విశాఖ ఉక్కుపై వైసీపీ ‘తుప్పు’ రాజకీయం.!

విశాఖ స్టీలు ప్లాంటుని ప్రైవేటీకరణ చేయాలన్నది కేంద్రం ఆలోచన. ఎవ్వరికీ ఎలాంటి అనుమానం రాకుండా తెరవెనుకాల ఒప్పందాలు కూడా జరిగిపోయాయంటే, కేంద్రం ఎంత వ్యూహాత్మకంగా వ్యవహరించి.. విశాఖ ఉక్కు పరిశ్రమను ప్రైవేటీకరణ దిశగా అడుగులేసిందో అర్థం చేసుకోవచ్చు. కేంద్రంతో సత్సంబంధాలు నడుతుపున్న ఏపీ సర్కార్ కూడా అంతే వ్యూహాత్మకంగా తెరవెనుకాల కేంద్రానికి ఈ విషయంలో సహకరించి వుండాలి.

లేకపోతే, విశాఖ ఉక్కుపై కన్నేసిన కొరియా సంస్థ పోస్కో ప్రతినిథులతో గతంలో సీఎం జగన్ భేటీ అయి.. ఏం ముచ్చటించినట్లు.? విశాఖ ఉక్కు పరిశ్రమ విషయంలో చెయ్యాల్సిందంతా చేసేసి, ఇప్పుడు ఏమీ ఎరగనట్లు వైసీపీ నేతలు, విశాఖ ఉక్కు పరిశ్రమ ప్రైవేటీకరణకు తాము వ్యతిరేకమంటూ కల్లబొల్లి కబుర్లు చెబుతున్నారు. ‘విశాఖ ఉక్కు ప్రైవేటీకరణకు మేం వ్యతిరేకం..’ అంటూ తాజాగా మంత్రి బొత్స సత్యనారాయణ సెలవిచ్చారు.

విశాఖ ఉక్కుని ప్రైవేటు పరం చేయాలనుకునే ఆలోచనను కేంద్రం వెనక్కి తీసుకోవాలి.. అవసరమైతే, రాష్ట ప్రభుత్వమే విశాఖ ఉక్కు పరిశ్రమను కొనుగోలు చేస్తుంది.. అని కూడా వైసీపీ ముఖ్య నేతలు కొందరు ప్రకటించేశారు. నిజానికి, ఈ ప్రకటన రావాల్సింది ప్రభుత్వ పెద్దల నుంచి.. అదీ అదికారికంగా. మిషన్ బిల్డ్ ఏపీ పేరుతో రాష్ట్రంలో విలువైన భూముల్ని వైసీపీ ప్రభుత్వం అమ్మకానికి పెట్టడం, ఈ క్రమంలో కోర్టు మొట్టికాయలు తినడం తెలిసిన విషయమే.

రాష్ట్రమిలా విలువైన ప్రభుత్వ ఆస్తుల్ని అమ్మేస్తూ, కేంద్రాన్ని విశాఖ ఉక్కు పరిశ్రమ విషయమై ప్రశ్నించాలనుకోవడం హాస్యాస్పదం కాక మరేమిటన్నది రాజకీయ విశ్లేషకుల ప్రశ్న. వైఎస్ జగన్ అధికారంలోకి వచ్చాక, రాజధాని అమరావతి అయోమయంలో పడిపోయింది.. పోలవరం ప్రాజెక్టుకి కేంద్రం ఇవ్వాల్సిన నిధుల విషయంలో తీవ్ర గందరగోళం నెలకొంది. ప్రత్యేక హోదా సంగతి సరే సరి. రైల్వే జోన్ ఊసే లేదు. ఇవన్నీ వైఎస్ జగన్ ప్రభుత్వ వైఫల్యాలే. ఇన్ని వైఫల్యాల్ని తమ పక్కన పెట్టుకుని.. అమ్మకాలు, కూలగొట్టడాల్లో ఘన చరిత్ర కలిగిన వైసీపీ, విశాఖ ఉక్కు విషయంలో ‘తుప్పు’ రాజకీయాన్ని చేయాలనుకుంటే, అంతకన్నా హాస్యాస్పదం ఇంకేముంటుంది.?