శరవేగంగా పోలవరం ప్రాజెక్ట్‌.. ఏది నిజం.?

ఎప్పుడో బ్రిటిష్‌ వారి హయాంలో పోలవరం ప్రాజెక్టుకి సంబంధించిన ఆలోచనలు జరిగాయి. కానీ, ఇప్పటిదాకా పోలవరం ప్రాజెక్టు కలగానే మిగిలిపోయింది. వైఎస్‌ రాజశేఖర్‌రెడ్డి హయాంలో ‘జలయజ్ఞం’లో కీలక ప్రాజెక్టుగా మారినా, ఉమ్మడి ఆంధ్రప్రదేశ్‌ విభజనతో జాతీయ ప్రాజెక్టుగా పోలవరం ప్రాజెక్టుకి అవకాశం దక్కినా.. అప్పటికీ ఇప్పటికీ పోలవరం ప్రాజెక్టుకి పట్టిన రాజకీయ గ్రహణం మాత్రం వీడటంలేదు.

2018 చివరి నాటికి పోలవరం ప్రాజెక్టుని పూర్తి చేస్తామని గతంలో చంద్రబాబు సర్కార్‌ చెప్పుకుంది. కానీ, ఇప్పటికీ పోలవరం ప్రాజెక్టు పూర్తి కాలేదు. వైఎస్సార్‌ కాంగ్రెస్‌ పార్టీ అధికారంలోకి వచ్చాక దాదాపు ఏడు నెలలపాటు పోలవరం ప్రాజెక్టు పనులు ఆగిపోయాయి.. రివర్స్‌ టెండరింగ్‌ పుణ్యమా అని. అయితే, ఆ తర్వాత పనులు వేగం పుంజుకున్నాయట. ఈ మేరకు మీడియాలో కుప్పలు తెప్పలుగా కథనాలు వచ్చిపడుతున్నాయి. మరి, ఈ కథనాల్లో వాస్తవం ఎంత.? ‘నేతి బీరకాయిలో నెయ్యి లాగానే..’ అంటున్నారు విశ్లేషకులు.

మరోపక్క, ముఖ్యమంత్రి అయ్యాక రెండో సారి పోలవరం ప్రాజెక్టుని సందర్శించారు వైఎస్‌ జగన్‌ మోహన్‌రెడ్డి. ఈ రోజు పోలవరం ప్రాజెక్టు ప్రాంతంలో ఏరియల్‌ సర్వే నిర్వహించి, ఆ తర్వాత అధికారులతో సమీక్ష కూడా నిర్వహించారు. 2021 నాటికి పోలవరం ప్రాజెక్టు పూర్తవుతుందన్నది తాజాగా ప్రభుత్వం చెబుతున్న మాట.

కాస్త అటూ ఇటూగా అయినా, 2021 చివరి నాటికి పోలవరం ప్రాజెక్టు పూర్తి చేస్తామని అధికార పార్టీ కుండబద్దలుగొట్టేస్తోంది. కానీ, ఆ దిశగా కేంద్రం నుంచి రావాల్సిన నిధులు మాత్రం పోలవరం ప్రాజెక్టుకి రాలేదు. ప్రాజెక్టుకి నిర్మాణానికి సంబంధించి తీవ్రమైన ప్రతిబంధకంగా కన్పిస్తోన్న అంశం ‘పునరావాసం’. ఈ విషయమై కేంద్ర – రాష్ట్ర ప్రభుత్వాల మధ్య భిన్నాభిప్రాయాలున్నాయి. అదే మొదటి నుంచీ ప్రాజెక్టుని వివాదాల్లోకి నెట్టేస్తోంది.

సవరించిన అంచనాల్ని కేంద్రం ఇంతవరకు పూర్తిస్థాయిలో ఆమోదించలేదు. మరోపక్క, పోలవరం ప్రాజెక్టుకి సంబంధించిన ఖర్చయిన లెక్కలపై రాష్ట్రానికీ – కేంద్రానికీ మధ్య ‘గ్యాప్‌’ కన్పిస్తోంది. పలుమార్లు కేంద్రం దృష్టికి పోలవరం ప్రాజెక్టు అంశాన్ని రాష్ట్ర ప్రభుత్వం (చంద్రబాబు ప్రభుత్వం, ఆ తర్వాత వైఎస్‌ జగన్‌ ప్రభుత్వం) తీసుకెళ్ళినా ఆశించిన మేర కేంద్రం సహకరించని పరిస్థితి. మరెలా, 2021 చివరి నాటికి పోలవరం ప్రాజెక్టు పూర్తవుతుంది.? ఇదే మిలియన్‌ డాలర్ల ప్రశ్న.