Vishwak Sen: హీరో విశ్వక్ సేన్ (Vishwak Sen) .. తమిళ హీరో అర్జున్ దర్శకత్వంలో సినిమా విషయంలో ఇరువురి మధ్యా వివాదం తలెత్తిన సంగతి తెలిసిందే. విశ్వక్ సేన్ కు కమిట్ మెంట్ లేదంటూ అర్జున్ ప్రెస్ పెట్టడం తీవ్ర చర్చనీయాంశమయింది కూడా. దీనిపై ఓ ఇంటర్వ్యూలో విశ్వక్ సేన్ స్పందించారు.
‘నేను సినిమా క్యాన్సిల్ చేయమని చెప్పలేదు. ఒక్కరోజు షూటింగ్ ఆపమని మాత్రమే చెప్పాను. దీనికే అర్జున్ మా ఇంటికొచ్చి మావాళ్లతో కూడా మాట్లాడారు. నేను తీసుకున్న పారితోషికానికి రెట్టింపు వెనక్కి ఇచ్చేశా. అందువల్ల ఎవరికీ సమాధానం చెప్పాల్సిన అవసరం కూడా లేదు. దీనిని ఎక్కువగా సాగదీయడం కూడా నాకిష్టం లేదు’.
‘ఇదే తీరు బ్యాక్ గ్రౌండ్ ఉన్న హీరోకు ఎదురైతే ఏమయ్యేది..? నాకు బ్యాక్ గ్రౌండ్ లేదు కాబట్టే ఆయన ప్రెస్ మీట్ పెట్టారు. జరిగిన పరిణామాలు ఎవరికీ తెలీదు. ఆయన కోపంలో చేసిన పనికి నేనే ఎక్కువగా నష్టపోయాన’ని అన్నారు. ప్రస్తుతం విశ్వక్ నటించిన గామి విడుదలకు సిద్ధంగా ఉంది.