ఎప్పటినుండో ఊరిస్తూ వస్తోన్న అధీరా పాత్ర గురించి క్లారిటీ ఇచ్చింది కేజిఎఫ్ 2 టీమ్. ఈరోజు సంజయ్ దత్ పుట్టినరోజు సందర్భంగా అధీరా లుక్ ను విడుదల చేసాడు దర్శకుడు ప్రశాంత్ నీల్. అధీరా వంటి భయంకర పాత్రలో సంజయ్ దత్ సరిగ్గా సరిపోయాడనే చెప్పాలి. ఎంత భయంకరంగా ఉండాలో, ఎంత భయంకరంగా ఉంటే భీకరమైన రాకీ భాయ్ ను ఢీకొట్టేలా ఉంటాడో సరిగ్గా అలానే ఉన్నాడు సంజయ్ దత్.
వైకింగ్స్ ను స్ఫూర్తిగా తీసుకుని ఈ పాత్ర లుక్ ను రూపొందించినట్లు దర్శకుడు ప్రశాంత్ నీల్ స్పష్టం చేసాడు. ఈ లుక్ సంజయ్ దత్ కు సరిగ్గా సరిపోయింది. కేజిఎఫ్ 2 అత్యంత భారీ అంచనాలతో మన ముందుకు వస్తోన్న విషయం తెల్సిందే. అసలైతే అక్టోబర్ 23న ఈ సినిమాను విడుదల చేయాలనుకున్నారు. కానీ ప్రస్తుతం షూటింగులు నిలిచిపోవడంతో కనీసం ఈ ఏడాది చివరికైనా లేదా వచ్చే ఏడాది మొదట్లో కేజిఎఫ్ 2 ను విడుదల చేయాలని నిర్మాతలు భావిస్తున్నారు. హోంబేలె ఫిలింస్ ఈ చిత్రాన్ని నిర్మిస్తోంది.
కన్నడతో పాటు కేజిఎఫ్ 2 తెలుగు, హిందీ, తమిళ, మలయాళ భాషల్లో విడుదల కానుంది. రాకీ భాయ్ గా యష్ నటిస్తోన్న విషయం తెల్సిందే.