‘ఘన’కార్యం చేశారు కదా.! ఘన స్వాగతం పలకాల్సిందే.!

హిందూపురం ఎంపీ, వైసీపీ నేత గోరంట్ల మాధవ్ కోసం సొంత నియోజకవర్గంలో అభిమానులు (?!) భారీ ఏర్పాట్లు చేశారట. వందలాది కార్లు ఆయనకు ఘన స్వాగతం పలకనున్నాయట. వేలాది మంది కార్యకర్తలు, అభిమానులు ఆయనకి స్వాగతం పలికేందుకు సిద్ధంగా వున్నారట. భారీ స్థాయిలో ఫ్లెక్సీలు, హోర్డింగులు, గజ మాలలూ.. అబ్బో, ఆ కిక్కే వేరప్పా.. అంటూ గోరంట్ల అభిమానులు నానా యాగీ చేస్తున్నారు.

గోరంట్ల మాధవ్ ఏమైనా, రాష్ట్రానికి ప్రత్యేక హోదా తీసుకొస్తున్నారా.? గోరంట్ల మాధవ్ ఏమైనా హిందూపురం నియోజకవర్గానికి ఏదన్నా జాతీయ సంస్థను తీసుకొస్తున్నారా.? ఓ మెడికల్ కాలేజ్ లేదా ఓ ఇంజనీరింగ్ కాలేజీ.. లేదంటే, స్టేడియం లాంటిదేదైనా కేంద్రాన్ని ఒప్పించి తెచ్చారా.?

ప్చ్.. ఏమీ లేదు. జస్ట్ ఆయన ఇటీవల ఓ ఘనకార్యం చేశారు. అదీ, టీడీపీ అను‘కుల’ మీడియాని బూతులు తిట్టారు. కమ్మ సామాజిక వర్గాన్ని తూలనాడారు. అన్నిటికీ మించి, ఓ న్యూడ్ వీడియో కాల్ వివాదంలో ఇరుక్కున్నారు. అద్గదీ అంతకన్నా ఘనకార్యం ఇంకేముంటుంది.?

ఒకప్పుడు ఇలాంటి వివాదాల్లో ఇరుక్కోవడమంటే సిగ్గుపడాల్సిన విషయం. నైతికత కోణంలో, పదవులకు రాజీనామా చేసేవాళ్ళు ప్రజా ప్రతినిథులు. కానీ, ఇప్పుడు పరిస్థితి అది కాదు. అక్రమాస్తుల కేసులో జైలుకు వెళ్ళి వస్తే, అదో ఘనకార్యం. హత్య చేసి డెడ్‌బాడీని డోర్ డెలివరీ చేస్తే అది ఇంకో ఘనకార్యం. అత్యాచారాలు చేస్తే, అది ఇంకో ఘనకార్యం.!

ఇదీ ఇలా బోల్డన్ని కామెంట్లు పడుతున్నాయి సోషల్ మీడియాలో. ఏం చేయగలరు జనం.? సోషల్ మీడియాలో టైమ్ పాస్ కోసం ప్రశ్నించడం తప్ప.? ‘సర్క్యులేట్ అవుతోన్న వీడియో ఒరిజినల్ కాదు..’ అన్నది పోలీసుల వెర్షన్. ఒరిజినల్ దొరికితే తప్ప, ఫోరెన్సిక్‌కి పంపలేమని పోలీసులు తేల్చారు. దానర్థం, గోరంట్ల మాధవ్‌కి క్లీన్ చిట్ దక్కినట్లు కాదు. కానీ, ఆయన తనకు క్లీన్ చిట్ దక్కినట్లే భావిస్తున్నారు.

ఈ క్రమంలోనే తనకు ఘనంగా స్వాగతం పలికే ఏర్పాటు చేయాలని ఆదేశించినట్లున్నారు. పైగా, వైసీపీ కూడా.. ఓ ఘనాపాటీ రాష్ట్రానికి పెద్ద ఘనకార్యం చేసొస్తున్నారన్నట్లుగా హంగామా చేస్తోంది. తప్పదు, ఇది బులుగు ప్రజాస్వామ్యం.. ఇలాంటివి భరించాల్సిందే.