‘సాహో’తో ‘సైరా’.. తెలుగోడి సత్తా చాటాల్సిందేరా.!

కాస్త గ్యాప్‌లో రెండు తెలుగు సినిమాలు బాలీవుడ్‌ బాక్సాఫీస్‌పైనా సత్తా చాటేందుకు సిద్ధమవుతున్నాయి. అందులో ఒకటి ‘సాహో’ అయితే, ఇంకొకటి ‘సైరా నరసింహారెడ్డి’. రెబల్‌ స్టార్‌ ప్రభాస్‌ హీరోగా నటించిన ‘సాహో’ సినిమాపై ఆల్రెడీ బజ్‌ ఓ రేంజ్‌లో విన్పిస్తోంది. ‘సైరా నరసింహారెడ్డి’ టీజర్‌ రిలీజ్‌ ఈవెంట్‌ని ముంబైలో నిర్వహించాక ఈక్వేషన్స్‌ మరింత ఇంట్రెస్టింగ్‌గా మారాయి. ఇంకా ఆసక్తికరమైన విషయమేంటంటే, మెగాస్టార్‌ చిరంజీవిని రెబల్‌ స్టార్‌ ప్రభాస్‌ కలవడం.

‘సాహో’ ట్రైలర్‌ విడుదలయ్యాక చిరంజీవి తనను అభినందించారనీ, ఆ తర్వాత తాను చిరంజీవితో మాట్లాడినప్పుడు చాలా ఇన్‌స్పయిరింగ్‌గా అనిపించిందనీ ప్రభాస్‌ వ్యాఖ్యానించిన విషయం విదితమే. అయితే, సోషల్‌ మీడియాలో మాత్రం ప్రభాస్‌ అభిమానులకీ, మెగా అభిమానులకీ మధ్య ‘రచ్చ’ ఓ రేంజ్‌లో జరుగుతోంది. చాలా దారుణమైన కామెంట్స్‌ని చిరంజీవి మీద ప్రభాస్‌ అభిమానులు విసురుతున్నారు. దానికి కౌంటర్‌ ఇచ్చే క్రమంలో మెగా అభిమానులు కూడా హద్దులు దాటుతున్న మాట వాస్తవం.

అయితే, ఇకపై అలాంటి ‘చెత్త కామెంట్లు’ సోషల్‌ మీడియాలో కన్పించకపోవచ్చు. ఎందుకంటే చిరంజీవి – ప్రభాస్‌ కలిసి ఫొటోలకు పోజులిచ్చారు మరి.! నిజానికి తెలుగు సినీ పరిశ్రమలో ఏ హీరో కూడా ఇంకో హీరో సినిమా ఫ్లాపవ్వాలని కోరుకోడు. అంతిమంగా అన్ని సినిమాలూ విజయం సాధిస్తేనే, తెలుగు సినిమా గౌరవం పెరుగుతుందని అందరూ భావిస్తారు.

తెలుగు సినిమా బాలీవుడ్‌ బాక్సాఫీస్‌ని శాసించే స్థాయికి చేరింది. అది కొనసాగాలంటే, తెలుగు సినీ పరిశ్రమ నుంచి వచ్చే ప్రతి పెద్ద సినిమా.. బాలీవుడ్‌లోనూ సత్తా చాటాలి. ఈ క్రమంలో ‘సాహో’, ‘సైరా నరసింహారెడ్డి’ ఆల్రెడీ రేసులోకి వచ్చేశాయి. వచ్చే ఏడాది ‘ఆర్‌ఆర్‌ఆర్‌’ ఎలాగూ వుంటుంది. ‘సాహో’ అయినా, ‘సైరా’ అయినా, ఇంకొకటైనా.. బాలీవుడ్‌ బాక్సాఫీస్‌ వద్ద సత్తా చాటితే, మన తెలుగోడి సత్తానే కదా.. ప్రపంచానికి తెలిసేది.