అన్నిటికీ చంద్రబాబే కారణమైతే, వైఎస్ జగన్ ఎందుకు.?

అదీ ఇదీ అని కాదు.. అన్నిటికీ చంద్రబాబే కారణం. గొప్పలకు మాత్రం వైఎస్ జగన్ పేరు కావాలి. తిట్టడానికైతే చంద్రబాబు పేరు అందరికన్నా ముందు గుర్తుకొచ్చేస్తుంటుంది ఆంధ్రపదేశ్ రాష్ట్రంలో అధికారం వెలగబెడుతోన్న వైఎస్సార్ కాంగ్రెస్ పార్టీకి.

2014 నుంచి ఇప్పటిదాకా పరిస్థితుల్ని తీసుకుంటే.. నిజమే, రాష్ట్రం ఇంతలా భ్రష్టుపట్టిపోవడానికి టీడీపీ పాలనే కారణం. మరి, గడచిన రెండేళ్ళలో వైఎస్సార్ కాంగ్రెస్ పార్టీ ఏం చేసింది.? అధికారంలోకి వచ్చాక ఏం సాధించింది.? ప్రత్యేక హోదా వచ్చిందా.? కేంద్రం మెడల్ని వైసీపీ ఎందుకు వంచలేకపోయింది.? మళ్ళీ ఈ ప్రశ్నలకీ చంద్రబాబు పేరే సమాధానంగా చూపిస్తూ విమర్శిస్తోంది వైసీపీ. ఇంకెంతకాలం ఈ డ్రామాలు.? తన జీవితంలో ఎప్పుడూ నిజం చెప్పకూడదనే శాపం చంద్రబాబుకి వుందని వైసీపీ పదే పదే చెబుతుంటుంది. మరి, వైసీపీకి కూడా అలాంటి శాపమే ఏదో తగిలి వుంటుంది. అందుకే, నిజాలు చెప్పడం మానేసింది వైసీపీ.

ఐదేళ్ళ చంద్రబాబు పాలన నచ్చక, ప్రజలు ఆ పార్టీని ఇంటికి పంపించేశారన్నది వైసీపీ చెబుతున్న మాట. రాష్ట్రంలో ఓటర్లు ఎంతమంది.? టీడీపీకి ఎంతమంది ఓట్లేశారు.? వైసీపీకి ఎంతమంది ఓట్లేశారు.? అంటే, ఏ పార్టీనీ ప్రజలు తిరస్కరించే పరిస్థితి వుండదు. ఆ పార్టీ కంటే ఈ పార్టీ మెరుగైంది.. అన్న కోణంలో ఎక్కువ ఓట్లు పడితే అలా ఎక్కువ ఓట్లు దక్కించుకున్న పార్టీ అధికారంలోకి వస్తుంది. ఒక్క ఓటు తెచ్చుకున్నా.. ఆ పార్టీని రాష్ట్రంలో ఎవరో ఒకరు విశ్వసిస్తున్నట్టే లెక్క. సరే, ఇప్పుడున్న రాజకీయాల్లో ఇలాంటి వాదనలకు అర్థం లేదనుకోండి.. అది వేరే సంగతి.

ప్రత్యేక హోదా, పోలవరం ప్రాజెక్టు, రాజధాని అమరావతి, దుగరాజపట్నం పోర్టు, కడప స్టీలు ప్లాంటు, విశాఖ రైల్వే జోన్, పలు కేంద్ర విద్యా సంస్థలు, ఇతరత్రా జాతీయ సంస్థల ఏర్పాటు.. వీటన్నటి స్టేటస్ గడచిన రెండేళ్ళలో మెరుగుపడిందా.? లేదా.? ఇలాంటి పనికొచ్చే ప్రశ్నలకు వైసీపీ వద్ద సమాధానం దొరకదు. అన్నిటికీ చంద్రబాబే కారణం.. రాష్ట్రంలో ఇసుక సమస్యకీ, మద్యం ధరల పెరుగుదలకీ, అస్తవ్యస్థమైన రోడ్లకీ.. అన్నిటికీ చంద్రబాబే కారణం. మరి, వైసీపీ అధికారంలో వుండడం ఎందుకు దండగ కాకపోతే.?