తెలంగాణలో గులాబీ బాస్‌కి దెబ్బ మీద దెబ్బ తగులుతోంది. ఆర్టీసీ కార్మికులు సెల్ఫ్‌ డిస్మిస్‌ అయ్యారంటూ కేసీఆర్‌ ‘ఫత్వా’ జారీ చేసినట్లు వ్యవహరిస్తే, హైకోర్టు మొట్టికాయలేసింది. ఆర్టీసీ కార్మికులతో చర్చలు జరపాలంటూ హైకోర్టు ఆదేశాలు జారీ చేసిన విషయం విదితమే. మరోపక్క, తమ జీతాల విషయమై ఆర్టీసీ కార్మికులు కోర్టును ఆశ్రయిస్తే, ‘తక్షణం జీతాలు చెల్లించాలి..’ అంటూ న్యాయస్థానం ఆదేశించడం గమనార్హం.
న్యాయస్థానం ఆదేశాలతో సోమవారం లోగా ఆర్టీసీ కార్మికులకు జీతాలు అందనున్నాయి. మరోపక్క, ఆర్టీసీ ఎండీ నియామకం దిశగా ప్రభుత్వం అడుగులు వేగంగా వేస్తోంది. అదొక్కటే కాదు, ఆర్టీసీ కార్మికులతో చర్చల కోసం ఓ కమిటీని కూడా ఏర్పాటు చేయాల్సి వుంది ప్రభుత్వం. ఇందుకోసం పలువురు మంత్రులు, అధికారుల పేర్లను స్వయంగా ముఖ్యమంత్రి కేసీఆర్‌ ఖరారు చేయాల్సి రావడం గమనార్హం. ఆర్టీసీ కార్మికులు సమ్మెకు దిగుతామని హెచ్చరించినప్పుడే ప్రభుత్వం సానుకూలంగా వారి సమస్యల పట్ల స్పందించి వుంటే.. ప్రజలకు ఇప్పుడు ఈ సమస్యలు వచ్చి వుండేవి కావు.
ఆర్టీసీ సమ్మె కారణంగా విద్యా సంస్థలకు కేసీఆర్‌ సర్కార్‌ సెలవులు ప్రకటించడం కూడా వివాదాస్పదంగా మారింది. విద్యార్థి లోకం, కేసీఆర్‌ సర్కార్‌ పట్ల తీవ్ర అసహనం వ్యక్తం చేస్తోంది. ఒక్క ఆర్టీసీ సమ్మె.. తెలంగాణలో టీఆర్‌ఎస్‌ ఇమేజ్‌ని దారుణంగా దెబ్బతీసింది. మరీ ముఖ్యంగా గులాబీ బాస్‌, తెలంగాణ ముఖ్యమంత్రి కేసీఆర్‌.. ఈ వ్యవహారంతో పూర్తిగా తన ఇమేజ్‌ని చెడగొట్టుకున్నట్లయ్యిందని టీఆర్‌ఎస్‌ నేతలే ఆఫ్‌ ది రికార్డ్‌గా వ్యాఖ్యానిస్తోన్న పరిస్థితి.
‘ఇలాంటి మొండి వైఖరితో ప్రభుత్వానికీ, పార్టీకీ తీవ్ర నష్టం వాటిల్లుతుంది.. గత ఐదేళ్ళలో లేని అహంకారం, ఇప్పుడే ఎందుకు పుట్టుకొచ్చిందో అర్థం కావడంలేదు..’ అంటూ పార్టీ సీనియర్‌ నేత ఒకరు తన సన్నిహితుల వద్ద వాపోవడం, ఆ తర్వాత.. అది స్వయంగా కేసీఆర్‌ దృష్టికి వెళ్ళడంతో సదరు సీనియర్‌ నేతపైనా కేసీఆర్‌ గుస్సా అయినట్లు తెలుస్తోంది. ఏదిఏమైనా, తెలంగాణ ముఖ్యమంత్రి కేసీఆర్‌పై తెలంగాణ ఆర్టీసీ కార్మికులకు వరుస విజయాలు దక్కుతుండడం విశేషమే మరి.
800169 255642This really is a excellent subject to talk about. Sometimes I fav stuff like this on Redit. I dont feel this would be the top to submit though. Ill take a look about your internet site though and submit something else. 385418