సీబీఐ కోర్టులో విచారణకు సీఎం జగన్‌ హాజరవుతారా!

అక్రమాస్తుల కేసుకు సంబంధించి దాదాపుగా ప్రతి శుక్రవారం కోర్టు యెదుట విచారణకు హాజరవుతూ వస్తున్న వైఎస్‌ జగన్‌ మోహన్‌ రెడ్డి, ముఖ్యమంత్రి అయ్యాక తొలిసారి రేపు న్యాయస్థానం యెదుట హాజరు కాబోతున్నారా? అన్న ప్రశ్న చాలామందిలో ఆసక్తిని రేపుతోంది. అత్యంత విశ్వసనీయ వర్గాల సమాచారం ప్రకారం, రేపు ఆయన సీబీఐ కోర్టుకు హాజరయ్యే అవకాశాలు తక్కువేనని తెలుస్తోంది. ముఖ్యమంత్రిగా ఇటీవలే బాధ్యతలు స్వీకరించిన వైఎస్‌ జగన్‌, వివిధ శాఖలతో సమీక్షలు జరుపుతూ చాలా బిజీగా వున్నారు.

ఈ నేపథ్యంలోనే వ్యక్తిగత హాజరు నుంచి మినహాయింపు కోరుతూ వైఎస్‌ జగన్‌ తరఫున కోర్టుకి విన్నవించేందుకు ప్రయత్నాలు ప్రారంభయినట్లు తెలుస్తోంది. మరోపక్క, వైఎస్‌ జగన్‌ ప్రస్తుతం ముఖ్యమంత్రి గనుక, వ్యక్తిగత హాజరు నుంచి ఆయనకు పూర్తిస్థాయిలో మినహాయింపు ఇవ్వాలనే దిశగా కూడా జగన్‌ తరఫు లాయర్లు ప్రయత్నాలు చేయనున్నారని సమాచారమ్‌. వైఎస్సార్‌ కాంగ్రెస్‌ పార్టీ అధికారంలోకి రావడం సహా, అన్నీ ఇప్పుడు తనకు అనుకూలంగా కన్పిస్తున్న దరిమిలా, అక్రమాస్తుల కేసు నుంచి కూడా తనకు కొంత మేర ఉపశమనం లభిస్తుందనే ఆశాభావంతో వున్నారట వైఎస్‌ జగన్‌.

అయితే, జగన్‌ ముఖ్యమంత్రి అవడానికీ, అక్రమాస్తుల కేసుకీ సంబంధం లేదనీ, నిందితుడిగా వైఎస్‌ జగన్‌ కోర్టుకు హాజరవ్వాల్సి వుంటుందని కొందరు న్యాయ నిపుణులు అభిప్రాయపడ్తున్నారు. తాత్కాలికంగా వైఎస్‌ జగన్‌కి ఊరట లభించే అవకాశాలున్నా, శాశ్వతంగా ఊరట అనేది అసాధ్యమన్నది వారి అభిప్రాయం. కాంగ్రెస్‌ పార్టీ నుంచి బయటకొచ్చిన తర్వాత వైఎస్‌ జగన్‌ మోహన్‌ రెడ్డిపై అక్రమాస్తుల కేసులు నమోదవడం తెలిసిన సంగతులే.

ఈ కేసుల్లో వైఎస్‌ జగన్‌ మొదటి నిందితుడు కాగా, వైఎస్సార్‌ కాంగ్రెస్‌ పార్టీ ముఖ్య నేతల్లో ఒకరైన ఆ పార్టీ రాజ్యసభ సభ్యుడు విజయసాయిరెడ్డి రెండో నిందితుడిగా వున్నారు. తమపై నమోదయినవి రాజకీయ కక్ష సాధింపుకి సంబంధించిన కేసులేనని జగన్‌, విజయసాయిరెడ్డి చాలా కాలంగా వాదిస్తున్నా, కేసుల తీవ్రత దృష్ట్యా విచారణ గట్టిగానే సాగుతోంది. అయితే, లక్ష కోట్ల అవినీతి ఆరోపణలు కాస్తా అటకెక్కి, వేల కోట్ల అవినీతి ఆరోపణల స్థాయికి కేసు డైల్యూట్‌ అయిపోయిందనే వాదనలు విన్పిస్తున్నాయనుకోండి, అది వేరే సంగతి.