తూకాలు, వడ్లు.! జనసేన దెబ్బకు గింజుకుంటోన్న టీడీపీ.!

ఒకే ఒక్క శాతం ఓట్లు, ఓ రాజకీయ పార్టీకి అధికారాన్ని దూరం చేయొచ్చు. ఆ ఒక్క శాతం ఓట్లు ఏకంగా పాతిక ముప్ఫయ్ అసెంబ్లీ సీట్ల వ్యత్యాసాన్ని తీసుకురావొచ్చు.! ప్రస్తుత ప్రతిపక్షం తెలుగుదేశం పార్టీకీ, ప్రస్తుత అధికార పక్షం వైఎస్సార్ కాంగ్రెస్ పార్టీకీ తెలిసిన విషయమే ఇది.

20‌14 ఎన్నికల్లో తాము చాలా తక్కు శాతం ఓట్లతో ఓడిపోయామని అప్పట్లో వైసీపీ అధినేత వైఎస్ జగన్ మోహన్ రెడ్డి గింజుకునేవారు. 2019 ఎన్నికల్లో మాకు ఓట్ల శాతం బాగానే వచ్చిందిగానీ.. అంటూ టీడీపీ అధినేత నారా చంద్రబాబునాయుడు ఇంకా గింజుకుంటూనే వున్నారు. గతంలో ప్రజారాజ్యం పార్టీ తమ విజయావకాశాల్ని దెబ్బ తీసిందని చంద్రబాబు అప్పట్లో చిమ్మిన విషం గురించి ఎంత చెప్పుకున్నా తక్కువే.

తాజాగా, టీడీపీ సీనియర్ నేత గోరంట్ల బుచ్చయ్య చౌదరి, ‘ఖ్వింటా (నిజానికి అది ఖ్వింటా కాదు.. క్వింటా) కాట తూగడానికి ఒక్కోసారి కొన్ని వడ్లు అవసరం అవుతాయి. కానీ, ఆ కొన్ని వడ్లు వల్లనే మొత్తం కాట తుగింది అనుకుంటే ఎలా సేనాధిపతి.!’ అంటూ ట్విట్టర్‌లో జనసేన అధినేత పవన్ కళ్యాణ్‌ని ఎగతాళి చేశారు.

‘గతంలో మేం తగ్గాం.. ఈసారి మీరు తగ్గాలి..’ అంటూ టీడీపీ అధినేత చంద్రబాబుని ఉద్దేశించి, జనసేన అధినేత చేసిన వ్యాఖ్యల నేపథ్యంలో టీడీపీ ఉలిక్కిపడింది. జనసేన మీద వెటకారాలు షురూ చేసింది. అసలంటూ, జనసేనకు వలపు బాణం విసిరిందే టీడీపీ. ‘వన్ సైడ్ లవ్..’ అంటూ చంద్రబాబే దేబిరించారు.

‘రెండు చోట్లా ఓడిపోయాను.. నాకేమన్నా నష్టం వచ్చిందా.? నేను అప్పుడెలా వున్నానో, ఇప్పుడూ అలాగే వున్నాను.. రాష్ట్ర ప్రజలే నష్టపోతున్నారు.. రాష్ట్రమే నష్టపోతోంది..’ అంటూ జనసేన అధినేత, రాష్ట్ర రాజకీయాల గురించీ, జనసేన ఓటమి గురించీ ఇటీవల చేసిన వ్యాఖ్యలు జనాన్ని ఆలోచనలో పడేశాయి. ఈ నేపథ్యంలో, జనంలో వస్తున్న మార్పు అధికార వైసీపీకీ, ప్రతిపక్షం తెలుగుదేశం పార్టీకీ చెమటలు పట్టిస్తోంది.

టీడీపీ గనుక, గోరంట్ల చెబుతున్నట్లు జనసేన పార్టీని ‘కొన్ని వడ్లు’ అని లైట్ తీసుకుంటే, తూకంలో ఆ వడ్లు తేడా వచ్చే.. టీడీపీ మరోమారు ఓటమి చూడాల్సి వస్తుంది. అప్పడిక, టీడీపీ మూతపడిపోవాల్సిందే.. ఇంకో ఆప్షన్ లేదు.