ఆంధ్ర ప్రదేశ్ అసెంబ్లీ నియోజకవర్గాలకు సంబంధించి విజయవాడ వెస్ట్ అనేది జనసేన పార్టీకి అత్యంత కీలకం.. అని నిన్న మొన్నటిదాకా జనసైనికులు భావించారు. అది నిజం కూడా.! విజయవాడ వెస్ట్‌లో జనసేన పార్టీ చాలా యాక్టివ్‌గా వ్యవహరిస్తూ వచ్చింది.
పోతిన మహేష్ నాయకత్వంలో జనసేన పార్టీ, చాలా అగ్రెసివ్‌గా అధికార వైసీపీ మీద పోరాడిన మాట వాస్తవం. టీడీపీతో కూడా అదే స్థాయిలో రాజకీయ పోరాటం చేసింది జనసేన పార్టీ.. అది 2019 ఎన్నికల సమయంలో.
ఆ పోతిన మహేష్, జనసేన పార్టీ నుంచి విజయవాడ వెస్ట్ టిక్కెట్ ఆశించారు.. కానీ, భంగపడాల్సి వచ్చింది. పోతిన మహేష్‌కి టిక్కెట్ ఇచ్చి వుండాల్సిందంటూ జనసైనికులు, జనసేన అధినేత పవన్ కళ్యాణ్‌కి సోషల్ మీడియా వేదికగా చాలా చాలా రిక్వెస్టులు పెట్టారు. కానీ, వ్యవహారం ఎక్కడో తేడా కొట్టింది.
విజయవాడ వెస్ట్ నియోజకవర్గం జనసేనకు కాకుండా బీజేపీకి వెళ్ళింది.. పొత్తులో భాగంగా. నిజంగానే ఇది పెద్ద ట్విస్ట్.! మామూలుగా అయితే, జనసేనాని ఆ టిక్కెట్ కోసం గట్టిగానే పట్టుబట్టి వుండేవారు. గతంలో, అంటే 2019 ఎన్నికల్లో అలాగే పట్టుబట్టి, వామపక్షాలకు ఆ టిక్కెట్ పొత్తులో వెళ్ళకుండా, జనసేన తరఫున పోతిన మహేష్‌ని నిలబెట్టారు కూడా. కానీ, పోతిన మహేష్ ఓడిపోయారు.
ఇక, ప్రస్తుతానికి వస్తే, జనసేనను వీడారు పోతిన మహేష్. టిక్కెట్ కోసం చివరి వరకూ ప్రయత్నించి, పార్టీకి గుడ్ బై చెప్పేశారాయన. రాజకీయాలన్నాక నాయకులు పార్టీల్ని వీడటం అనేది సర్వసాధారణం. టిక్కెట్ దక్కలేదన్న కారణంగా, పార్టీ మీద బురద చల్లటమూ మామూలే.
అయితే, రాత్రికి రాత్రి ఇలా ఎలా మారిపోయాడు పోతిన మహేష్.? అని జనసైనికులు షాక్ గురయ్యేంతలా, వైసీపీ మార్కు ప్రెస్ మీట్ పెట్టారు పోతిన మహేష్.. పార్టీని వీడుతూ. పవన్ కళ్యాణ్ భార్య అన్నా లెజినెవా గురించి అభ్యంతరకర వ్యాఖ్యలు చేశారాయన. పిఠాపురంలో పార్టీ కార్యాలయ ప్రారంభోత్సవానికి మీ భార్య అన్నా లెజినెవాని తీసుకురావాలంటూ చిత్ర విచిత్రమైన కోరిక కోరారు పోతిన మహేష్.
ఇది వైసీపీ మార్కు స్క్రిప్ట్.! ఇందులో ఇంకో మాటకు తావు లేదు. కేవలం వైసీపీ నాయకులు మాత్రమే, ఇదిగో ఇలా రాజకీయ ప్రత్యర్థుల భార్యల గురించి రాజకీయ విమర్శలు చేస్తుంటారు. ఔను, పవన్ కళ్యాణ్ చేసిందే కరెక్ట్.! పవన్ కళ్యాణ్ అభిమానినని చెప్పుకుని, పవన్ కళ్యాణ్ భావ జాలం పట్ల ఆకర్షితుడినయ్యానని చెప్పుకుని.. ఇదిగో, ఇలా పవన్ కళ్యాణ్ భార్య మీద అభ్యంతరకర వ్యాఖ్యలు చేశాడంటే, పోతిన మహేష్‌ని ఏమనాలి.?
గెలిచాక వైసీపీలోకి దూకెయ్యాలనుకున్నాడో ఏమోగానీ.. ఆ విషయం పవన్ కళ్యాణ్‌కి ముందే తెలిసిందేమోగానీ.. పోతిన మహేష్ విషయంలో పవన్ కళ్యాణ్ అత్యంత వ్యూహాత్మకంగా వ్యవహరించారనే అనుకోవాలి.!