ఆయన వస్తానంటే వైసీపీ వద్దంటోందట.?

ఇంకో 8 రోజుల్లో ఎన్నికల ఫలితాలు వెల్లడి కాబోతున్నాయి. ఈలోగా అన్ని పార్టీల్లోనూ టెన్షన్‌ పెరిగిపోతోంది. ముందస్తు సర్వేల ఆధారంగా కొందరు నేతలు సేఫ్‌ గేమ్‌ ఆడేందుకు సిద్ధమవుతున్నారు. ఈ క్రమంలో టీడీపీకి చెందిన ఓ ప్రముఖ నేత పైగా పారిశ్రామిక వేత్త కూడా అయిన ఓ నాయకుడు వైసీపీలో చేరడానికి రాయబారం పంపారట. గతంలో ఆయన కాంగ్రెస్‌ పార్టీ నుండి ప్రాతినిధ్యం వహించారు. ఆయన కారణంగా జనసేన పార్టీకీ, తెలుగుదేశం పార్టీకీ మధ్య చిచ్చు రేగింది. తన వారసుడి కోసం టీడీపీలో సదరు నేత రేపిన చిచ్చు అంతా ఇంతా కాదు. ఇంతా చేసి ఇప్పుడాయన టీడీపీకి ‘హ్యాండ్‌’ ఇచ్చే పనిలో ఉన్నారంటే, కాస్త ఆశక్తికరమైన విషయమే.

ఇక్కడ ట్విస్ట్‌ ఏంటంటే, సదరు నేతకు నోటి దురద కాస్త ఎక్కువ కావడంతో అతన్ని భరించలేమంటూ, వైసీపీ నేతలు తమ అధినేత వద్ద అసలు విషయాన్ని కాస్త గట్టిగానే చెప్పారట. కానీ, డైరెక్ట్‌గా ఆ సీమ నేత ‘మీది తెనాలే మాది తెనాలే..’ అన్నట్లుగా సీమ సెంటిమెంట్‌ చూపించి, వైఎస్‌ జగన్‌ దగ్గర మార్కులు కొట్టేయాలనుకుంటున్నారట. ప్రస్తుతానికైతే, చూద్దాం.. అని మాత్రమే జగన్‌ నుండి ఆ టీడీపీ నేతకు సమాధానమొచ్చింది తప్ప పూర్తి భరోసా అయితే దక్కలేదనీ తెలుస్తోంది.

వారసుడికి టికెట్‌ ఇప్పించుకునేందుకు జిల్లాలో టీడీపీని భ్రష్టుపట్టించేసినా, ఆ నేతను చంద్రబాబు భరించారంటే, సదరు నేత వెనకాల బలం ఏంటో అర్ధం చేసుకోవచ్చు. డబ్బు వెదజల్లి రాజకీయాల్లో తాను అనుకున్నది సాధించడం ఆయనగారి స్పెషాలిటీ. అధికారం ఎక్కడుంటే, అక్కడికి వాలిపోతారాయన. అలాగే కాంగ్రెస్‌ నుండి టీడీపీలోకి వచ్చారు. వైసీపీ అధికారంలోకి రావచ్చన్న నమ్మకంతోనే అటు వైపు పరుగెడుతున్నారు.

వైసీపీ కాదు, టీడీపీనే అధికారంలోకి వస్తుందని అనిపిస్తే, మళ్లీ వైఎస్‌ జగన్‌ని షరా మామూలుగానే విమర్శించడానికీ వెనుకడరాయన. అంతటి నిబద్ధత ఆయనగారి సొంతం. ప్రస్తుతానికి రెండు పడవల మీద కాళ్లేశారు. మూడో పడవ, నాలుగో పడవతోనూ పెద్దగా విబేధాలేమీ లేవాయనకు. ఆ పడవలు ఇంకేవో కావు.. కాంగ్రెస్‌, బీజేపీ. దేశంలో కాంగ్రెస్‌ హవా కనిపిస్తే, సొంతింటికి ఆయనగారు తిరిగెళ్లినా ఆశ్చర్యపోనక్కర్లేదు. మోడీ తిరిగి ప్రధాని అయ్యే అవకాశముంటే, అటు కూడా దృష్టి సారించొచ్చు. తరచి చూస్తే, ఇలాంటోళ్లు చాలా మందే కనిపిస్తారు. అందరిలోకీ ఈయన గారు కాస్త స్పెషల్‌.