జస్ట్‌ ఆస్కింగ్‌.. 3 క్యాపిటల్స్‌ ఎపిసోడ్‌లో నారా లోకేష్‌ ‘మిస్సింగ్‌’.!

రాష్ట్రంలో మూడు రాజధానుల వ్యవహారంపై టీడీపీ నానా యాగీ చేస్తోంది. అమరావతి రైతులు ఉద్యమం కొనసాగిస్తూనే వున్నారు. వైసీపీ మాత్రం ఎట్టి పరిస్థితుల్లోనూ మూడు రాజధానులకే కట్టుబడి వున్నామంటోంది. హైకోర్టు ‘స్టేటస్‌ కో’ ఆదేశాలు ఇచ్చి వుండకపోతే, రాజధాని తరలింపు ప్రక్రియ ఈపాటికే ప్రారంభమయ్యేది. ఇంతా జరుగుతున్నా టీడీపీ అధినేత నారా లోక్‌ష్‌, గ్రౌండ్‌లోకి దిగడంలేదు. కరోనా నేపథ్యంలో టీడీపీ అధినేత నారా చంద్రబాబునాయుడు హైద్రాబాద్‌కే పరిమితమయిపోయారని సరిపెట్టుకుంటోన్న తెలుగు తమ్ముళ్ళు నారా లోకేష్‌ విషయంలో మాత్రం ఒకింత అసహనంతోనే వున్నట్లు కన్పిస్తోంది. శాసనమండలిలో యాగీ చేశారు.. ఇంకేదో హంగామా చేశారు. అదంతా గతం. మరి, ఇప్పుడేంటి.?

పార్టీ నేతలు అరెస్ట్‌ అయితే.. హుటాహుటిన అటు శ్రీకాకుళం.. ఇటు రాయలసీమకు వెళ్ళిన లోకేష్‌, అమరావతికి ఇప్పుడెందుకు వెళ్ళడంలేదు.? రైతులకు భరోసాగా నిలబడి.. వారి తరఫున పోరాటం ఎందుకు చేయడంలేదు.? ఈ ప్రశ్న అమరావతి రైతుల్లోనూ కొంత అనుమానాలకు తావిస్తోన్న మాట వాస్తవం. ‘బహుశా టీడీపీ, అమరావతి విషయంలో ఆశలు వదిలేసుకున్నట్లుంది..’ అన్నది కొందరు తెలుగు తమ్ముళ్ళ ఆలోచన అయితే, మరికొందరు తెలుగు తమ్ముళ్ళు, అసలు లోకేష్‌ ఎప్పుడన్నా ఏ విషయమ్మీద అయినా గట్టిగా నిలబడ్డారా.? అని ప్రశ్నిస్తున్నారట. పైకి గట్టిగా ప్రశ్నించలేకపోయినా, తెలుగు తమ్ముళ్ళు సోషల్‌ మీడియా వేదికగా సంధిస్తోన్న ఈ ప్రశ్నలకు టీడీపీ అధిష్టానం వద్దనైనా సమాధానం వుందా.?

ప్రత్యక్ష పోరాటానికి దిగే సాహసం చేయలేకపోతోన్న టీడీపీ జాతీయ ప్రధాన కార్యదర్శి నారా లోకేష్‌, సోషల్‌ మీడియాలో మాత్రం వెరీ వెరీ యాక్టివ్‌గానే వుంటున్నారు. అలాగని, సోషల్‌ మీడియాలో లోకేష్‌ గాండ్రిపులకు ఎవరైనా భయపడే పరిస్థితి వుందని అనగలమా.? ఛాన్సే లేదు. పైగా, లోకేష్‌ ఏ ట్వీటేసినా.. దానికి మద్దతుగా వచ్చే కామెంట్ల కంటే, నెగెటివ్‌గా వచ్చే కామెంట్లే ఎక్కువ మరి.