విశాఖ ఉక్కు చుట్టూ ‘తుక్కు’ రాజకీయం.!

రాష్ట్రంలో అధికారంలో వుంది గనుక, వైసీపీ విశాఖ ఉక్కు పరిశ్రమ విషయమై ఏం చేయగలదో జనసేన అధినేత పవన్ కళ్యాణ్ కొన్ని సూచనలు చేశారు. ఆ సూచనలు వైసీపీకి అస్సలేమాత్రం నచ్చలేదు. నచ్చవు కూడా. ఎందుకంటే, వైసీపీ హయాలోనే విశాఖ ఉక్కు ప్రైవేటీకరణ దిశగా కీలకమైన వ్యవహారాలు నడిచాయి. చంద్రబాబు హయాంలో ప్లానింగ్, జగన్ హయాంలో పనులు.. ఇదీ పరిస్థితి.

ఉక్కు పరిశ్రమ నుంచి కేంద్రం తన వాటాల్ని వెనక్కి తీసుకుని, ప్రైవేటుకి ఆ పరిశ్రమను అప్పగించాలనే ప్రయత్నం చేస్తోందంటే, రాష్ట్ర ప్రభుత్వానికి తెలియకుండా వుంటుందా.? చంద్రబాబు హయాంలోనూ ‘సీక్రెసీ’ మెయిన్‌టెయిన్ చేశారు.. వైసీపీ హయాంలోనూ అదే జరుగుతోంది. బీజేపీది ఇలాంటి విషయాల్లో చాలా చిత్రమైన వైఖరి. కేంద్ర ప్రభుత్వం వేరు.. బీజేపీ వేరు.. అని చెప్పడం ఆ పార్టీ నేతలకు వెన్నతో పెట్టిన విద్య. అమరావతి విషయంలోనూ ఇదే వైఖరి, విశాఖ ఉక్కు విషయంలోనూ ఇదే వైఖరి.

సరే, కాస్సేపు కేంద్రం సంగతి పక్కన పెడదాం.. రాష్ట్రంలో రాజకీయ పార్టీలకు ఏమయ్యింది.? వైసీపీ కావొచ్చు, టీడీపీ కావొచ్చు.. విశాఖ ఉక్కు ప్రైవేటీకరణకు నిరసనగా గల్లీలో కాకుండా ఢిల్లీలో ఏం చేస్తున్నాయి.? రాష్ట్రం తరఫున జనసేన అధినేత పవన్ కళ్యాణ్ ఢిల్లీకి వెళ్ళారు, కేంద్ర హోం శాఖ మంత్రి అమిత్ షా సహా పలువురు కేంద్ర ప్రభుత్వ పెద్దలు, బీజేపీ పెద్దలతో విశాఖ స్టీల్ ప్లాంటు ప్రైవేటీకరణకు వ్యతిరేకంగా చర్చలు జరిపారు.

పవన్ కళ్యాణ్ చెప్పగానే, ప్రైవేటీకరణ నుంచి వెనక్కి తగ్గేందుకు కేంద్రం సిద్ధమవుతుందా.? అన్నది వేరే చర్చ. కానీ, ప్రయత్నమంటూ జరగాలి కదా.? దేశ రాజకీయాల్లో ఒకప్పుడు చక్రం తిప్పేశానని చెప్పుకునే టీడీపీ అధినేత చంద్రబాబు, ఇప్పటిదాకా ఈ విషయమై జాతీయ స్థాయిలో ఎందుకు కార్యాచరణ చేపట్టలేదు.? ముఖ్యమంత్రి వైఎస్ జగన్ ఎందుకు ఢిల్లీకి వెళ్ళడంలేదు.? ఇటు టీడీపీ అధినేత చంద్రబాబుకీ, అటు వైసీపీ అధినేత వైఎస్ జగన్ మోహన్ రెడ్డి, రాష్ట్రంలో రాజకీయ ప్రయోజనాలు అవసరం.. రాష్ట్ర ప్రయోజనాలు అనవసరం.

గల్లీలో చెయ్యాల్సిన పోరాటం కాదిది. ఢిల్లీలో పోరాటం చేయాలి. అది మానేసి.. పవన్ కళ్యాణ్ మీద విమర్శలు చేస్తే ఉపయోగమేంటి.? టీడీపీ – వైసీపీ పరస్పర విమర్శలతో కేంద్రానికి అదనపు రాజకీయ లబ్ది తప్ప, విశాఖ ఉక్క ఉద్యమానికి ఈ రాజకీయం ఏమాత్రం ఉపయోగపడదు. విశాఖ జిల్లాలో ఓడిన పవన్, విశాఖ ఉక్కు ప్రైవేటీకరణకు వ్యతిరేకంగా ఢిల్లీలో తనవంతు ప్రయత్నాలు చేస్తున్నారు. గెలిచిన వైసీపీ, టీడీపీ.. రాష్ట్ర ప్రయోజనాల్ని పక్కన పెట్టి, పరస్పర రాజకీయ విమర్శలతో సమస్యను పక్కదారి పట్టిస్తున్నాయన్న విషయాన్ని రాష్ట్ర ప్రజలు గమనిస్తున్నారు.