యెల్లో వర్సెస్ బ్లూ.! ఇద్దరు పతివ్రతలు.!

ఒకటేమో తెలుగుదేశం పార్టీ అనుకూల మీడియా. దాన్ని పచ్చ మీడియా అంటున్నాం. ఇంకొకటేమో వైఎస్సార్ కాంగ్రెస్ పార్టీ అనుకూల మీడియా.. దాన్ని బులుగు మీడియా అంటున్నాం.! ఒకరి మీద ఇంకొకరు బురద చల్లుకోవడం ఈ రెండు మీడియా సంస్థలకీ కొత్తేమీ కాదు. కాకపోతే, ఈసారి అది మరింత జుగుప్సాకరంగా తయారైందంతే. ప్రతిసారీ అంతకు మించి.. అనే స్థాయిలో ఎవరికి వారు తమ దిగజారుడుతనాన్ని ప్రదర్శిస్తున్నారు.

పచ్చ మీడియా పుట్టుక, ఎదుగుదల గురించి బులుగు మీడియా కథనాల్ని వండి వడ్డిస్తోంది. బులుగు మీడియా పుట్టుపూర్వోత్తరాలపై సహజంగానే పచ్చ మీడియాలోనూ కథనాలు వండి వడ్డించబడతాయి. జనాలకేంటి ఈ ఖర్మ.? ఆ రెండూ మరీ దారుణంగా టాయిలెట్లలోని టిష్యూ పేపర్లలా మారిపోతోంటే, వాటిని డబ్బులు వెచ్చించి కొనుక్కోవాలా.? అని జనం ఛీదరించుకుంటున్న పరిస్థితి.

తెలుగు రాష్ట్రాల్లో పత్రికల సర్క్యులేషన్‌ పడిపోవడానికి కోవిడ్ ఒక్కటే కారణం కాదు.. అంతకు మించిన కుల జాడ్యం కూడా. పచ్చ మీడియాది ఓ కులం, బులుగు మీడియాది మరో కులం. రాష్ట్రంలో ఈ రెండు కులాలు తప్ప, మూడో కులం లేదన్నట్లుగా ఈ రెండు పత్రికల్లోనూ నిత్యం పైత్యాన్ని చూస్తుంటాం.

పచ్చ మీడియాకి సంబంధించిన ఓ పత్రికాధినేత తాలూకు చిట్‌ఫండ్ కంపెనీ వ్యవహారాలపై బులుగు మీడియా సరికొత్తగా కథనాల్ని వండి వడ్డించింది. నవ్విపోదురుగాక వాళ్ళకేటి సిగ్గు.? అవును, గురివింద చందాన.. ఇద్దరి ‘ము..’ కిందా మచ్చలున్నాయ్. వాటిని దాచేసి, ఒకరి మీద ఇంకొకరు బురద కూడా కాదు, అశుద్ధం చల్లుకుంటున్నారు. లేకపోతే, బులుగు మీడియా పుట్టుక ఏంటి.? అది కూడా అవినీతికి పుట్టిందే కదా.?

మీడియా అంటే ఎలా వుండాలి.? వెలుగులోకి రాని నిజాల్ని వెలికి తీయగలిగాలి. కానీ, ఇక్కడ.. మీడియా మాత్రం అశుద్ధంలో మునిగి తేలుతోంది. ఆ పత్రికలు చదువుతున్నవారికీ ఆ అశుద్ధాన్ని అంటిస్తున్నాయి. తెలుగు నేలపై.. అందునా, ఆంధ్రప్రదేశ్‌లో ఈ అశుద్ధ మీడియా పైత్యం మరీ ఎక్కువైపోయింది. అత్యంత ఛండాలంగా తయారైంది.

ఇంకా చిత్రమైన విషయమేంటంటే, రెండింటికీ హెడ్డాఫీసులు హైద్రాబాద్‌లో వున్నాయి. అక్కడ చల్లుకోవాల్సిన అశుద్ధాన్ని కాస్తా, ఆంధ్రప్రదేశ్ రాష్ట్రంలో ఆ రెండు మీడియా సంస్థలూ చల్లుతుండడమే అత్యంత బాధాకరమైన విషయం. పాత్రికేయ వ్యభిచారం అనాల్సొస్తే, ఆ వ్యభిచార కూపంలో మగ్గుతోన్న వారు బాధపడతారేమో.! అంతకన్నా హేయమైన రీతిలో తెలుగునాట పచ్చ, బులుగు పాత్రికేయం నడుస్తోంది.