బీజేపీ స్కెచ్.. చంద్రబాబు జైలుకెళ్ళక తప్పదా?

వైఎస్‌ జగన్‌ మోహన్‌ రెడ్డి మీద అక్రమాస్తుల కేసులు నమోదయినప్పుడు, ఆయన ధైర్యంగా వాటిని ఎదుర్కొన్నారని భారతీయ జనతా పార్టీకి చెందిన ఓ సీనియర్‌ నేత ఓ న్యూస్‌ ఛానల్‌ చర్చా కార్యక్రమంలో సందర్భానుసారం వ్యాఖ్యానించారు. అయితే, ఆ వెంటనే ఆయన ‘చంద్రబాబు జైలుకు వెళ్ళాల్సి వస్తే, ఈ వయసులో ఆయన తట్టుకోగలరా.?’ అంటూ అనుమానం వ్యక్తం చేయడం రాజకీయ వర్గాల్లో చర్చనీయాంశమవుతోంది.

నిప్పు లేకుండా పొగ రాదు కాబట్టి, పై స్థాయిలో చంద్రబాబు మీద ‘కుట్ర’ చాలా గట్టిగానే జరుగుతోందని అర్థం చేసుకోవచ్చు. మరోపక్క, బీజేపీ సీనియర్‌ నేత వ్యాఖ్యల్ని టీడీపీ నేత తిప్పి కొట్టారు. చంద్రబాబు మీద వైఎస్‌ రాజశేఖర్‌రెడ్డి చాలా కేసులు పెట్టాలని చూశారనీ, ఆ కేసులేవీ నిలబడలేదనీ, వైఎస్‌ జగన్‌ ఎన్ని కేసులు పెట్టినా అవీ నిలబడవనీ తమ అధినేత గొప్పతనాన్ని ఇంకా గొప్పగా చెప్పేసుకున్నారు ఆ టీడీపీ నేత.

ఆంధ్రప్రదేశ్‌లో ముందు ముందు కక్ష పూరిత రాజకీయాలు చోటు చేసుకోబోతున్నాయనడానికి ఇంతకన్నా నిదర్శనం ఇంకేం కావాలి? చంద్రబాబు కారణంగానే వైఎస్‌ జగన్‌ జైలుకు వెళ్ళాల్సి వచ్చిందని వైసీపీ నేతలు ఇప్పటికీ నమ్ముతున్నారు. ఈ నేపథ్యంలో చంద్రబాబుని జైలు పక్షిలా చూడాలన్న ఉబలాటం వైఎస్సార్సీపీ శ్రేణుల్లో స్పష్టంగా కన్పిస్తోందని నిస్సందేహంగా చెప్పొచ్చు. అయితే, రాష్ట్ర స్థాయిలో చంద్రబాబుపై చర్యలు తీసుకోవడం వల్ల తమకు చెడ్డ పేరు వస్తుందా.? అన్న కోణంలో ముఖ్యమంత్రి వైఎస్‌ జగన్‌ అత్యంత సన్నిహితులైన పార్టీ ముఖ్య నేతలతో మంతనాలు జరుపుతున్నారట.

మరోపక్క, బీజేపీ మాత్రం ఆంధ్రప్రదేశ్‌లో తమకు జీరో సీట్లు రావడం వెనుక చంద్రబాబు చేసిన దుష్ప్రచారమే కారణమని బలంగా నమ్ముతోంది. గడచిన ఐదేళ్ళలో జరిగిన అవినీతిని పరిగణనలోకి తీసుకుని, చంద్రబాబుపై సీబీఐ లాంటి సంస్థల్ని ప్రయోగించాలని బీజేపీ పెద్దలు యోచిస్తున్నారనీ ఈ మేరకు అక్కడినుంచి అందుతున్న సంకేతాల నేపథ్యంలోనే ఏపీ బీజేపీ నేతలు, ‘చంద్రబాబు – జైలు వ్యవహారాల’ గురించి ప్రముఖంగా మాట్లాడుతున్నారనీ అర్థమవుతోంది.

జరుగుతున్న పరిణామాలపై ఎప్పటికప్పుడు విశ్లేషించుకుంటున్న టీడీపీ, ఎలాంటి ఉపద్రవం ఎదురైనా తాము సిద్ధమేనన్నట్లు వ్యవహరిస్తోంది. మరోపక్క చంద్రబాబు కాకుండా, లోకేష్‌ని తొలుత టార్గెట్‌ చేస్తారనీ, రాష్ట్ర స్థాయిలో కేంద్రం స్థాయిలో ఒకేసారి ఈ ‘దాడి’ జరగబోతోందనీ రాజకీయ వర్గాల్లో గుసగుసలు విన్పిస్తున్నాయి.