జస్ట్ ఆస్కింగ్: ‘అమర్ రాజా’ని వాళ్ళెందుకు ఆహ్వానిస్తున్నారు.?

అమర్ రాజా బ్యాటరీస్.. ఇప్పుడీ పేరు తెలుగు నాట మార్మోగిపోతోంది. నిజానికి, అమర్ రాజా బ్యాటరీస్ పట్ల తెలుగు రాష్ట్రాల్లో ఎప్పటినుంచో సాఫ్ట్ కార్నర్ ఒకటి వుంది. కారణం, ఆ సంస్థకున్న రెప్యుటేషన్. రాజకీయ నేపథ్యం ఈ పరిశ్రమకు వున్నా, ఎప్పుడూ ఈ సంస్థ మీద రాజకీయ పరమైన ఆరోపణలు రాలేదు.

గల్లా కుటుంబం నుంచి ప్రస్తుతం గల్లా జయదేవ్ యాక్టివ్ పాలిటిక్స్‌లో వున్నారు. గతంలోనూ గల్లా కుటుంబం తెలుగు రాజకీయాల్లో కీలక పాత్ర పోషించినా, అప్పుడెప్పుడూ అమర్ రాజా బ్యాటరీస్ సంస్థ వివాదాల్లోకెక్కలేదు. చిత్రమేంటంటే, గల్లా కుటుంబానికి రాజకీయ ప్రత్యర్థులైనవారూ, అమర్ రాజా సంస్థను అభినందించేవారు.

కానీ, ఇప్పుడు సీన్ మారింది. కాలుష్యం తీవ్రత ఎక్కవ కావడంతో, అమర్ రాజా బ్యాటరీస్ సంస్థను తలరించాలని తామే కోరినట్లు ప్రభుత్వంలోని పలువురు కీలక వ్యక్తులు చెబుతున్నారు. ‘వాళ్ళు వెళ్ళిపోవడం కాదు, మేమే పొమ్మన్నాం..’ అని ప్రభుత్వ పెద్దలు ఓ పక్క చెబుతూనే, ఇంకోపక్క, ‘ప్రభుత్వం పరిశ్రమలపై రాజకీయ పెత్తనం చేస్తోంది..’ అంటూ జరుగుతున్న ప్రచారాన్ని ఖండిస్తుండడం అందర్నీ విస్మయానికి గురిచేస్తోంది.

సరే, అమర్ రాజా సంస్థకు సంబంధించి పరిశ్రమల ద్వారా కాలుష్యం విపరీతమైన స్థాయిలో పుట్టుకొస్తోందనే అనుకుందాం. కానీ, దానికి మూసివేత ఒకటే మార్గమా.? కాలుష్యం అంత తీవ్ర స్థాయిలో పరిశ్రమ నుంచి వస్తున్న మాటే నిజమైతే, అలాంటి పరిశ్రమల్ని ఏ రాష్ట్రమూ కోరుకోదు. మరి, తెలంగాణ, తమిళనాడు, కర్నాటక తదితర రాష్ట్రాలెందుకు అమర్ రాజా సంస్థకు ఆహ్వానం పలుకుతున్నాయట.? ఈ ప్రశ్నకు ప్రభుత్వ పెద్దలే సమాధానం చెప్పాలి.

అధికార పార్టీకి చెందిన నేతల తాలూకు క్వారీల్లో నిబంధనల ఉల్లంఘన జరగినా, ఆల్ ఈజ్ వెల్. అదే విపక్ష పార్టీలకు చెందిన నేతల క్వారీల్లో అంతా బాగున్నా.. కేసులు, జరీమానాలు హంగామా. ఇదెక్కడి తీరు.? అక్కడిదాకా ఎందుకు.? ప్రజా వేదికను అమరావతిలో కూల్చేశారు.. మరి, ఆ పక్కనే వున్న అక్రమ భవనాల్ని గడచిన రెండేళ్ళలో ఎందుకు కూల్చలేదు.? ఓ పద్ధతీ పాడూ లేని పాలన కారణంగానే రాష్ట్రంలో ఇలాంటి దురదృష్టకర పరిణామాలన్న భావన ప్రజల్లో రోజురోజుకీ బలపడుతోందంటే, అందుక్కారణం.. పరిపాలనలో డొల్లతనమే.