వైఎస్సార్సీపీకి ఏపీలో టఫ్‌ టైమ్ మొదలైనట్లేనా.?

ఇటీవలే ముఖ్యమంత్రి వైఎస్‌ జగన్‌ మోహన్‌రెడ్డి ఏడాది పాలనని పూర్తి చేసుకున్నారు. రెండో ఏడాదిలో ఆయన ముందు చాలా సవాళ్ళున్నాయి. సంక్షేమ పథకాలతో ప్రజల మెప్పు పొందగలిగామని తొలి ఏడాది ‘పాజిటివ్‌ రిపోర్ట్‌’ చూసుకుని తమలో తామే మురిసిపోతున్నారు వైసీపీ నేతలు. మంత్రులు, ఎంపీలు, ఎమ్మెల్యేలు.. ముఖ్యమంత్రికి ఇచ్చే ఫీడ్‌బ్యాక్‌ ఎట్టి పరిస్థితుల్లోనూ నెగెటివ్‌గా వుండే పరిస్థితి లేదు.

కానీ, ముఖ్యమంత్రి గ్రౌండ్‌ లెవ్‌లో ఏం జరుగుతుందోనన్న విషయాన్ని తెలుసుకోగలగాలి. ఆ విషయం పక్కన పెడితే, గత కొద్ది రోజులుగా విపక్షాలు చాలా యాక్టివ్‌ అవుతున్నాయి. టీడీపీ, జనసేన – బీజేపీ, వామపక్షాలు.. ఆఖరికి కాంగ్రెస్‌ పార్టీ కూడా తనవంతుగా యాక్టివ్‌ రోల్‌ పోషించాలనుకుంటోంది రాష్ట్రంలో. గడచిన ఏడాది కాలంలో ప్రభుత్వం చెప్పుకుంటున్న గొప్పల సంగతి పక్కన పెడితే, చాలా మైనస్‌లూ లేకపోలేదు. వాటి మీదనే విపక్షాలు ఎక్కవగా ఫోకస్‌ పెడ్తాయి.

ఇసుక దగ్గర్నుంచి మద్యం వరకూ.. అన్ని విషయాల మీదా ఫోకస్‌ పెడుతూ, సోషల్‌ మీడియా వేదికగా అధికార పార్టీ వైఫల్యాల్ని ఎత్తి చూపుతున్నాయి విపక్షాలు. ఈ విషయంలో టీడీపీ, జనసేన, బీజేపీతోపాటు.. కాంగ్రెస్‌ పార్టీ కూడా తన ఉనికిని చాటుకుంటుండడం గమనార్హం.

ప్రధానంగా టీడీపీ, తనకు సోషల్‌ మీడియాలో వున్న బలాన్ని మేగ్జిమమ్ చూపించేస్తోంది వైఎస్సార్సీపీకి వ్యతిరేకంగా. ఓ పక్క ప్రభుత్వ వ్యతిరేక వ్యాఖ్యల నేపథ్యంలో సోషల్‌ మీడియాపై జగన్‌ సర్కార్‌ ఉక్కుపాదం మోపుతోందంటూ గగ్గోలు పెడ్తున్న టీడీపీ, ఇంకోపక్క సోషల్‌ మీడియా వేదికగా తన పోరాటాన్ని మరింత ఉధృతం చేసింది.

ఇక, జనసేన విషయానికొస్తే.. కన్‌స్ట్రక్టివ్‌ క్రిటిసిజమ్ మాత్రమే కన్పిస్తోంది జనసైనికుల నుంచి. పవన్‌కళ్యాణ్‌కి వున్న అశేషమైన సినీ అభిమానులు మాత్రం, హద్దులు దాటేస్తున్నారనుకోండి.. అది వేరే విషయం. రాష్ట్ర వ్యాప్తంగా వైఎస్‌ జగన్‌ పాలనకి సంబంధించి ఎక్కడ ఏ లోటుపాటు జరిగినా.. అది ముందుగా సోషల్‌ మీడియాకే ఎక్కుతోంది. ఫొటోలు, వీడియోలతో సహా సోషల్‌ మీడియాలో పోస్ట్‌ చేస్తూ జగన్‌ సర్కార్‌ వైఫల్యాల్ని నిలదీస్తున్నారు నెటిజన్లు.

ఈ క్రమంలో టీడీపీ ఫస్ట్‌ ప్లేస్‌లో వున్నా, ఆ పార్టీ నుంచి ఎక్కువగా వివాదాస్పద పోస్టింగ్స్‌ వుంటున్నాయి. జనసేన మాత్రం కన్‌స్ట్రక్టివ్‌ క్రిటిసిజంలో ముందు వరుసలో వుంటోంది. ‘ప్రభుత్వం సోషల్‌ మీడియాపై ఉక్కుపాదం మోపుతున్న దరిమిలా జనసైనికులు సంయమనం పాటించాలి..’ అంటూ పదే పదే జనసేనాని విజ్ఞప్తి చేస్తోన్న విషయం విదితమే. మొత్తమ్మీద, ఆంధ్రప్రదేశ్‌లో వైఎస్సార్సీపీకి ముందు ముందు మరింత ‘టఫ్‌’ కాబోతోందన్నమాట రాజకీయంగా.