అప్పుడూ.. ఇప్పుడూ.. జనసేనాని పవన్‌ ‘రైట్‌ రైట్‌’ అంతే.!

ఆంధ్రప్రదేశ్‌లో ఇసుక సమస్య గురించి మొట్టమొదట నినదించింది జనసేన పార్టీ. విశాఖలో ఈ మేరకు లాంగ్‌ మార్చ్‌ని కూడా నిర్వహఙంచారు జనసేన అధినేత పవన్‌ కళ్యాణ్‌. అప్పట్లో అధికార పార్టీ నేతలు, పవన్‌ కళ్యాణ్‌పై చేసిన దుష్ప్రచారం అంతా ఇంతా కాదు. కానీ, నిజం నిప్పులాంటిది. ఆ ఇసుక ఎంత సమస్యగా మారిందో ఇప్పుడు అధికార పార్టీ నేతలే చెబుతున్నారు.

ఇక, ఇప్పుడు పదో తరగతి పరీక్షల విషయంలోనూ జనసేనాని వాదనే నిజమయ్యింది. కరోనా వైరస్‌ నేపథ్యంలో తెలంగాణ రాష్ట్రం సహా పలు రాష్ట్రాలు పదో తరగతి పరీక్షల్ని రద్దు చేశాయి. ‘విద్యార్థుల భద్రతను దృష్టిలో పెట్టుకుని పదో తరగతి పరీక్షల్ని ప్రభుత్వం రద్దు చేయాలి..’ అంటూ ఆంధ్రప్రదేశ్‌ ప్రభుత్వాన్ని జనసేనాని కొద్ది రోజుల క్రితం డిమాండ్‌ చేస్తే, ఆ పార్టీ సానుభూతిపరులు చేసిన విమర్శలు అన్నీ ఇన్నీ కావు.

సోషల్‌ మీడియాలో జనసేనానిపై బురద జల్లుతూ పెద్దయెత్తున ‘ట్రెండింగ్‌’ షురూ చేశారు. కొందరు వైసీపీ నేతలు సైతం, పవన్‌ కళ్యాణ్‌ తీరుని తప్పు పట్టారు. ‘పవన్‌ కళ్యాణ్‌కి ఏం తెలుసు విద్యార్థుల గురించి.? విద్యార్థులు, వారి తల్లిదండ్రులు పరీక్షలకు అనుకూలంగా వున్నారు.. ప్రభుత్వం అన్ని చర్యలూ తీసుకుంటోంది. పరీక్షలు నిర్వహించి తీరుతాం..’ అని వైసీపీ నేతలు, జనసేనపై విరుచుకుపడ్డారు. కానీ, చివరికి ఏం జరిగింది.? జనసేనాని వాదనకు వైసీపీ ప్రభుత్వం తలొగ్గిందని అనడం ఎంతవరకు సబబు.? అన్న విషయాన్ని పక్కన పెడితే, పరిస్థితి తీవ్రతను ప్రభుత్వం అర్థం చేసుకున్నట్లే కన్పించింది.

ఇలాంటి సున్నితమైన విషయాల్లో బేషజాలు అనవసరం. ఇసుక విషయంలో కూడా గ్రౌండ్‌ లెవల్‌లో జరుగుతున్న అవినీతి, అక్రమాలపై ప్రభుత్వం దృష్టి పెట్టాల్సి వుంది. ఇదొక్కటే కాదు, విపక్షాల నుంచి వచ్చే ఏ విమర్శనైనా.. ప్రభుత్వం పరిగణనలోకి తీసుకోవాల్సిందే. వాస్తవ పరిస్థితులకు అనుగుణంగా చర్యలు చేపడితే, ప్రభుత్వానికే మంచి పేరు వస్తుంది.

స్థానిక ఎన్నిక విషయంలో ఏం జరిగిందో చూశాం. ఆఖరికి రాష్ట్ర ఎన్నికల కమిషనర్‌కి కూడా ‘కులం’ ఆపాదించారు ప్రభుత్వ పెద్దలు. ‘విపక్షంలో వుంటే అన్నిటినీ విమర్శించాలనే రూల్‌ ఏమీ లేదు. మంచి పనులు చేసినప్పుడు అభినందిస్తాం.. ప్రభుత్వం తరఫున పొరపాట్లు జరుగుతున్నప్పుడు ప్రశ్నిస్తాం.. బాధ్యతగల విపక్షంగా మేం ప్రభుత్వానికి సూచనలు చేయడం, ప్రజల సమస్యల్ని ప్రభుత్వం దృష్టికి తీసుకెళ్ళడం మా బాధ్యత..’ అంటోంది జనసేన పార్టీ.