కొత్త కాన్సెప్ట్ గురూ.! ఇళ్ళకి స్టిక్కర్లు వేస్తారట.!

సొమ్ములెవరివి.? సోకులెవరివి.? వివిధ రకాలైన గుర్తింపు పత్రాల మీద ముఖ్యమంత్రి ఫొటోలు ఎందుకు.? అంటే, అదంతే.! ఎవరూ ప్రశ్నించరు.. ప్రశ్నించినా, బతకనిచ్చే పరిస్థితీ లేదు. రాజకీయాలే అలా తగలడ్డాయ్. జనం సొమ్ముతో సొంత పబ్లిసిటీ చేసుకోవడమన్నది రాజకీయాల్లో సర్వసాధారణమైపోయింది.

అధికారం ఎందుకు.? అంటే, జనం సొమ్ముని విచ్చలవిడిగా ఖర్చు చేస్తూ, తమ సొంత పబ్లిసిటీ చేసుకోవడానికేనని.. చాలా సినిమాల్లో ఆలోచనాత్మకమైన డైలాగుల్ని చూస్తుంటాం. అప్పుడు క్లాప్స్ కొడతాం.. నిజ జీవితంలో మాత్రం గమ్మునుంటాం.!

సరే, అసలు విషయానికొస్తే.. చంద్రబాబు హయాంలో అయినా, వైఎస్ జగన్ హయాంలో అయినా.. సంక్షేమ పథకాలంటే, అక్కడికేదో చంద్రబాబు లేదా వైఎస్ జగన్ మోహన్ రెడ్డి తమ సొంత సొమ్ముల్ని ఖర్చు చేస్తున్నట్లుగా ఫీలైపోతూ, ఆయా సంక్షేమ పథకాలకు సొంత పేర్లు పెట్టేసుకుంటూ వస్తున్న సంగతి తెలిసిందే.

తొండ ముదిరి.. ఊసరవెల్లిగా మారిన చందాన.. వివిధ రకాల గుర్తింపు పత్రాల మీదా ముఖ్యమంత్రుల బొమ్మలదాకా వెళ్ళింది పరిస్థితి. అది చాలదన్నట్టు, ఇప్పుడిక ఇళ్ళకి కూడా స్టిక్కర్లు వేస్తారట. సంక్షేమ పథకాలు అందుకున్న వారి ఇళ్ళకు స్టిక్కర్లు వేసే కార్యక్రమానికి శ్రీకారం చుడతారట.

దీనికోసం ముఖ్యమంత్రి వైఎస్ జగన్ మోహన్ రెడ్డి స్పష్టమైన దిశా నిర్దేశం చేస్తారట. ఎవరికి.? అధికారులకా.? వైసీపీ కార్యకర్తలకా.? ‘మా నమ్మకం నువ్వే – వైఎస్సార్ కాంగ్రెస్’ అని రాసి వున్న స్టిక్కర్లను ఇళ్ళకు అంటించబోతున్నట్లు వైసీపీ వర్గాలు చెబుతున్నాయి. ఇంకోపక్క, ప్రభుత్వం తరఫున కూడా వైసీపీ రంగుల్లోనే, వైఎస్ జగన్ మోహన్ రెడ్డి ఫొటోతోనే మరో స్టిక్కర్‌ని కూడా రెడీ చేస్తోందట.

సరిపోయింది సంబరం.! మొత్తంగా రాష్ట్రంలో జనాలందరి నెత్తినా వైఎస్ జగన్ పేరుతో పచ్చబొట్టు పొడిపించేస్తే సరి.. అంటూ సోషల్ మీడియా వేదికగా సెటైర్లు పడుతున్నాయ్. రాష్ట్రానికి రాజధాని ఏది.? ప్రత్యేక హోదా ఏది.? పోలవరం ప్రాజెక్టు ఏమైంది.? ఇవన్నీ అనవసరం ఎవరికీ.!