విశాఖ వైసీపీలో ‘భూముల గోల’: కొట్టుకు ఛస్తున్నారంతే.!

అదేంటో, విశాఖపట్నం అనగానే భూముల కుంభకోణానికి కేరాఫ్ అడ్రస్ అయి కూర్చుంది.. అదీ ఉమ్మడి తెలుగు రాష్ట్రం రెండుగా విడిపోయాక.! ఉమ్మడి తెలుగు రాష్ట్రంలో రాజధాని హైద్రాబాద్ తర్వాత అతి పెద్ద నగరం అంటే విశాఖపట్నం మాత్రమే. విశాఖపట్నం అందమైన నగరం. హైద్రాబాద్ తరహాలోనే విశాఖపట్నంలో కూడా దేశంలోని వివిధ రాష్ట్రాల నుంచి స్థిరపడ్డ వారు చాలామందే వున్నారు. భిన్న సంస్కృతులు విశాఖలో కనిపిస్తాయి. పైగా, ఉత్తరాంధ్ర మార్కు అమాయకత్వం కూడా అక్కడ ఎక్కువే. అన్నిటికీ మించి, విశాఖలో విలువైన భూములున్నాయ్. అదీ అసలు సంగతి.

సింహాచలం దేవస్థానానికి సంబంధించిన భూములు కావొచ్చు, ఇతరత్రా విలువైన భూములు కావొచ్చు.. వాటిపై ఉమ్మడి తెలుగు రాష్ట్రంలో పెద్దగా రాజకీయ గద్దల దృష్టి పడలేదు. ఓ మోస్తరుగా పడినా, విశాఖ ప్రజానీకం ఆ రాజకీయ గద్దల వ్యూహాల్ని తేలిగ్గానే తిప్పికొట్టగలిగారు. ఉత్తరాంధ్ర అంటే అమాయకత్వం మాత్రమే కాదు, పోరాటాల పురిటిగడ్డ కూడా.! కానీ, ఉమ్మడి తెలుగు రాష్ట్రం రెండుగా విడిపోయాక పరిస్థితి మారిపోయింది. రాజకీయ వలస గద్దల తాకిడి ఎక్కువైపోయింది.

ఉత్తరాంధ్రలో పోరాటపటిమ కూడా తగ్గిపోయింది. ఇంకేముంది, రాజకీయ గద్దలు ఆడిందే ఆట.. పాడిందే పాట. మరీ ముఖ్యంగా గడచిన మూడేళ్ళలో పరిస్థితి మరింత దారుణంగా తయారైంది. సింహాచలం దేవస్థానానికి సంబంధించి రాజకీయ రగడ.. మన్సాస్ వ్యవహారానికి సంబంధించి రాజకీయ రగడ.. ఇవన్నీ చూస్తూనే వున్నాం. తాజాగా దసపల్లా భూముల వివాదం తెరపైకొచ్చింది. ‘నా కూతురి కుటుంబం భూముల్ని కొంటే, నాకేంటి సంబంధం.?’ అంటూ ఉత్తరాంధ్ర వాసి కాకపోయినా, విశాఖపై పెత్తనం చేస్తోన్న ఓ వైపీపీ ముఖ్య నేత చావు కబురు చల్లగా చెప్పాడు.

రియల్ ఎస్టేట్ రంగంలో రాణించి, రాజకీయాల్లోకి వచ్చిన ఓ వైసీపీ నేత కన్ను కూడా ఆ భూముల మీద పడింది. ఎక్కడో పంపకాల్లో తేడా వచ్చి, కుంభకోణానికి సంబంధించి అధికార పార్టీ నేతలే మీడియాకి లీకులిచ్చుకున్నారు. విషయం ముదిరి పాకాన పడింది. నిజానికి, ముఖ్యమంత్రి వైఎస్ జగన్, పార్టీలో జరుగుతున్న ఆధిపత్య పోరు, భూ కుంభకోణం.. ఇవన్నీ పార్టీకి నష్టం చేస్తాయని భావించి, రంగంలోకి దిగి.. ఇరువురికీ చీవాట్లు పెట్టాలి. కానీ, అలా జరగడంలేదు.