అమ్మ ఒడి సరే.. ఈ దోపిడీ ఏంటి జగన్ సారూ.!

‘దేశంలో ఎక్కడా లేని విధంగా సంక్షేమ పథకాల్ని అమలు చేస్తున్నాం..’ అంటున్నారు ఆంధ్రపదేశ్ ముఖ్యమంత్రి వైఎస్ జగన్ మోహన్ రెడ్డి. ఇందులో కొంత నిజం లేకపోలేదు. ఆర్థిక ఇబ్బందులతో సతమతమవుతున్న ఓ రాష్ట్రం ఈ స్థాయిలో సంక్షేమ పథకాలు అమలు చేయడమంటే చిన్న విషయం కాదు. కానీ, ఈ సంక్షేమ పథకాలు ఎలా అమలవుతున్నాయి.? అన్నదే అసలు చర్చ. అప్పులు.. అప్పుల మీద అప్పులు.. దేశంలో ఏ రాష్ట్రం చేయని విధంగా రికార్డు స్థాయిలో అప్పులు చేస్తోంది ఆంధ్రపదేశ్. గతంలో చంద్రబాబు హయాంలో అప్పులు జరిగితే.. ‘రాష్ట్రాన్ని అమ్మేశారు.. తాకట్టు పెట్టేశారు..’ అంటూ అప్పటి ప్రతిపక్ష నేత వైఎస్ జగన్ మోహన్ రెడ్డి ఆరోపించారు.

కానీ, ఇప్పుడు అదే వైఎస్ జగన్ ముఖ్యమంత్రి హోదాలో వున్నారు. కానీ, జరుగుతున్నది అదే. కాదు కాదు, అంతకు మించి అప్పులు జరుగుతున్నాయి. ‘ఏ రాయి అయితేనేం పళ్ళూడగొట్టుకోవడానికి’ అన్నట్టుంది రాష్ట ప్రజల పరిస్థతి. కాదు కాదు, పెనం మీద నుంచి పొయ్యిలో పడ్డటయ్యింది.. అని కూడా చెప్పుకోవచ్చేమో. ‘మేం అద్భుతంగా పరిపాలించేస్తున్నాం.. మేం ఏ మంచి కార్యక్రమం చేయ తలపెట్టినా, దాన్ని అడ్డుకునేందుకు విపక్షాలు కుట్రలు పన్నుతున్నాయి..’ అని తాజాగా అమ్మ ఒడి రెండో విడత నిధుల విడుదల సందర్భంగా సీఎం వైఎస్ జగన్ వ్యాఖ్యానించారు. ఇదెక్కడి చోద్యం.? దేవాలయాల మీద దాడులు జరుగుతున్నాయి.. రథాల్ని తగలబెట్టారు.. దేవతా విగ్రహాల ధ్వంసం ఆగడంలేదు.. ఇవన్నీ విపక్షాల కుట్రలేనన్నట్లుగా వైఎస్ జగన్ చెబుతుండడం గమనార్హం.

పంపకాల గొప్పతనం గురించి చెప్పకుంటారు.. మరి, అదే నోటితో, రాష్ట్రాన్ని అప్పుల ఊబిలోకి నెట్టేస్తున్నది తామేనని ముఖ్యమంత్రి ఎందుకు చెప్పుకోరు.? ‘గొప్ప పాలన అందిస్తున్నాం.’ అంటారు, కానీ, పెట్రో ధరలు పొరుగు రాష్ట్రాల కంటే ఎక్కువగా ఆంధ్రపదేశ్‌లోనే వున్నాయని చెప్పుకోరెందుకు.? జనం జేబుల్లో ఇలా డబ్బులేసి, అలా కన్నం పెడుతున్నామని చెప్పరెందుకు.? వీటికి కూడా పబ్లసిటీ చేసుకోవాల్సిన రోజులు ముందు ముందు వస్తాయేమో. హిందూ దేవాలయాలపై విపక్షాలకు చెందినవారే దాడులు చేస్తున్నారని ముఖ్యమంత్రి చెబుతున్న దరిమిలా, ఆ దుర్మార్గులెవరో సాక్ష్యాలతో సహా ప్రజల ముందు నిలబెట్టొచ్చు కదా.? ఇంకా నయ్యం.. అంతటి సమర్థత ఆంధ్రపదేశ్ ప్రభుత్వానికెక్కడిది.?