ఆ లాయర్ కు అంత ఫీజా?.. హైకోర్టులో పిటిషన్లు

అర్హతలకు మించి ఓ లాయర్ కు ఇష్టానుసారం ఫీజు రూపంలో దాదాపు రూ.కోటి చెల్లించారంటూ ఏపీ హైకోర్టులో పిటిషన్లు దాఖలయ్యాయి. రాజధానికి సంబంధించిన కేసుల్లో వాదించారని పేర్కొంటూ నిరంజన్ రెడ్డి అనే లాయర్ కు ప్రభుత్వం రూ.96 లక్షలు ఫీజు రూపేణా చెల్లించిందని.. ఆయన కన్నా సీనియర్లు తక్కువ ఫీజుకే వాదిస్తున్నారని తెలిసినా.. నిరంజన్ రెడ్డికి ఎక్కువ మొత్తం చెల్లించారని అందులో పేర్కొన్నారు. ఈ పిటిషన్లు కూడా లాయర్లే వేయడం విశేషం. నిజానికి రాజధాని కేసుల్లో దాఖలైన హెబియస్ కార్పస్ పిటిషన్లపై విచారణలో నిరంజన్ రెడ్డి పాల్గొనలేదని వారు వివరించారు. ఆయనకు అత్యధిక మొత్తం ఫీజు చెల్లించడం ఏపీ న్యాయవాదుల రుసుముల నిబంధన-43ను ఉల్లంఘించినట్టేనని స్పష్టంచేశారు. వాస్తవానికి ఏపీ సర్కారు తీసుకున్న చాలా నిర్ణయాలపై పలువురు కోర్టుకు వెళ్లడంతో ప్రభుత్వ తరఫున పలువురు లాయర్లు వాదనలు వినిపించారు. దీంతో వారికి లక్షలకు లక్షలు ప్రజాధనాన్ని ఫీజులు రూపంలో ఏపీ సర్కారు చెల్లించింది. ఆ లాయర్లంతా జగన్ కేసుల్లో వాదించినవారేనని.. అందుకు ప్రతిఫలంగానే జగన్ ప్రజల సొమ్మును వారికి ఫీజుల రూపంలో దోచిపెడుతున్నారని విపక్షాలు విమర్శలు గుప్పిస్తున్నాయి.