విశాఖ ఉక్కుపై రాష్ట్రానికి హక్కులేదు: తేల్చేసిన సీఎం జగన్

విశాఖ ఉక్కు.. ఆంధ్రుల హక్కు.. అనేది ఒకప్పటి నినాదం. ఇప్పుడూ అదే నినాదంతో విశాఖ ఉక్కు పరిశ్రమ ప్రైవేటీకరణకు వ్యతిరేకంగా పోరాటం జరుగుతోంది. అయితే, విశాఖ ఉక్కుపై రాష్ట్రానికి హక్కు లేదని తేల్చేశారు ముఖ్యమంత్రి వైఎస్ జగన్ మోహన్ రెడ్డి. విశాఖ పర్యటనలో భాగంగా విశాఖ ఉక్కు పరిశ్రమకు చెందిన కార్మిక సంఘాల ప్రతినిథులతో భేటీ అయిన వైఎస్ జగన్, విశాఖ ఉక్కు పరిశ్రమపై రాష్ట్ర ప్రభుత్వానికి హక్కు లేదని స్పష్టం చేశారు. విశాఖ ఉక్కు పరిశ్రమపై సర్వ హక్కులూ కేంద్రానికే వున్నాయనీ, నష్టాల్లో వుందని చెప్పి కేంద్రం ఈ ఉక్కు పరిశ్రమను ప్రైవేటీకరించాలనుకోవడం తగదని వైఎస్ జగన్ చెప్పుకొచ్చారు.

రాష్ట్ర ప్రభుత్వం తరఫున కేంద్రానికి ఇప్పటికే ఈ విషయమై లేఖ రాశానన్న వైఎస్ జగన్, విశాఖ ఉక్కు పరిశ్రమకు సొంతంగా గనులు లేవనీ, నష్టాలను తగ్గించుకునే మార్గాల్ని అన్వేషించాలి తప్ప, ప్రైవేటీకరణ చేయకూడదనే విషయాన్ని కేంద్రానికి తెలిపానన్నారు. కాగా, విశాఖ స్టీలు ప్లాంటుపై కన్నేసిన ‘పోస్కో’ సంస్థ ప్రతినిథులు తనను గతంలో కలిసిన మాట వాస్తవమేనని వైఎస్ జగన్ చెప్పారు. కడప, కృష్ణపట్నం, భావనపాడుల్లో ఏదో ఒక చోట స్టీలు ప్లాంటు ఏర్పాటు గురించి మాత్రమే తమ మధ్య చర్చలు జరిగాయనీ, కడపలో స్టీలు ప్లాంటు ఏర్పాటు చేస్తే బావుంటుందని తాను వారికి సూచించాననీ, విశాఖ ఉక్కు పరిశ్రమ జోలికి పోస్కో వచ్చే అవకాశం లేదని వైఎస్ జగన్ వ్యాఖ్యానించడం గమనార్హం.

అయితే, విశాఖ ఉక్కు పరిశ్రమకు చెందిన భూముల్లో స్టీలు ప్లాంటు నెలకొల్పేందుకు పోస్కో ఇప్పటికే అవగాహనా ఒప్పందం కుదుర్చుకున్న సంగతి తెల్సిందే. అదే పోస్కో సంస్థకు విశాఖ స్టీలు ప్లాంటుని అప్పగించేందుకూ కేంద్రం సుముఖంగానే వుంది. విశాఖ ఉక్కు పరిశ్రమ ప్రైవేటీకరణపై ఇప్పటికే కేంద్రం ప్రకటన చేయడం, పలు దఫాలుగా పోస్కో కేంద్రంతోనూ, విశాఖ ఉక్కు యాజమాన్యంతోనూ సంప్రదింపులు చేపట్టడం… ఇవన్నీ జరిగాక, కేంద్రం వెనక్కి తగ్గుతుందని ఎలా అనుకోగలం.? ఏదిఏమైనా, రాజకీయాల్ని పక్కన పెట్టి.. అన్ని రాజకీయ పార్టీలూ విశాఖ ఉక్కు ఉద్యమంలోకి ఉక్కు సంకల్పంతోనే రావాల్సి వుంటుంది. వైసీపీ, టీడీపీ.. ఒకరి మీద ఒకరు దుమ్మెత్తి పోసుకుంటే ఆ ఆధిపత్య పోరు విశాఖకు, ఆంధ్రపదేశ్‌కీ తీవ్ర నష్టం చేస్తుందన్నది నిర్వివాదాంశం.