ప్రీ ఫైనల్ ఎగ్జామ్‌గా పోల్చొచ్చు తెలంగాణ అసెంబ్లీ ఎన్నికల్ని, జనసేన పార్టీకి సంబంధించినంతవరకు. ఎనిమిది సీట్లలో జనసేన పోటీ చేస్తోంది.. అదీ, బీజేపీతో పొత్తు పెట్టుకుని.! టీడీపీ కూడా జనసేనకి మిత్రపక్షమే.. కాకపోతే, ఆంధ్రప్రదేశ్‌లో మాత్రమే ఆ పొత్తు వున్నట్లు టీడీపీ వ్యవహరిస్తోంది.
తెలంగాణలో కాంగ్రెస్ పార్టీకి టీడీపీ సహకరిస్తోంది. కొన్ని చోట్ల బీఆర్ఎస్ పార్టీకి కూడా టీడీపీ సహకరిస్తోంది. ఇటు జనసేనకుగానీ, అటు బీజేపీకిగానీ టీడీపీ అస్సలు సహకరించడంలేదు. టీడీపీ క్యాడర్ అయితే, తెలంగాణలో జనసేన పార్టీని రాజకీయ ప్రత్యర్థిగా చూస్తుండడం గమనార్హం.
ఎందుకీ పరిస్థితి.? అంటే, దానికి సమాధానం వెతకడం పెద్ద కష్టమేమీ కాదు.! తప్పక, ఆంధ్రప్రదేశ్‌లో టీడీపీ, జనసేనతో పొత్తుకి ముందుకొచ్చింది. వైసీపీ వ్యతిరేక ఓటు చీలనివ్వను.. అని జనసేనాని ప్రకటించకముందే, ‘జనసేనతో పొత్తు కోసం ప్రయత్నిస్తున్నాం.. అట్నుంచి స్పందన లేదు..’ అని టీడీపీ అధినేత చంద్రబాబు ప్రకటించడం విన్నాం.
జనసేనతో స్నేహాన్ని టీడీపీ కోరుకున్నప్పుడు, ఆ జనసేనకు తెలంగాణలోనూ సహకరించాలి కదా.? సహకరించకపోతే, సహకరించకపోయారు.. జనసేనకు వ్యతిరేకంగా పని చేయడమేంటి.? కింది స్థాయిలో టీడీపీ మద్దతుదారుల వ్యవహారాన్ని పక్కన పెడితే, టీడీపీ అను‘కుల’ మీడియా, జనసేనకు వ్యతిరేకంగా వ్యవహరిస్తుండడం గమనార్హం.
ఈ మొత్తం వ్యవహారాన్ని జనసేన పార్టీ ఒకింత లోతుగానే అధ్యయనం చేస్తోంది. బూత్ లెవల్‌లో పరిస్థితులు ఎలా వున్నాయి.? ఎలా ఓట్లు పడబోతున్నాయి.? వంటి అంశాల ఆధారంగా, ఆంధ్రప్రదేశ్ రాజకీయాలపై జనసేన ఓ కీలక నిర్ణయం ముందు ముందు తీసుకోవచ్చు.
తెలంగాణలో కుదరని సఖ్యత, ఏపీలో కుదురుతుందా.? జనసేనకు టీడీపీ సహకరించకుండా, టీడీపీకి జనసేన సహకరించాలన్న టీడీపీ దురాలోచనపై జనసేన ఓ కన్నేయకుండా వుంటుందా.? అందుకే, తెలంగాణ ఎన్నికల్ని జనసేన ప్రీ-ఫైనల్‌గా చూస్తోంది.