బులుగు ఆవేదన: గడప గడపకీ చీవాట్లు.!

‘కాలర్ ఎగరేసుకుని మరీ జనంలోకి వెళ్ళి చెప్పండి.. సంక్షేమ పథకాలు ఘనంగా అమలు చేస్తున్నామని..’ అంటూ ఆంధ్రప్రదేశ్ ముఖ్యమంత్రి, వైఎస్సార్ కాంగ్రెస్ పార్టీ అధినేత వైఎస్ జగన్ మోహన్ రెడ్డి, తమ పార్టీకి చెందిన ప్రజా ప్రతినిథులకు మొన్నామధ్యన క్లాస్ తీసుకున్నారు.

‘గడప గడపకీ మన ప్రభుత్వం’ పేరుతో వైసీపీ ఘనంగా ఓ పబ్లిసిటీ స్టంట్ షురూ చేసింది. అధినేత మాటని కాదనగలరా.? ఎదురు చెప్పగలరా.? వెళితే ఏమవుతుందో తెలిసీ, ఏమీ చేయలేని దుస్థితి వైసీపీ ప్రజా ప్రతినిథులది. వెళుతున్నారు జనంలోకి, చీవాట్లు తింటున్నారు కూడా.

అరువు తెచ్చుకున్న ‘పెయిడ్ ఆర్టిస్టుల’ కారణంగా బీభత్సమైన భజన జరుగుతున్నా, సాధారణ ప్రజానీకం నుంచి నిలదీతలు తప్పడంలేదు. గడప గడపకీ నిలదీతలే. మంత్రుల, మాజీ మంత్రులు, ఎమ్మెల్యేలు, ఎంపీలు.. ఇలా అందరిదీ దాదాపు అదే పరిస్థితి.

‘పెన్షన్లు ఎవరిస్తున్నారు.?’ అని ప్రశ్నిస్తే, ‘వాలంటీర్ తెచ్చి ఇస్తున్నారు..’ అంటున్నారు జనం. ‘జగనన్న ఇచ్చారని చెప్పండి..’ అంటోంటే, ‘జగన్ ఏంటి.? చంద్రబాబు ఏంటి.? అప్పులు చేసి కదా, మాకు పంచుతున్నది.. మీరెంత తినేస్తున్నారు.?’ అంటూ జనం నిలదీస్తున్నారు.

అంతేనా, ‘నువ్వే మా భూమిని కబ్జా చేశావ్..’ అంటూ ఓ ఎమ్మెల్యేని ఓ చోట నిలదీస్తే, ‘కరెంటు ఛార్జీలు ఎందుకు పెంచావ్.?’ అని మరో ఎమ్మెల్యేని ఇంకో చోట నిలదీస్తున్న పరిస్థితి కన్పిస్తోంది. ‘ఉక్రెయిన్’ యుద్ధానికీ, కరెంటు ఛార్జీలకీ లింకులు పెడుతున్నారు కొందరు వైసీపీ ప్రజా ప్రతినిథులు అతి తెలివిగా.

చెత్త పన్ను ఏంటి.. చెత్త రాజకీయం కాకపోతే.? అంటూ, కొందరు జనం చిత్తు చిత్తుగా వైసీపీ ప్రజా ప్రతినిథుల్ని నిలదీస్తున్నారు. ఇంతలా నిలదీతలు ఎదురవుతోంటే, పాపం వైసీపీ ప్రజా ప్రతినిథులు మాత్రం ఎంతవరకు భరించగలరు.? భరించలేక మాట మీద అదుపు కోల్పోతున్నారు. జనాన్ని తిడుతున్నారు. ‘అరెస్టు చేసెయ్యండి వాడ్ని..’ అంటూ పోలీసుల్ని ఆదేశిస్తున్నారు కూడా.

అధినేత వైఎస్ జగన్, తాడేపల్లి గడప దాటడంలేదాయె.. జనంలోకి వెళితే, రోడ్లకు ఇరువైపులా పరదాలు వుండాలాయె. కానీ, తమకేంటి ఈ దుస్థితి.? అని వైసీపీ ప్రజా ప్రతినిథులు నెత్తీ నోరూ బాదుకుంటున్నారు.. అదీ తెరవెనుకే సుమండీ.!