఇలాంటివి చాలానే వున్నాయ్.!

ఏబీ వెంకటేశ్వరరావు కేసు విషయానికొస్తే, చంద్రబాబు హయాంలో ఇంటెలిజెన్స్ విభాగం అధిపతిగా పనిచేశారాయన. అప్పట్లో ఉద్యోగ బాధ్యతలు నిర్వహించడాన్ని పక్కన పెట్టి, అప్పటి అధికార తెలుగుదేశం పార్టీ కోసం ఆయన పనిచేశారన్న విమర్శలు వైసీపీ చేసింది. ఈ నేపథ్యంలోనే తాము అధికారంలోకి వస్తూనే, ఏబీ వెంకటేశ్వరరావుపై కేసులు పెట్టి, సస్పెండ్ చేయించింది కూడా.

ఇక, అక్కడి నుంచి అసలు కథ మొదలైంది. ఏబీ వెంకటేశ్వరరావుపై సస్పెన్షన్ వేటు చెల్లదన్న అభిప్రాయాలు అప్పట్లోనే న్యాయ నిపుణులు వ్యక్తం చేశారు. ‘ప్రజా ధనం దుర్వినియోగమవడం తప్ప, ఈ కేసులో ఏబీ వెంకటేశ్వరరావుకి వచ్చే నష్టమేమీ లేదు’ అని న్యాయ నిపుణులు అప్పుడే చెప్పారు.

అదే జరిగిందిప్పుడు. సర్వోన్నత న్యాయస్థానం సస్పెన్షన్ ఎత్తివేస్తూ ఆదేశాలు ఇస్తే, పోస్టింగ్ కోసం కొన్నాళ్ళుగా ఆయన తన ప్రయత్నాలు చేశారు. చివరికి ఇక్కడా ఏబీ వెంకటేశ్వరరావుకి సూపర్ విక్టరీనే లభించింది. ప్రభుత్వ పెద్దల అహం ఏమయ్యిందిక్కడ.? దాని ఖరీదెంత.? రాష్ట్ర ఖజానాకి ఈ వివాదంతో ఏర్పడ్డ నష్టమెంత.?

ఈ అంశాలపై ఇప్పుడు సర్వత్రా చర్చ జరుగుతోంది. జనబాహుళ్యంలో ఇలాంటి అంశాలపైనే లోతైన చర్చ జరగాలి. ఎందుకంటే, ఖర్చవుతున్నది ప్రజాధనం.!