జనసేనాని సభల్లో కనిపించేవాళ్ళెవరూ ఓట్లెయ్యరా.?

మెగాస్టార్ చిరంజీవి ప్రజారాజ్యం పార్టీ పెట్టిన సమయంలో, ఆయన ఎక్కడికి వెళ్ళినా జనం పోటెత్తేవారు. కానీ, ఆ స్థాయికి తగ్గ రీతిలో ప్రజారాజ్యం పార్టీ అప్పట్లో సత్తా చాటలేకపోయింది. సాక్షాత్తూ చిరంజీవి, పాలకొల్లులో ఓడిపోయారు. తిరుపతిలో గెలిచారనుకోండి.. అది వేరే సంగతి. ప్రజారాజ్యం పార్టీ నుంచి పలువురు ఎమ్మెల్యేలుగా గెలిచారు కూడా.

కానీ, ప్రజారాజ్యం పార్టీ మనుగడ సాధించలేకపోయింది. రెండు ప్రధాన రాజకీయ పార్టీలు, రెండు సామాజిక వర్గాలు ప్రజారాజ్యం పార్టీ మీద కక్షగట్టాయి.. ప్రజారాజ్యం పార్టీ కాలగర్భంలో కలిసిపోవడానికి కారణమయ్యాయి. సరే, చిరంజీవి ఆ తర్వాత కాంగ్రెస్ పార్టీలో ప్రజారాజ్యం పార్టీని విలీనం చేసెయ్యడం, ఎమ్మెల్యే పదవికి రాజీనామా చేసి, రాజ్యసభకు వెళ్ళి, కేంద్ర మంత్రి అవడం.. ఆ తర్వాత శాశ్వతంగా రాజకీయాలకు దూరమవడం.. అవన్నీ వేరే వ్యవహారాలు.

మరిప్పుడు, జనసేన పరిస్థితేంటి.? 2019 ఎన్నికల్లో జనసేన పార్టీ దారుణ పరాజయాన్ని చవిచూసింది. 2024 ఎన్నికల్లో ఏమవుతుంది.? గతంలో పోటీ చేసిన రెండు చోట్లా ఓడిపోయిన జనసేనాని కోసం ఇప్పుడు పెద్దయెత్తున జనం స్వచ్ఛందంగా ఎందుకు తరలి వస్తున్నారు.? వచ్చేవాళ్ళెవరూ ఓట్లెయ్యరా.? ఇలాంటి చర్చ జరగడం సహజమే.

ఎన్నికలంటే, బోల్డన్ని ఈక్వేషన్స్ వుంటాయి. కుల, మత, ప్రాంత రాజకీయాలు నడుస్తాయ్. డబ్బుతో ఓట్లను కొనేయడం రాజకీయ పార్టీలకు అలవాటే. ఇవన్నీ చేయగలిగితే, జనసేన పార్టీ ఖచ్చితంగా 2019 ఎన్నికల్లో చెప్పుకోదగ్గ స్థాయిలో సీట్లు సంపాదించేది.

కానీ, జనసేనకు కావాల్సింది అది కాదు.! మార్పు ప్రజల్లోంచి రావాలి. వైసీపీకి ఓట్లేసి, రోడ్ల మీద నరకం చూస్తున్న ప్రజల్లో మార్పు రావాలి. సంక్షేమ పథకాల పేరుతో అప్పులు చేసి, డబ్బులు పంచుతున్న జగన్ సర్కారు, తమను నిలువునా ముంచేస్తుందన్న ఆలోచన జనంలో రావాలి. జనసేనాని కోరుకునేది అదే. అలాంటి మార్పు వచ్చినప్పుడే, రాష్ట్రం బలోపేతమవుతుంది.

వస్తోంది.. ఆ మార్పు కనిపిస్తోంది.. కానీ, ఓటర్ల మెదళ్ళను కలుషితం చేసేందుకు అటు వైసీపీ, ఇటు టీడీపీ.. ఆ రెండు సామాజిక వర్గాలు.. తమదైన రీతిలో దిక్కుమాలిన వ్యూహాలు రచించడం మొదలెట్టేశాయ్. మరి, ఈసారి జనం ఏం చేస్తారో.. తమ భవిష్యత్తుని ఎలా రాసుకుంటారో వేచి చూడాల్సిందే.